អន្តរជាតិ
នាយករដ្ឋមន្ត្រីអ៊ីរ៉ាក់ប្រាប់ឲ្យ ISIS ចុះចាញ់ ខណៈកងទ័ពចម្រុះចូលដល់ជាយក្រុង Mosul
× កងកម្លាំងចម្រុះអ៊ីរ៉ាក់ ដែលមានការគាំទ្រពីសំណាក់សម្ព័ន្ធមិត្តដឹកនាំអាមេរិកនោះ បានចូលដល់តំបន់ជាយក្រុង Mosul ហើយស្របពេលដែលយុទ្ធនាការរំដោះទីក្រុងនេះ ខិតជិតដល់សប្ដាហ៍ទីបីហើយនោះ។ តំបន់ជាច្រើននៅជុំវិញទីក្រុងធំជាងគេរបស់អ៊ីរ៉ាក់នេះ ត្រូវបានរំដោះជាបន្តបន្ទាប់ និងឈានដល់ការរំដោះទីក្រុងទាំងមូល។ ចំណែកនាយករដ្ឋមន្ត្រីអ៊ីរ៉ាក់ ក៏ប្រាប់ឲ្យក្រុមជ្រុលនិយមដាក់អាវុធ បើមិនចង់ស្លាប់ទេនោះ។
កងកម្លាំងចម្រុះអ៊ីរ៉ាក់ជាងបីម៉ឺននាក់ បានរុលចូលកាន់ជិតទៅកាន់ទីក្រុង Mosul បន្ទាប់ពីពួកគេបណ្ដេញក្រុមជ្រុលនិយមរដ្ឋឥស្លាមចេញអស់ពីភូមិនៅជុំវិញទីក្រុងនេះនៅថ្ងៃទី៣១ ខែតុលាមក។ កងទ័ពអ៊ីរ៉ាក់ សម្រុកចូលភូមិចុងក្រោយនៅភាគខាងកើតក្រុង Mosul ដោយមានគាំទ្រដោយកាំភ្លើងធំ និងការវាយប្រហារដែនអាកាសដែលបានកម្ទេចទីតាំងក្រុមជ្រុលនិយមជាច្រើននោះ។
នៅពេលនេះ កងទ័ពអ៊ីរ៉ាក់នៅចម្ងាយមិនដល់មួយគីឡូម៉ែតឡើយពីជាយក្រុង និងស្ថិតនៅត្រឹមតែ៨គីឡូម៉ែតប៉ុណ្ណោះពីកណ្ដាលក្រុង Mosul បន្ទាប់ការបើកប្រតិបត្តិការរំដោះទីក្រុងនេះ កាលពីជាងបីសប្ដាហ៍មុន។ អ្នកនាំពាក្យកងកម្លាំងពិសេសអ៊ីរ៉ាក់ លោកឧត្តមសេនីយ៍ Haider Fadhil និយាយថា កងទ័ពនឹងចូលទីក្រុង Mosul ក្នុងពេលពេលឆាប់ៗនេះ និងរំដោះទីក្រុងនេះក្នុងពេលខ្លីនេះដែរ។
បើតាមសារព័ត៌មាន Al Jazeera អាមេរិកបានប៉ាន់ស្មានថា ក្រុមជ្រុលនិយមរដ្ឋឥស្លាមចន្លោះ៣បីពាន់ ទៅ៥ពាន់នាក់ កំពុងគ្រប់គ្រងក្រុង Mosul ហើយសកម្មជនចន្លោះ១៥០០នាក់ ទៅ២៥០០នាក់ ស្ថិតនៅខ្សែក្រវ៉ាត់ការពារខាងក្រៅក្រុង Mosul ។ ជាមួយនឹងចំនួនសកម្មជនច្រើនបែបនេះ កងកម្លាំងចម្រុះអ៊ីរ៉ាក់ ប្រហែលជាប្រទះនឹងការវាយប្រយុទ្ធដ៏ខ្លាំងដើម្បីដណ្ដើមទីក្រុងនេះ បើទោះជាខាងកងទ័ពអ៊ីរ៉ាក់មានកម្លាំងច្រើនជាងក៏ដោយចុះ។
យ៉ាងណាក្ដី នាយករដ្ឋមន្ត្រីអ៊ីរ៉ាក់ Haider al-Abadi នៅថ្ងៃទី៣១ ខែតុលា បានប្រាប់ឲ្យសកម្មជនរដ្ឋឥស្លាម ដាក់អាវុធចុះចាញ់ បើមិនចង់អស់ជីវិតទេ។ ថ្លែងតាមទូរទស្សនរដ្ឋពីទីក្រុង Shura ភាគខាងត្បូងក្រុង Mosul នាយករដ្ឋមន្ត្រីអ៊ីរ៉ាក់បញ្ជាក់ថា កងទ័ពបានឡោមព័ទ្ធក្រុមរដ្ឋឥស្លាមគ្រប់ទិសទាំងអស់ ហើយពួកគេគ្មានផ្លូវរត់ឡើយ និងប្រឈមមុខតែការស្លាប់ប៉ុណ្ណោះ។
ជាមួយគ្នានេះ បន្ថែមពីលើកងកម្លាំងចម្រុះបីម៉ឺននាក់នោះ សកម្មជនប្រយុទ្ធស៊ីអ៊ីតរាប់ពាន់នាក់ទៀតដែលគាំទ្រដោយអ៊ីរ៉ង់ ក៏ចូលរួមក្នុងប្រតិបត្តិការនេះដែរ ដែលធ្វើឲ្យចំនួនកងកម្លាំងចម្រុះកើនដល់ចំនួនប្រហាក់ប្រហែល៤ម៉ឺននាក់ហើយ។ សកម្មជនស៊ីអ៊ីតនេះ នឹងបិទផ្លូវសកម្មជនក្រុមរដ្ឋឥស្លាមនៅទិសខាងត្បូងក្រុង Mosul ៕
Tag:
អ៊ីរ៉ាក់
Mosul
ក្រុមរដ្ឋឥស្លាម
© រក្សាសិទ្ធិដោយ thmeythmey.com