អន្តរជាតិ
នយោបាយអន្តរជាតិ
បក្សកាន់អំណាចតៃវ៉ាន់ ប្រាប់ចិនឲ្យគោរពសិទ្ធិហុងកុង
×
គណបក្សកាន់អំណាចតៃវ៉ាន់ ប្រជាធិបតេយ្យជឿនលឿន (DPP) នៅថ្ងៃទី៩ ខែវិច្ឆិកា បានទទូចឲ្យមេដឹកនាំក្រុងប៉េកាំង ស្ដាប់តាមប្រជាជនក្រុងហុងកុងដែលចង់បានប្រជាធិបតេយ្យ។ បក្សកាន់អំណាចតៃវ៉ាន់ ក៏ទទូចឲ្យក្រុងប៉េកាំងគោរពសិទ្ធិតំណាងរាស្ត្រគាំទ្រឯករាជ្យហុងកុង ក្រោយសភាប្រជាជនចិន ហាមសមាជិកសភាទាំងនោះ ចូលកាន់តំណែងរបស់ខ្លួន។
នារយៈពេលចុងក្រោយនេះ រដ្ឋាភិបាលក្រុងប៉េកាំង បានលូកដៃចូលកាន់តែជ្រៅចូលកិច្ចការរបស់តំបន់ស្វយ័តហុងកុង តាមរយៈការបកប្រែច្បាប់ហុងកុងដែលហាមឃាត់សមាជិកសភាគាំទ្រឯករាជ្យពីការស្បថចូលកាន់តំណែង។ ការលូកដៃកកូរកកាយរបស់ក្រុងប៉េកាំង ក៏បានធ្វើឲ្យកោះតៃវ៉ាន់ឯណោះ ព្រួយបារម្ភ និងបានអំពាវនាវឲ្យរដ្ឋាភិបាលក្រុងប៉េកាំង គោរពសិទ្ធិសម្រេចរបស់ប្រជាជនហុងកុងផងដែរ។
ទីភ្នាក់ងារព័ត៌មាន Reuters ផ្សាយថា ការអំពាវនាវរបស់កោះតៃវ៉ាន់ ធ្វើឡើងបន្ទាប់ពីសភាប្រជាជនចិន បានបកប្រែច្បាប់មូលដ្ឋានដែលជាធម្មនុញ្ញរបស់ហុងកុង ដោយបានរារាំងសមាជិកសភាហុងកុងមាននិន្នាការប្រកាសឯករាជ្យពីររូប មិនឲ្យចូលស្បថកាន់តំណែងបាន។ ការរារាំងនេះ គឺជាការអន្តរាគមន៍ដោយផ្ទាល់ក្នុងកិច្ចការហុងកុង ចាប់តាំងពីចិនបានស្វ័យភាពដល់ក្រុងមួយនេះក្នុងឆ្នាំ១៩៩៧ ។
លោក Yang Chia-liang អ្នកនាំពាក្យគណបក្សកាន់អំណាច DPP និយាយថា រដ្ឋាភិបាលចិន និងហុងកុង គួរស្ដាប់បំណងប្រាថ្នារបស់ប្រជាជនហុងកុង ដែលចង់បានប្រជាធិបតេយ្យ។ អ្នកនាំពាក្យរូបនេះបន្តថា គណបក្ស DPP និងប្រជាជនតៃវ៉ាន់ តាមដានយ៉ាងយកចិត្តទុកដាក់លើរបៀបដែលក្រុងប៉េកាំងដោះស្រាយជាមួយស្ថានការណ៍នៅហុងកុង ហើយក៏គាំទ្រសិទ្ធិប្រជាជនហុងកុងក្នុងការជ្រើសរើសតំណាងរបស់ខ្លួនដែរ។
ច្បាស់ណាស់ថា ការអធិប្បាយទាក់ទងកិច្ចការហុងកុងរបស់កោះតៃវ៉ាន់ ពិតជាបញ្ឆេះកំហឹងក្រុងប៉េកាំងមិនខាន។ តាំងពីដើមមក ចិនដីគោក មិនដែលទទួលស្គាល់ឯករាជ្យរបស់កោះតៃវ៉ាន់ឡើយ និងតែងតែចាត់ទុកកោះមួយនេះ ជាខេត្តមួយរបស់ខ្លួនរហូតមក។ មិនតែប៉ុណ្ណោះ ក្រុងប៉េកាំង ក៏ធ្លាប់ប្រកាសហើយថា ខ្លួនមិនរួញរាក្នុងការប្រើប្រាស់កម្លាំងយោធា ដើម្បីដណ្ដើមកោះតៃវ៉ាន់មកវិញឡើយ។
សូមបញ្ជាក់ថា ចក្រភពអង់គ្លេស បានប្រគល់ទឹកដីហុងកុងទៅឲ្យចិនវិញ ក្នុងឆ្នាំ១៩៩៧ ។ យ៉ាងណាក្ដី ចិនបានបង្កើតប្រព័ន្ធនយោបាយ «ប្រទេសមួយ ប្រព័ន្ធពីរ» ដើម្បីគ្រប់គ្រងក្រុងហុងកុង។ ពោលគឺហុងកុងទទួលបានស្វ័យភាពយ៉ាងទូលាយ លើកិច្ចការតុលាការ ហិរញ្ញវត្ថុ និងរដ្ឋបាល ហើយចិនទទួលបន្ទុកកិច្ចការយោធា និងការងារការបរទេសជំនួសហុងកុងវិញ៕
Tag:
ចិន
ហុងកុង
តៃវ៉ាន់
© រក្សាសិទ្ធិដោយ thmeythmey.com