អន្តរជាតិ
នយោបាយអន្តរជាតិ
ក្រុមឃោសនាប្រឹងជួយបន្ថយក្តីបារម្ភរបស់ពិភពលោកពេល ត្រាំ ជាប់ឆ្នោត
×
នៅសល់ប៉ុន្មានម៉ោងមុនការបោះឆ្នោតមកដល់ ក្រុមឃោសនាដូណាល់ ត្រាំ ប្រឹងប្រែងជួយសម្រាលស្ថានការណ៍ និងបន្ធូរបន្ថយ ការភ័យបារម្ភរបស់ពិភពលោក ចំពោះការឈានទៅឈ្នះការបោះឆ្នោតរបស់លោក ដូណាល់ ត្រាំ។ ការជួយបន្ធូរបន្ថយស្ថានការណ៍នេះធ្វើឡើងស្របពេលដែលរបាយការណ៍ស្ទង់មតិបង្ហាញថា លោកស្រី ហ៊ីឡារី គ្លីនតុន នាំមុខលោក ដូណាល់ ត្រាំ ចំនួន ៤ភាគរយ។
ប្រធានក្រុមឃោសនា របស់លោកបេក្ខជនប្រធានាធិបតី ដូណាល់ ត្រាំ លោកស្រី Kellyanne Conway បានព្យាយាមបន្ធូរបន្ថយរាល់ការយល់ឃើញអវិជ្ជមានរបស់ពិភពលោកចំពោះលោក ដូណាល់ ត្រាំ ស្របពេលដែលការបោះឆ្នោតជិតមកដល់នោះ។ លោកស្រី បានបញ្ជាក់ថា លោក ដូណាល់ ត្រាំ ជាបេក្ខជនតែម្នាក់ប៉ុណ្ណោះដែលការពារផលប្រយោជន៍អាមេរិកបាន។
ក្នុងបទសម្ភាសន៍ជាមួយ BBC លោកស្រីបានថ្លែងថា រាល់ការយល់ឃើញអវិជ្ជមានរបស់ពិភពលោកចំពោះលោក ដូណាល់ ត្រាំ ពិតជារំខានអារម្មណ៍លោកស្រី ប៉ុន្តែលោកស្រីជឿជាក់និងការពារគោលជំហររបស់លោកដូណាល់ ត្រាំដែលតម្កល់ប្រយោជន៍អាមេរិកជាធំ។
លោកស្រីបន្តថា៖«លោក ដូណាល់ ត្រាំ និយាយថា លោកទុកប្រយោជន៍អាមេរិកជារឿងអាទិភាព ហើយលោកពិតជានឹងធ្វើវា»។ លោកស្រីបានលើកយកគោលនយោបាយមួយចំនួន ដែលបញ្ជាក់ពីការព្យាយាមរក្សាប្រយោជន៍អាមេរិករបស់លោក ដូណាល់ ត្រាំ ក្នុងនោះមានទប់ស្កាត់រាល់ការបាត់បង់ការងាររបស់ប្រជាជន បង្ខំឲ្យសមាជិកណាតូ បង់វិភាគទានឲ្យគ្រប់ និងចរចាលើកិច្ចព្រមព្រៀងពាណិជ្ជកម្មណា ដែលធ្វើឲ្យខាតប្រយោជន៍អាមេរិកជាថ្មីវិញ។
កន្លងមកលោក ដូណាល់ ត្រាំ បានទទួលរងការរិះគន់ខ្លាំងពីសំណាក់មេដឹកនាំពិភពលោក ដោយសារពាក្យសម្តីអសីលធម៌ និងធ្វើឲ្យប៉ះពាល់ដល់សាសនានិងជាតិដទៃនោះ។ លោក ហ្វ្រង់ស្វ័រ ហូឡង់ ប្រធានាធិបតីបារាំង បានរិះគន់លោកដូណាល់ ត្រាំ ឥតមានសំចៃមាត់ឡើយ ដោយលោកអះអាងសម្តីអ្នកជំនួញដូចលោក ដូណាល់ត្រាំ ធ្វើឲ្យប្រជាជនទូទៅចង់ក្អួត។ ចំណែកឧត្តមស្នងការពិសេសទទួលបន្ទុកសិទ្ធិមនុស្សក៏រិះគន់លោក ដូណាល់ ត្រាំ ដែរ ដោយលោកបានអះអាង លោកដូណាល់ ត្រាំ ជាគ្រោះថ្នាក់សម្រាប់ពិភពលោក។
យ៉ាងណាក៏ដោយ ប្រធានក្រុមឃោសនាខាងលើនេះ មិនត្រឹមតែការពារជំហររបស់លោក ដូណាល់ ត្រាំ ប៉ុណ្ណោះទេ លោកស្រីក៏ឆ្លៀតវាយប្រហារលោកស្រី ហ៊ីឡារី គ្លីនតុនដែរ។ លោកស្រី ឆ្លៀតលើកយកពីបញ្ហាអ៊ីម៉ែលមករិះគន់លោកស្រី ហ៊ីឡារី គ្លីនតុនជាថ្មី ទោះជាសំណុំរឿងនេះត្រូវបានបិទតាំងពីថ្ងៃអាទិត្យក្រោយ FBI ប្រកាសថាខ្លួនមិនកែសេចក្តីសន្និដ្ឋានកាលពីខែកក្កដាក៏ដោយ។
លោកស្រី Kellyanne Conway បានវាយតម្លៃថា មនុស្សដូចលោកស្រី ហ៊ីឡារី គ្លីនតុនមិនស័ក្តិសមកាន់តំណែងជាប្រធានាធិបតីឡើយ ទោះជាក្នុងកាលៈទេសៈណាក៏ដោយ ព្រោះលោកស្ត្រីជាមនុស្សខ្ជីខ្ជានិងមានរឿងអាស្រូវច្រើន។ ហើយគេមិនអាចជឿជាក់លោកស្រី ហ៊ីឡារី គ្លីនតុន រឿងលេខកូដនុយក្លេអ៊ែរឡើយ ព្រោះសូម្បីតែអ៊ីម៉ែល ក៏លោកស្រីមិនអាចគ្រប់គ្រងបានត្រឹមត្រូវផងនោះ។
យ៉ាងណាក៏ដោយចុះ ទោះជាខាងក្រុមឃោសនា វាយប្រហារលោកស្រី ហ៊ីឡារី គ្លីនតុន ខ្លាំងៗប៉ុន្មានម៉ោងមុនបោះឆ្នោតក៏ដោយ ក៏គេមើលឃើញថា លោកស្រីហ៊ីឡារី គ្លីនតុន បានទទួលការគាំទ្រនាំមុខលោកដូណាល់ ត្រាំ។ យោងតាមរបាយការណ៍របស់សារព័ត៌មាន FOX News ប្រជាប្រិយភាពលោកស្រី ហ៊ីឡារីគ្លីនតុន នាំមុខប្រជាប្រិភាពលោកដូណាល់ ត្រាំ ៤ខ្ទង់៕
Tag:
ដូណាល់ ត្រាំ
ហ៊ីឡារី គ្លីនតុន
© រក្សាសិទ្ធិដោយ thmeythmey.com