អន្តរជាតិ
នយោបាយអន្តរជាតិ
ដល់ពេលអឺរ៉ុបម្ចាស់ការខ្លួនឯង ពេលលោក ដូណាល់ ត្រាំ ដឹកនាំអាមេរិក
× សេដ្ឋីអចលនទ្រព្យ ដូណាល់ ត្រាំ នឹងក្លាយជាប្រធានាធិបតីទី៤៥ របស់អាមេរិក ចាប់ពីថ្ងៃទី២០ ខែមករា ឆ្នាំ២០១៧ ប្រសិនបើគ្មានអ្វីប្រែប្រួលនៅក្នុងការសម្រេចចុងក្រោយរបស់ប្រតិភូតំណាងដែលនឹងបោះឆ្នោតនៅថ្ងៃទី១៩ ខែធ្នូ ឆ្នាំ២០១៦ ។ មនុស្សមិនតិចទេភ្ញាក់ផ្អើលជ័យជម្នះរបស់លោក ត្រាំ ហើយក៏មានមនុស្សមិនតិចដែរ មិនពេញចិត្តគោលនយោបាយចម្រូងចម្រាសរបស់លោក។ សហភាពអឺរ៉ុប ដែលជាសម្ព័ន្ធមិត្តចាក់ទឹកមិនលិចរបស់អាមេរិក ដូចជាជ្រួលច្របល់ជាងគេ។ ហេតុអ្វីបានជាអឺរ៉ុបត្រូវបារម្ភចំពោះរឿងនេះ?
លទ្ធផលបោះឆ្នោតបង្ហាញថា លោក ដូណាល់ ត្រាំ ដែលគ្មានជំនាញនយោបាយ ចេះតែក្បួនរកស៊ី បានផ្ដួលលោកស្រី ហ៊ីឡារី គ្លីនតុន ដែលជោគជាំដោយបទពិសោធន៍នយោបាយគួរឲ្យភ្ញាក់ផ្អើល។ ជ័យជម្នះរបស់លោក ត្រាំ លើកឡើងជាសំណួរជាច្រើនពាក់ព័ន្ធគោលនយោបាយរបស់លោក ជាពិសេសជាមួយសម្ព័ន្ធមិត្តនៅអឺរ៉ុបតែម្ដង។ លោកចង់ឲ្យប្រទេសអឺរ៉ុបគោរពកិច្ចព្រមព្រៀង ដោយបង់ថ្លៃពីរភាគរយនៃ GDP សម្រាប់ណាតូ ដែលរឿងហើយធ្វើឲ្យបណ្ដាមេដឹកនាំអឺរ៉ុបជ្រួលច្រាល់ខ្លាំង។
តំបន់អឺរ៉ុប កំពុងប្រឈមមុខនឹងការវាតទីរបស់រុស្សី ហើយវត្តមានពេញលេញនៃកម្លាំងអាមេរិក ដែលជាស្នូលនៃសម្ព័ន្ធយោធាណាតូ ពិតជាដើរតួសំខាន់ណាស់។ ប្រទេសអឺរ៉ុបតែឯងមិនអាចទប់ទល់នឹងកម្លាំងរុស្សីបានឡើយ តែអឺរ៉ុបទាំងមូលរួមបញ្ចូលកម្លាំងយោធាអាមេរិកទៀតនោះ ពិតជាអាចថ្លឹងថ្លែងនឹងអំណាចយោធារបស់រុស្សីបាន។ យ៉ាងណាក្ដី លោក ដូណាល់ ត្រាំ មានជំហរងាកទៅពង្រឹងសម្ព័ន្ធភាពរឹងមាំជាមួយរុស្សី ដែលអាចធ្វើឲ្យអាមេរិកដកឃ្លាពីអឺរ៉ុបបាន។
បន្ទាប់ពីដឹងថា លោក ដូណាល់ ត្រាំ ក្លាយជាអ្នកកាច់ចង្កូតនាវាអាមេរិកទៅហើយនោះ គេមិនដឹងនាវាដ៏ធំនេះនឹងតម្រង់ទិសទៅណាច្បាស់ដែរ។ ជាមួយប្រធានាធិបតីថ្មី ដែលទាំងគ្មានបទពិសោធនយោបាយ ទាំងមានអាកប្បកិរិយាមិនសមរម្យ អាមេរិកនឹងឈានចូលដល់ដំណាក់កាលថ្មីមួយ ដែលអាចបង្កើតជាការផ្លាស់ប្ដូរដ៏ធំសម្រាប់បរិបទពិភពលោក។
