អន្តរជាតិ
នយោបាយអន្តរជាតិ
លោក Duterte ឲ្យលោក អូបាម៉ា បើកវចនានុក្រមមើលនិយមន័យពាក្យ «សេចក្ដីថ្លៃថ្នូរ»
×![]()
ដោយ: តន ចាន់រិទ្ធារ៉ា
ក្រោយក្បត់ពាក្យសន្យាជាមួយព្រះ ប្រធានាធិបតីហ្វីលីពីន Rodrigo Duterte បានបន្តប្រើពាក្យមិនសមរម្យដាក់អ្នកណាដែលលោកមិនចូលចិត្ត និងតែងតែរិះគន់លោក។ ជាថ្មីម្ដងទៀត លោក Duterte បានរិះគន់ខ្លាំងលើប្រធានាធិបតីអាមេរិកជិតចប់អាណត្តិ លោក បារ៉ាក់ អូបាម៉ា ដែលជ្រៀតជ្រែកចូលកិច្ចការរបស់រដ្ឋបាលរបស់លោក ជុំវិញការសម្លាប់មនុស្សក្រៅប្រព័ន្ធតុលាការក្នុងសង្គ្រាមបង្ក្រាបគ្រឿងញៀន។
«អ្នកដាក់ទណ្ឌកម្ម» Rodrigo Duterte បានរម្លឹកពីការប្រកាសរបស់លោកក្នុងការចែកផ្លូវជាមួយសម្ព័ន្ធមិត្តអាមេរិក អំឡុងទស្សនកិច្ចចិន ដែលជាគូប្រជែងរបស់អាមេរិកតែម្ដង។ លោក Duterte អះអាងថា ការប្រកាសចែកផ្លូវជាមួយអាមេរិក គឺដើម្បីការពារសេចក្ដីថ្លែថ្នូររបស់ហ្វីលីពីន ដ្បិតនាពេលកន្លងមក ហ្វីលីពីនធ្វើតែតាមបង្គាប់អាមេរិកប៉ុណ្ណោះ។
ឆ្លៀតពេលចូលរួមនៅក្នុងកម្មវិធីមួយនៅថ្ងៃទី៤ ខែវិច្ឆិកា ប្រធានាធិបតីហ្វីលីពីន បន្តនិយាយរិះគន់ប្រធានាធិបតី បារ៉ាក់ អូបាម៉ា ដែលបានបង្ហាញការព្រួយបារម្ភ ជុំវិញយុទ្ធនាការបោសសម្អាតគ្រឿងញៀន និងការដែលអាមេរិកចេះតែឲ្យហ្វីលីពីនធ្វើតាមរហូតមក។ លោក Duterte និយាយថា៖ «លោក អូបាម៉ា ! មានរឿងអីកើតឡើងហ្នឹង? ទៅបើកវចនានុក្រម ហើយរកអត្ថន័យពាក្យ «ថ្លៃថ្នូរ» ទៅ។»
ប្រធានាធិបតីហ្វីលីពីនរូបនេះ និយាយបែបខឹងខ្លាំងដូចនេះ ក្រោយពេលអាមេរិកគំរាមផ្ដាច់ជំនួយបរទេស ក្រោមហេតុផលព្រួយបារម្ភជុំវិញការសម្លាប់មនុស្សយ៉ាងច្រើនក្នុងប្រតិបត្តិការបង្ក្រាបគ្រឿងញៀននាពេលកន្លងមក។ លោក Duterte ប្រាប់ទៅវិញថា ប្រទេសរបស់លោក នឹងនៅតែអាចរស់បាន បើទោះជាគ្មានជំនួយហិរញ្ញវត្ថុពីរដ្ឋាភិបាលអាមេរិកក៏ដោយចុះ។
បន្ថែមពីលើនេះ លោក Duterte ចាត់ទុកការគំរាមរបស់អាមេរិក ជាការប្រមាថសេចក្ដីថ្លៃថ្នូររបស់ប្រជាជនហ្វីលីពីន ដោយធ្វើដូចហ្វីលីពីនជាឆ្កែរបស់អាមេរិកអ៊ីចឹង។ នេះបើតាមការផ្សាយរបស់សារព័ត៌មាន Rappler មុននឹងបន្តស្រង់សំដីលោក Duterte ថា អាមេរិកធ្វើខ្លួនដូចម្ចាស់របស់ហ្វីលីពីន ដែលចូលចិត្តបោះសាច់ឲ្យប្រជាជនហ្វីលីពីនពីចម្ងាយ។
តាំងពីដើមមកនោះ ប្រធានាធិបតី Duterte ដែលជាត្រូវគេហៅថា «មេដឹកនាំមាត់អត់គម្រប» តែងតែរិះគន់អ្នកដែលរិះគន់ការបង្ក្រាបគ្រឿងញៀន ជាពិសេស អាមេរិក សហភាពអឺរ៉ុប និងអង្គការសហប្រជាជាតិជាដើម។ ទាំងអាមេរិក និងអង្គការពិភពលោកទាំងពីរ ក៏ធ្លាប់ត្រូវបានលោក Duterte ប្រើពាក្យអសុរសដាក់ជាញឹកញយផងដែរ ដែលធ្វើឲ្យទំនាក់ទំនងទ្វេភាគី ធ្លាក់ចុះខ្លាំងនាពេលកន្លងទៅ៕
Tag:
ហ្វីលីពីន
អាមេរិក
Rodrigo Duterte
បារ៉ាក់ អូបាម៉ា
© រក្សាសិទ្ធិដោយ thmeythmey.com
