ជាតិ
ក្រុមហ៊ុន Hodo គ្រោងបើកហាងលក់សំលៀកបំពាក់នៅកម្ពុជា
× ចិន៖ ក្រុមហ៊ុន Hodo ដែលជាក្រុមហ៊ុនវិនិយោគផ្នែកឧស្សាហកម្មដ៏ធំមួយក្នុងទីក្រុងអ៊ូហ្ស៊ី ខេត្តជាំងស៊ូ ប្រទេសចិន គ្រោងបើកលក់សំលៀកបំពាក់ដែលជាផលិតផលពីក្រុមហ៊ុន ដាក់លក់នៅក្នុងទីផ្សារប្រទេសកម្ពុជា។ គួរបញ្ជាក់ថា ក្រុមហ៊ុន Hodo បានចូលមកវិនិយោគអភិវឌ្ឍន៍តំបន់សេដ្ឋកិច្ចពិសេសខេត្តព្រះសីហនុ លើទំហំផ្ទៃដីសរុបចំនួន១១ហិកតា កាលពីឆ្នាំ២០០៨កន្លងមក។
ប្រធានក្រុមប្រឹក្សាភិបាលក្រុមហ៊ុន Hodo លោក Jack Chen បានឲ្យដឹងថា ក្រុមហ៊ុនលោកបានបញ្ជូនអ្នកជំនាញមកសិក្សាពីទីផ្សារនៅក្នុងប្រទេសកម្ពុជាកាលពីថ្ងៃទី១៥ វិច្ឆិកា ដើម្បីសិក្សាគម្រោងបង្កើតហាងលក់សំលៀកបំពាក់នៅកម្ពុជា។ ចំពោះហាងសំលៀកបំពាក់នេះ ត្រូវបានលោក Jack Chen អះអាងថា ក្រុមហ៊ុននឹងនាំយកផលិតផលវាយនភណ្ឌ ដែលជាការរចនាម៉ូត(Brand)ចេញពីក្រុមហ៊ុន Hodo របស់លោកផ្ទាល់តែម្ដង ដើម្បីដាក់លក់ទៅតាមតម្លៃទីផ្សារនៃប្រទេសកម្ពុជា។
ថ្លែងប្រាប់ប្រតិភូអ្នកសារព័ត៌មានកម្ពុជា ដែលបានទស្សនកិច្ចក្នុងក្រុមហ៊ុនHodo នៅប្រទេសចិននោះ ប្រធានក្រុមប្រឹក្សាភិបាលរូបនេះ បានបញ្ជាក់ដូច្នេះថា៖« ក្រុមការងារជំនាញរបស់ក្រុមហ៊ុន Hodo ខាងបើកហាងរបស់យើងខ្ញុំទៅទស្សនកិច្ចប្រទេសកម្ពុជា ដើម្បីសិក្សាពីទីតាំងថា តើយើងគួរជ្រើសរើសទីតាំងនៅកន្លែងណា ។ ហើយចំពោះប្រជាជនកម្ពុជាចូលចិត្តអ្វី ដែលទាំងអស់នេះយើងត្រូវការប្រមូលព័ត៌មានសិន មុននឹងចាប់ផ្ដើមគម្រោងនៅពេលណា ត្រូវការចំណាយដើមទុនប៉ុន្មាន ហើយតើវាអាចនឹងដំណើរការទេ»។
ក្រុមហ៊ុន Hodo ដែលជាក្រុមហ៊ុនវិនិយោគផ្នែកឧស្សាហកម្មដ៏ធំមួយក្នុងទីក្រុងអ៊ូហ្ស៊ី ខេត្តជាំងស៊ូ ប្រទេសចិន បានបង្កើតឡើងកាលពីឆ្នាំ១៩៥៧ ដែលផ្ដោតលើអាជីវកម្មចំនួន៤ ក្នុងនោះរួមមាន ផ្នែកឧស្សាហកម្មសំលៀកបំពាក់៥០ភាគរយ ,ផ្នែកសំបកកង ,សុខាភិបាល(ផលិតថ្នាំពេទ្យ) និងចលនទ្រព្យ។
គួរបញ្ជាក់ថា ក្រុមហ៊ុន Hodo បានចូលមកវិនិយោគអភិវឌ្ឍន៍តំបន់សេដ្ឋកិច្ចពិសេសខេត្តព្រះសីហនុ លើទំហំផ្ទៃដីសរុបចំនួន១១ហិកតា កាលពីឆ្នាំ២០០៨កន្លងមក។ ក្នុងរយៈពេល៨ឆ្នាំមកនេះ ក្រុមហ៊ុនHodo បានអភិវឌ្ឍន៍ឧស្សាហកម្មនៅតំបន់សេដ្ឋកិច្ចពិសេសនេះ លើផ្ទៃដី៥ហិកតាហើយ ដែលមានក្រុមហ៊ុនបានចូលវិនិយោគចំនួន១៣៨ក្រុមហ៊ុន ក្នុងវិស័យឧស្សាហកម្ម លើផ្នែកវាយនភណ្ឌ កាបូបស្បែក ក្ដាបន្ទះ សំបកកង់និងពោះវៀនកង់ជាដើម។ តាមរយៈការវិនិយោគរបស់ក្រុមហ៊ុនទាំងនេះ ក៏បានផ្ដល់ការងារដល់ប្រជាជនជុំវិញតំបន់សេដ្ឋកិច្ចពិសេសជាង៧០ភាគរយផងដែរ៕
Tag:
Hodo
ចិន
កម្ពុជា
© រក្សាសិទ្ធិដោយ thmeythmey.com