អន្តរជាតិ
នយោបាយអន្តរជាតិ
×![]()
ដោយ: តន ចាន់រិទ្ធារ៉ា
ក្រុងសេអ៊ូល នៅថ្ងៃទី៨ ខែវិច្ឆិកា បានផ្ដល់នៅការធានារឹងមាំមួយជុំវិញទំនាក់ទំនងជាមួយអាមេរិក ក្រោយការបោះឆ្នោតជ្រើសរើសប្រធានាធិបតីអាមេរិក នៅថ្ងៃទី ៨ ខែវិច្ឆិកា (ម៉ោងអាមេរិក)។ រដ្ឋាភិបាលក្រុងសេអ៊ូលធានាថា សម្ព័ន្ធភាពអាមេរិក-កូរ៉េខាងត្បូង នឹងនៅតែបន្តរឹងមាំ ទោះជាលទ្ធផលឆ្នោតចេញមកយ៉ាងណាក៏ដោយ។ កូរ៉េខាងត្បូង ក៏នឹងបន្តនយោបាយជិតស្និទ្ធជាមួយរដ្ឋបាលអាមេរិកថ្មី។
«បើទោះជាលទ្ធផលនៃការបោះឆ្នោតប្រធានាធិបតីអាមេរិកយ៉ាងម៉េចក៏ដោយ យើងច្បាស់ថា សម្ព័ន្ធភាពរបស់យើងជាមួយអាមេរិក នឹងនៅតែបន្តទៅមុខទៀត។» នេះជាការលើកឡើងរបស់លោក Cho June-hyuck អ្នកនាំពាក្យក្រសួងការបរទេសកូរ៉េខាងត្បូង ទាក់ទងនឹងទំនាក់ទំនងរវាងកូរ៉េខាងត្បូង និងអាមេរិក ក្រោយការបោះឆ្នោតនៅអាមេរិក ដែលនឹងធ្វើនៅថ្ងៃទី៨ ខែវិច្ឆិកា។
ក្នុងសន្និសីទកាសែតប្រចាំថ្ងៃ អ្នកនាំពាក្យរូបនេះបន្តថា កូរ៉េខាងត្បូង នឹងបន្តគោលនយោបាយដែលមានស្រាប់រវាងប្រទេសទាំងពីរ តាមរយៈទំនាក់ទំនងជិតស្និទ្ធនាពេលកន្លងមក។ ការបោះឆ្នោតនៅអាមេរិក ពិតជាមានឥទ្ធិពលយ៉ាងខ្លាំង ដ្បិតលទ្ធផលនៃការបោះឆ្នោតនេះ នឹងប៉ះពាល់ខ្លាំងលើនយោបាយអាមេរិក មានចំពោះកូរ៉េខាងត្បូង ដូចជាការគំរាមរបស់កូរ៉េខាងជើង ទំនាក់ទំនងពាណិជ្ជកម្ម និងបញ្ហាផ្សេងទៀត។
អ្នកនាំពាក្យដដែលនេះបញ្ជាក់ទៀតថា រដ្ឋាភិបាលក្រុងសេអ៊ូល នឹងចាត់វិធានកាចាំបាច់ទាំងឡាយ ដើម្បីពង្រឹងកិច្ចសហប្រតិបត្តិការ និងទំនាក់ទំនងរវាងសម្ព័ន្ធមិត្តទាំងពីរ ជាមួយរដ្ឋាភិបាលថ្មី ដោយពឹងផ្អែកលើបណ្ដាញដែលត្រូវបានបង្កើតជាមួយនឹងបេក្ខជនប្រធានាធិបតីទាំងពីរ។ នេះបើយោងតាមការផ្សាយរបស់សារព័ត៌មាន Yonhap ។
យ៉ាងណាក៏ដោយចុះ គេរំពឹងថា ទំនាក់ទំនងរវាងអាមេរិក និងកូរ៉េខាងត្បូង ទំនងជាមិនប៉ះពាល់អ្វីឡើយ ដ្បិតក្រុងសេអ៊ូល ជាសម្ព័ន្ធមិត្តស្អិតល្មួតរបស់ក្រុងវ៉ាស៊ីនតោន នៅតំបន់អាស៊ី។ ហើយគេក៏មិនរំពឹងថា ប្រធានាធិបតីថ្មីរបស់អាមេរិកអាចដកដៃចេញពីកូរ៉េខាងត្បូងដែរ។ នរណាក៏ដឹងដែរថា អាមេរិកបានចាប់កូរ៉េខាងត្បូងយ៉ាងជាប់ ចាប់តាំងពីសង្គ្រាមលោកលើកទីពីរមក ហើយក៏មិនដែលលែងដៃដែរ។
មួយវិញទៀត គោលនយោបាយរបស់បេក្ខជនទាំងពីរចំពោះកូរ៉េខាងត្បូង ក៏មិនខុសគ្នាពីប្រធានាធិបតីផ្សេងទៀតឡើយ គឺក្រសោបកូរ៉េខាងត្បូងយ៉ាងជាប់។ បើទោះជាបេក្ខជនបក្សសាធារណរដ្ឋ លោក ដូណាល់ ត្រាំ ហាក់មានគោលនយោបាយខុសប្លែក និងមានទំនោរឲ្យតម្លៃខ្លាំងលើគោលនយោបាយឯករាជ្យ ក៏ដូចជាផែនការកាត់បន្ថយការចំណាយលើសម្ព័ន្ធមិត្តរបស់អាមេរិកក៏ដោយ គោលនយោបាយអាមេរិកចំពោះកូរ៉េខាងត្បូង នឹងនៅតែរក្សាដូចពេលកន្លងមក៕
Tag:
អាមេរិក
កូរ៉េខាងត្បូង
© រក្សាសិទ្ធិដោយ thmeythmey.com
