អន្តរជាតិ
នយោបាយអន្តរជាតិ
ISIS ជួបសមរភូមិពីរផ្លូវ ខណៈក្រុមឧទ្ទាមស៊ីរីបើកប្រតិបត្តិការរំដោះក្រុង Raqqa មួយទៀត
×
កងកម្លាំងឧទ្ទាមប្រជាធិបតេយ្យស៊ីរី ដែលជាក្រុមឧទ្ទាមប្រឆាំងដ៏ធំ នៅថ្ងៃទី៦ ខែតុលា បានប្រកាសបើកយុទ្ធនាការរំដោះទីក្រុង Raqqa ដែលជាមូលដ្ឋានធំជាងគេរបស់ក្រុមជ្រុលនិយមរដ្ឋឥស្លាមនៅស៊ីរី។ ប្រតិបត្តិការនេះធ្វើឡើង ស្របពេលដែលនៅអ៊ីរ៉ាក់ឯណោះ កងកម្លាំងចម្រុះអ៊ីរ៉ាក់ជាច្រើនម៉ឺននាក់ ក៏កំពុងបើកប្រតិបត្តិការរំដោះមូលដ្ឋានធំរបស់សកម្មជនរដ្ឋឥស្លាមនៅក្រុង Mosul ផងដែរ។
ក្រុមជ្រុលនិយមរដ្ឋឥស្លាម កំពុងប្រឈមមុខសមរភូមិពីរទិស បន្ទាប់ពីក្រុមចម្រុះឃឺដ និងអារ៉ាប់ (SDF) ដែលជាក្រុមឧទ្ទាមប្រឆាំងនៅស៊ីរីគាំទ្រដោយអាមេរិក បើកប្រតិបត្តិការដណ្ដើមទីក្រុង Raqqa ។ ទន្ទឹមគ្នានេះ នៅអ៊ីរ៉ាក់វិញ ដោយមានជំនួយពីកងកម្លាំងអាកាសសម្ព័ន្ធមិត្តដឹកមុខដោយអាមេរិក កងកម្លាំងចម្រុះអ៊ីរ៉ាក់ ក៏កំពុងវាយប្រយុទ្ធបណ្ដេញសកម្មជនរដ្ឋក្រុមឥស្លាមពីទីក្រុង Mosul និងបានគ្រប់គ្រងទីតាំងជាច្រើនហើយដែរ។
ទីក្រុង Raqqa ត្រូវបានចាត់ទុកជារដ្ឋធានីរបស់ក្រុមជ្រុលនិយមរដ្ឋឥស្លាមនៅស៊ីរី ហើយក្រុង Mosul ជារដ្ឋធានីក្រុមនេះនៅអ៊ីរ៉ាក់។ ប៉ុន្តែរយៈពេលចុងក្រោយនេះ ក្រុមជ្រុលនិយមមួយនេះ បានបាត់បង់ទឹកដីយ៉ាងច្រើនទាំងនៅអ៊ីរ៉ាក់ និងស៊ីរី បន្ទាប់ពីបានគ្រប់គ្រងទឹកដីទាំងនោះ ចាប់តាំងពីឆ្នាំ២០១៤មកនោះ។
សារព័ត៌មាន Al Jazeera ផ្សាយថា មេបញ្ជាការកងកម្លាំងចម្រុះឃឺដ និងអារ៉ាប់ បានប្រកាសពីការបើកការវាយដណ្ដើមក្រុង Raqqa នៅក្នុងសន្និសីទកាសែតមួយក្នុងក្រុង Ain Issa ដែលមានចម្ងាយ៥០គីឡូម៉ែត ពីក្រុង Raqqa ។ មន្ត្រីរបស់ក្រុមចម្រុះ SDF ប្រកាសថា អ្នកប្រយុទ្ធរបស់ក្រុមឧទ្ទាម នឹងបន្តគោលដៅរបស់ខ្លួនរហូតដល់ផ្ដួលរំលំក្រុមរដ្ឋឥស្លាមទទួលជោគជ័យ។
ជាមួយគ្នានោះ កងកម្លាំងឧទ្ទាមស៊ីរី ក៏បានប្រកាសស្នើសុំជំនួយពីសហគមន៍អន្តរជាតិ និងកងកម្លាំងសម្ព័ន្ធមិត្តក្នុងតំបន់ ដើម្បីសម្របសម្រួល និងចូលរួមក្នុងប្រតិបត្តិការនេះដែរ។ មន្ត្រីរបស់ក្រុមចម្រុះនេះ បញ្ជាក់ដែរថា អាមេរិក នឹងជួយផ្ដល់ការគាំទ្រផ្លូវអាកាសសម្រាប់កម្ទេចក្រុមជ្រុលនិយមមួយនេះ។
ដោយឡែក អ្នកនាំពាក្យរបស់ក្រុម SDF បញ្ជាក់ដែរថា កងកម្លាំងប្រហែល៣ម៉ឺននាក់ នឹងចូលរួមក្នុងប្រតិបត្តិការនេះ។ ហើយកងកម្លាំងចម្រុះនឹងវាយលុកចូលក្រុង Raqqa តាមទិសដៅបី ព្រមទាំងដណ្ដើមកាន់កាប់ទីតាំងនៅជុំវិញទីក្រុងនេះសិន មុននឹងប្រមូលកម្លាំងវាយដណ្ដើមមូលដ្ឋានរឹងមាំនេះជាចុងក្រោយ។
ច្បាស់ណាស់ថា ក្រុមជ្រុលនិយមរដ្ឋឥស្លាម នឹងការពាររដ្ឋធានីរបស់ពួកគេ ឲ្យអស់លទ្ធភាព ដ្បិតការបាត់បង់ក្រុង Raqqa ក៏មានន័យថា ពេលវេលាពួកគេនៅស៊ីរី ឈានដល់ទីបញ្ចប់ដែរ ខណៈមូលដ្ឋានរឹងមាំនៅអ៊ីរ៉ាក់ ក៏កំពុងត្រូវបានឡោមព័ទ្ធដែរនោះ។ ចំណែកក្រុមសម្ព័ន្ធមិត្តក្នុងតំបន់ ដែលមានអាមេរិកជួយពីក្រោយ ក៏នឹងជួយជ្រោមជ្រែងប្រតិបត្តិការនេះ ដើម្បីបោសសម្អាតការគំរាមកំហែងដ៏ធំនេះ៕
© រក្សាសិទ្ធិដោយ thmeythmey.com