មិនត្រឹមតែគំរាមដកខ្លួនចេញពីសម្ព័ន្ធយោធាឡើយ សូម្បីតែកិច្ចព្រមព្រៀងពាណិជ្ជកម្មរួមរវាងអាមេរិក និងអឺរ៉ុប ក៏ប្រឈមមុខនឹងហានិភ័យដែរ។ កិច្ចព្រមព្រៀងនេះ ត្រូវរំពឹងថានឹងត្រូវចុះហត្ថលេខានៅឆ្នាំក្រោយនេះ ប៉ុន្តែការជាប់ឆ្នោតរបស់លោក ដូណាល់ ត្រាំ បង្កជាការសង្ស័យថា កិច្ចព្រមព្រៀងនេះអាចនឹងត្រូវចុះហត្ថលេខាតាមការគ្រោងទុក ឬយ៉ាងណានោះឡើយ។
តាមពិតទៅ ការមិនពេញចិត្តលើកិច្ចព្រមព្រៀងភាពជាដៃគូពាណិជ្ជកម្មនិងវិនិយោគអន្តរអាត្លង់ទិករវាងអាមេរិក នឹងអឺរ៉ុប (TTIP) ក៏មិនលេចចេញនារយៈពេលចុងក្រោយនេះដែរ។ សមាជិកអឺរ៉ុបផ្ទាល់ ដូចជាបារាំង និងអាល្លឺម៉ង់ មិនគាំទ្រកិច្ចព្រមព្រៀងនេះឡើយ ជាពិសេសក្នុងកាលៈទេសៈដែលអង់គ្លេសបានបោះឆ្នោតចាកចេញពីសហភាពអឺរ៉ុបទៅទៀត។ ការចាកចេញរបស់ចក្រភពអង់គ្លេស បង្កើតជាភាពមិនច្បាស់លាស់សម្រាប់ទំនាក់ទំនងពាណិជ្ជកម្មរួមគ្នានេះ ដ្បិតលោក ត្រាំ ធ្លាប់អះអាងថា លោកប្រហែលជាចរចាបង្កើតទំនាក់ទំនងពាណិជ្ជកម្មជាមួយអង់គ្លេសវិញ។
តាំងពីដើមមកនោះ ប្រធានាធិបតីជាប់ឆ្នោតរូបនេះ មិនមានជំហរនៅពីក្រោយអឺរ៉ុបឡើយ។ លោកគាំទ្រការចាកចេញរបស់ចក្រភពអង់គ្លេសពីសហភាពអឺរ៉ុប ហើយថែមទាំងអញ្ជើញលោក Nigel Farage ជាអ្នកគាំទ្រការចាកចេញ ឲ្យចូលរួមយុទ្ធនាការរបស់លោកទៅទៀត។ នេះក៏ដោយសារតែលោកមាននិន្នាការគាំពារនិយម ចូលចិត្តនយោបាយបិទទ្វារសេដ្ឋកិច្ចខ្លួនឯង និងអនុវត្តគោលការណ៍ឯករាជ្យផងដែរ។
ទាំងនេះមានន័យថា អឺរ៉ុបមិនស្ថិតក្នុងក្រសែភ្នែកអាមេរិកទៀតឡើយ ហើយយ៉ាងហោចណាស់ក៏ក្នុងរយៈពេលបួនឆ្នាំនៃអាណត្តិដឹកនាំរបស់លោក ដូណាល់ ត្រាំ ដែរ។ ការងាកទៅរឹតចំណងជាមួយរុស្សី នឹងធ្វើឲ្យអាមេរិឃ្លាតឆ្ងាយពីអឺរ៉ុប ហើយបើកិច្ចព្រមព្រៀងពាណិជ្ជកម្មរួមគ្នាត្រូវលុបចោលទៀតនោះ អាមេរិក និងអឺរ៉ុប កាន់តែងាកចេញពីគ្នាទៅដែរ។
ទន្ទឹមគ្នានេះ បណ្ដាមេដឹកនាំអឺរ៉ុបហាក់ដូចជាដឹងហើយថា វាដល់ពេលត្រូវម្ចាស់ការខ្លួនឯង ជាជាងពឹងផ្អែកលើអាមេរិកហើយ។ ការពឹងផ្អែកខ្លាំងលើអាមេរិក ជាពិសេសលើវិស័យយោធាដើម្បីទប់ទល់រុស្សី ធ្វើឲ្យអឺរ៉ុបខ្លួនឯងទន់ដៃជើង និងមិនបានត្រៀមខ្លួនក្នុងករណីអាក្រក់ឡើយ ដ្បិតអឺរ៉ុបមិនដែលគិតថា អាមេរិកដកខ្លួនចេញដោយងាយនោះទេ។ មានមេដឹកនាំអឺរ៉ុបខ្លះថែមទាំងអះអាងថា ជីវិតពេលនេះ នឹងកាន់តែលំបាកហើយ៕
Tag:
អឺរ៉ុប
អាមេរិក
ដូណាល់ ត្រាំ
© រក្សាសិទ្ធិដោយ thmeythmey.com