អន្តរជាតិ
នយោបាយអន្តរជាតិ
បក្សសាធារណរដ្ឋបន្តគ្រប់គ្រងរដ្ឋសភា ឯព្រឹទ្ធសភានៅប្រទាញប្រទង់
×
លទ្ធផលនៃការរាប់សន្លឹកឆ្នោតបង្ហាញថា គណបក្សសាធារណរដ្ឋ នឹងបន្តគ្រប់គ្រងរដ្ឋសភាអាមេរិក រយៈពេល៦ឆ្នាំទៅមុខទៀត។ នេះបើយោងតាមការបង្ហាញលទ្ធផលដោយបណ្ដាញសារព័ត៌មានអាមេរិកនៅថ្ងៃទី៨ ខែវិច្ឆិកា (ម៉ោងនៅអាមេរិក) ខណៈនៅសមរភូមិព្រឹទ្ធសភាវិញ ទាំងបក្សប្រជាធិបតេយ្យ និងបក្សសាធារណរដ្ឋ នៅមានសំឡេងប្រទាញប្រទង់គ្នានៅឡើយ។
បណ្ដាញសារព័ត៌មានអាមេរិកមាន ABC និងទូរទស្សន៍ NBC ជាដើមផ្សាយថា ក្រុមសាធារណរដ្ឋ នឹងបន្តការគ្រប់គ្រងរដ្ឋសភារបស់ខ្លួនមួយអាណត្តិទៀត ក្រោយពេលកាន់កាប់អសនៈភាគច្រើននៅរដ្ឋសភាតាំងពីឆ្នាំ២០១១មកនោះ។ ទន្ទឹមគ្នានេះ បក្សសាធារណរដ្ឋ ក៏ប្រឈមមុខសមរភូមិតឹងតែង ដើម្បីការពារសំឡេងភាគច្រើនរបស់នៅព្រឹទ្ធសភាដែរនោះ។
ក្នុងការប្រជែងកៅអីព្រឹទ្ធសភា រដ្ឋចំនួន១៦ បានប្រកាសលទ្ធផលហើយ ស្របពេលដែលបក្សប្រជាធិបតេយ្យនាំមុខតែរដ្ឋមានកៅអីមួយៗប៉ុណ្ណោះ។ យ៉ាងណាក្ដី នៅសល់រដ្ឋជាច្រើនទៀត ដែលមិនទាន់ចេញលទ្ធផលផ្លូវការ ជាពិសេសនៅតាមរដ្ឋសំខាន់ផ្សេងទៀត ដែលបក្សទាំងពីរសុទ្ធតែសង្ឃឹមទទួលបានការគាំទ្រដូចគ្នាៗ។
ការគ្រប់គ្រងរដ្ឋសភា គឺជារឿងសំខាន់របស់បក្សទាំងពីរ ព្រោះវានឹងមានឥទ្ធិពលដល់ការបង្កើតគោលនយោបាយនានារបស់អាមេរិក មិនថាសម្រាប់បេក្ខជនប្រធានាធិបតីបក្សសាធារណរដ្ឋ លោក ដូណាល់ ត្រាំ ឬបេក្ខជនបក្សប្រជាធិបតេយ្យ លោកស្រី ហ៊ីឡារី គ្លីនតុន ឡើយ។ បក្សសាធារណរដ្ឋបានគ្រប់ព្រឹទ្ធសភាដែលមាន១០០កៅអី ចាប់តាំងពី២០១៥ មកម្លេះ ប៉ុន្តែក្នុងការបោះឆ្នោតលើកនេះ បក្សទាំងពីរហាក់មានការប្រជែងខ្លាំង។
ក្នុងករណីគណបក្សទាំងពីរទទួលបាន៥០កៅអីដូចគ្នានៅព្រឹទ្ធសភានោះ អនុប្រធានាធិបតីថ្មី នឹងជាតួអង្គកាត់សេចក្ដីក្នុងការសម្រេចចិត្តរបស់ព្រឹទ្ធសភាអាមេរិក។ ខណៈការរាប់សន្លឹកឆ្នោតមិនទាន់បញ្ចប់នោះ គេមិនទាន់ដឹងថា បេក្ខជនអនុប្រធានាធិបតីបក្សសាធារណរដ្ឋ Mike Pence ឬបេក្ខជនបក្សប្រជាធិបតេយ្យ Tim Kaine នឹងកាន់តំណែងសំខាន់នេះនៅឡើយទេ៕
Tag:
បោះឆ្នោតអាមេរិក
គណបក្សសាធារណរដ្ឋ
© រក្សាសិទ្ធិដោយ thmeythmey.com