អន្តរជាតិ
នយោបាយអន្តរជាតិ
មេដឹកនាំអឺរ៉ុបថា ខ្លួនមិនអាចពឹងលើអាមេរិករហូតឡើយ ក្រោយលោក ត្រាំ ឈ្នះឆ្នោត ប្រធានគណៈកម្មការអឺរ៉ុប Jean-Cluade Juncker (រូបភាព Xinhua)
× ប្រធានគណៈកម្មការអឺរ៉ុប លោក Jean-Claude Juncker លើកឡើងថា អឺរ៉ុបគួរតែបង្កើតទ័ពដោយខ្លួនឯង និងមិនអាចទុកចិត្តការធានាការពារសន្តិសុខពីសំណាក់អាមេរិកឡើយ។ ប្រធានគណៈកម្មាការអឺរ៉ុប លើកឡើងដូចនេះ ក្រោយពេលសេដ្ឋី ដូណាល់ ត្រាំ ឈ្នះឆ្នោតក្លាយជាប្រធានាធិបតីអាមេរិក ហើយលោកក៏មានគោលនយោបាយតឹងតែងចំពោះសម្ព័ន្ធយោធាណាតូ ដែលជាអ្នកការពារសន្តិសុខអឺរ៉ុបដ៏ធំ។
គេប្រហែលជាចាំមិនភ្លេចឡើយគោលនយោបាយការបរទេសរបស់ប្រធានាធិបតីជាប់ឆ្នោតអាមេរិក លោក ដូណាល់ ត្រាំ ចំពោះសម្ព័ន្ធមិត្តរបស់ខ្លួន។ លោក ដូណាល់ ត្រាំ មាននិន្នាការបន្ថយការចំណាយនិងការពារក្រុមប្រទេសណាតូ និងសម្ព័ន្ធមិត្តផ្សេងទៀត។ លោកធ្លាប់អះអាងថា ក្រុមប្រទេសសមាជិកណាតូ ត្រូវបង់វិភាគទានឲ្យគ្រប់គ្រាន់តាមការកំណត់នៅក្នុងសន្ធិសញ្ញា បើសិនជាចង់ឲ្យអាមេរិកការពារពេលមានបញ្ហាសន្តិសុខ។
នៅពេលនេះ មេដឹកនាំអឺរ៉ុប ទំនងជាភ័យព្រួយខ្លាំងហើយជុំវិញសុវត្ថិភាពរបស់អឺរ៉ុប ក្រោយពេលលោក ដូណាល់ ត្រាំ ឈ្នះឆ្នោតប្រធានាធិបតីអាមេរិកក្នុងការបោះឆ្នោតថ្ងៃទី៨ ខែវិច្ឆិកា។ ទាក់ទងបញ្ហានេះ ប្រធានគណៈកម្មការអឺរ៉ុប លោក Jean-Claude Juncker និយាយថា អឺរ៉ុប គួរតែមានកងទ័ពផ្ទាល់ខ្លួន ជាជាងពឹងផ្អែកខ្លាំងលើកម្លាំងអាមេរិក ដែលមិនច្បាស់លាស់នោះ។
ដោយលើកឡើងពីការគំរាមពីសំណាក់ក្រុមភេរវកម្មលើសន្តិសុខអឺរ៉ុប ប្រធានគណៈកម្មការរូបនេះបញ្ជាក់ដែរថា សហភាពអឺរ៉ុប គួរតែផ្ដល់នូវការការពារចាំបាច់ដល់ប្រជាជនរបស់ខ្លួន។ ថ្លែងទៅកាន់កម្មវិធីមួយក្នុងក្រុងបែរឡាំង លោក Juncker បញ្ជាក់ច្បាស់ថា៖ «យើងត្រូវការសន្តិសុខថែមទៀតសម្រាប់អឺរ៉ុប មិនមែនតែការប្រឆាំងភេរវកម្មមួយមុខទេ តែយើងក៏ត្រូវការការរៀបចំកងទ័ពការពារអឺរ៉ុបដែរ»។
«យើងពិតជាត្រូវការកងទ័ពណាស់។ លទ្ធផលនៃការបោះឆ្នោតអាមេរិកបង្ហាញថា អាមេរិក នឹងមិនការពារអឺរ៉ុបរហូតទេ។ យើងត្រូវធ្វើដោយខ្លួនឯង។ ដូច្នេះនេះជាអ្វីដែលយើងត្រូវការដំណោះស្រាយថ្មី ដើម្បីការពារសន្តិសុខអឺរ៉ុប ដោយរួមទាំងការបង្កើតកងទ័ពអឺរ៉ុបដែរ»។ នេះជាការលើកឡើងរបស់ប្រធានគណៈកម្មការអឺរ៉ុប ដែលចេញផ្សាយដោយសារព័ត៌មានរុស្សី RT ជុំវិញការទទួលជ័យជម្នះរបស់លោក ត្រាំ និងគំនិតនៃការបង្កើតទ័ពអឺរ៉ុប។
ខណៈនេះ ការប្រឈមមុខជាមួយរុស្សី កាន់តែឡើងកម្ដៅនោះ សហភាពអឺរ៉ុប បានបញ្ជូនកងកម្លាំងជាច្រើនទៅកាន់ព្រំដែនជាមួយរុស្សី។ ហើយកងទ័ពអាមេរិក ដែលជាស្នូលសំខាន់នៃសម្ព័ន្ធយោធាណាតូ គឺជាកម្លាំងសំខាន់នៃការពង្រាយយោធា ដើម្បីទបទល់កងកម្លាំងជាងបីសែននាក់របស់រុស្សី។ យ៉ាងណាក្ដី ការជាប់ឆ្នោតរបស់លោក ដូណាល់ ត្រាំ បង្កើតជាកង្វល់ជុំវិញវត្តមានរបស់កងទ័ពអាមេរិកនៅអឺរ៉ុប ដ្បិតលោក ត្រាំ ចង់ឲ្យអឺរ៉ុបបង្កើនប្រាក់ឧបត្ថម្ភដល់ណាតូនោះ៕
© រក្សាសិទ្ធិដោយ thmeythmey.com