អន្តរជាតិ
នយោបាយអន្តរជាតិ
រដ្ឋអាជ្ញាកូរ៉េខាងត្បូង ឃាត់ខ្លួនស្ត្រីនៅពីក្រោយរឿងអាស្រូវលូកដៃចូលកិច្ចការរដ្ឋ
×![]()
ដោយ: តន ចាន់រិទ្ធារ៉ា
លោកស្រី Choi Soon-sil ដែលនៅចំកណ្ដាលរឿងអាស្រូវនយោបាយរបស់លោកស្រី ប្រធានាធិបតី ប៉ាក ហ្គឺនហេ (Park Geun-hye) ត្រូវបានចាប់ខ្លួនហើយដោយរដ្ឋអាជ្ញាកូរ៉េខាងត្បូងនៅថ្ងៃទី៣១ ខែតុលា។ ការឃាត់ខ្លួននេះធ្វើឡើងក្រោយលោកស្រី Choi Soon-sil ចូលខ្លួនឲ្យមន្ត្រីរដ្ឋអាជ្ញាសាកសួរជុំវិញការលូកដៃចូលកិច្ចការប្រទេសជាតិ បើទោះជាលោកស្រីមិនមែនជាមន្ត្រីរដ្ឋាភិបាលក៏ដោយចុះ។
សារព័ត៌មានកូរ៉េខាងត្បូង Yonhap រាយការណ៍ថា លោកស្រី Choi Soon-sil ត្រូវបានរដ្ឋអាជ្ញាដាក់ក្រោមការឃាត់ខ្លួនបន្ទាន់ដោយគ្មានដីកា ក្រោយលោកស្រីចូលខ្លួនបំភ្លឺរូចមក។ រដ្ឋអាជ្ញាកូរ៉េខាងត្បូងបញ្ជាក់ថា ពួកគេព្រួយបារម្ភថា លោកស្រី Choi Soon-sil អាចរត់គេចខ្លួន និងបំផ្លាញភស្តុតាងពាក់ព័ន្ធនឹងរឿងអាស្រូវដែលកំពុងរំជើបរំជួលនយោបាយផ្ទៃក្នុងកូរ៉េខាងត្បូង។
ការិយាល័យរដ្ឋអាជ្ញាកូរ៉េខាងត្បូង កំពុងស៊ើបអង្កេតការចោទប្រកាន់លើលោកស្រី Choi Soon-sil ដែលប្រើទំនាក់ទំនងជាមួយលោកស្រី ប៉ាក ហ្គឺនហេ ដើម្បីកកូរកកាយកិច្ចការរដ្ឋតាមរយៈការពិនិត្យឯកសារប្រធានាធិបតី និងប្រើឥទ្ធិពលលោកស្រី ប៉ាក ដើម្បីផលប្រយោជន៍ផ្ទាល់ខ្លួន។ លោកស្រី Choi ត្រូវចោទថា បានទទួលទឹកប្រាក់ពីក្រុមហ៊ុនធំៗដោយសារតែទំនាក់ទំនងរវាងលោកស្រី និងប្រធានាធិបតី ប៉ាក ហ្គឺនហេ។
ប្រភពព័ត៌មានដដែលបន្តថា ការិយាល័យរដ្ឋអាជ្ញាក៏បានបញ្ជាក់ពីការឃាត់ខ្លួនលោកស្រី Choi និងបានបញ្ជូនលោកស្រីទៅកាន់មន្ទីរឃុំឃាំងក្រុងសេអ៊ូលផងដែរ។ ហើយនៅព្រឹកថ្ងៃទី១ ខែវិច្ឆិកា លោកស្រី Choi ត្រូវបានប៉ូលិសនាំមកសាកសួរបន្ថែមនៅការិយាល័យរដ្ឋអាជ្ញាដែរ។ ក្រោមច្បាប់កូរ៉េខាងត្បូង ជនសង្ស័យអាចត្រូវបានឃាត់ខ្លួនរយៈពេល៤៨ម៉ោងដោយមិនចាំបាច់មានដីកាតុលាការ ប៉ុន្តែការឃាត់ខ្លួនលើសពីនោះ ត្រូវបានមានការអនុញ្ញាតពីតុលាការវិញ។
រឿងអាស្រូវដ៏រសើបនេះ ធ្វើឲ្យប្រជាប្រិយភាពលោកស្រី ប៉ាក ហ្គឺនហេ ធ្លាក់ចុះយ៉ាងខ្លាំង។ នៅចុងសប្ដាហ៍មុន បាតុកររាប់ពាន់នាក់ប្រមូលផ្ដុំដើម្បីតវ៉ាឲ្យលោកស្រីចាកចេញពីតំណែងប្រធានាធិបតីទៀតផង។ មិនតែប៉ុណ្ណោះ លោកស្រីប្រធានាធិបតី ប៉ាក ក៏បានរុះរើទីប្រឹក្សាជាន់ខ្ពស់ជាច្រើននាក់ ដើម្បីស្ដារប្រជាប្រិយភាព និងដោះស្រាយបញ្ហាដែលកំពុងធ្វើឲ្យកៅអីប្រធានាធិបតីលោកស្រីរង្គោះរង្គើនោះ។
ជាការកត់សម្គាល់នោះ រឿងអាស្រូវនេះលេចធ្លាយចំពេលដែលលោកស្រី ប៉ាក ហ្គឺនហេ បង្ហាញបំណងកែរដ្ឋធម្មនុញ្ញប្រទេស ដើម្បីបើកផ្លូវឲ្យប្រធានាធិបតីកាន់តំណែងលើសមួយអាណត្តិ។ បើទោះជាលោកស្រី ប៉ាក ហ្គឺនហេ បានសុំទោសជាសាធារណរួចហើយក៏ដោយចុះ ប៉ុន្តែកំហឹងរបស់ប្រជាជនកូរ៉េខាងត្បូងនៅពុះកញ្ជ្រោលដដែល៕
Tag:
កូរ៉េខាងត្បូង
Park Geun-hye
© រក្សាសិទ្ធិដោយ thmeythmey.com
