ជាតិ
សេដ្ឋកិច្ច
អង្ករថៃជាប់លេខ១ ខណៈអង្ករកម្ពុជាជាប់ក្នុងចំណាត់ថ្នាក់កំពូលទាំង៣ នាសន្និសីទស្រូវអង្ករពិភពលោក រូបភាពពី CRF
× អង្ករផ្ការំដួលរបស់កម្ពុជា មិនបានឈ្នះពានអង្ករល្អបំផុតនោះទេក្នុងឆ្នាំនេះ។ ក្នុងសន្និសីទស្រូវអង្ករពិភពលោកលើកទី៨ ដែលប្រព្រឹត្តទៅថ្ងៃទី១៧-១៨ខែវិច្ឆិកា អង្ករម្ចាស់ផ្ទះថៃ ត្រូវបានជ្រើសរើសជាអង្ករលេខ១ ក្នុងការប្រកួតប្រជែងអង្ករល្អបំផុត។
បើតាមសេចក្ដីប្រកាសរបស់សហព័ន្ធស្រូវអង្ករកម្ពុជា (CRF) អង្ករកម្ពុជាស្ថិតក្នុងចំណាត់ថ្នាក់កំពូលទាំង ៣ ឬ Top Three ដែលជាគូប្រជែងដ៏ស្វិតស្វាញរបស់អង្ករថៃ។
សេចក្ដីប្រកាសដដែលនេះ បានស្រង់សំដី លោក សុខ ពុទ្ធីវុធ ប្រធាន CRF យ៉ាងដូច្នេះថា៖«សណ្ឋានដី ភូមិសាស្ត្រ នៃប្រទេសកម្ពុជា និងថៃ គឺប្រហាក់ប្រហែលគ្នា ដូចនេះគុណភាពអង្ករមិនខុសគ្នានោះទេ»។ ប្រធាន CRF រូបនេះ បន្ថែមទៀតថា អ្វីដែលកម្ពុជាត្រូវគិតគូរ គឺត្រូវគិតពីផែនការឲ្យច្បាស់លាស់ ខណៈបញ្ហាទីផ្សារ និងតម្លៃស្រូវអង្កររបស់កម្ពុជានៅមិនទាន់ដោះស្រាយបាន។
កម្ពុជាធ្លាប់គ្រងដំណែងជើងឯកអង្ករល្អបំផុតបីឆ្នាំជាប់ៗគ្នា គឺចាប់ពីឆ្នាំ២០១២ ដល់ឆ្នាំ២០១៤ ។ នៅឆ្នាំ២០១៧ កម្ពុជានឹងត្រូវធ្វើជាម្ចាស់ផ្ទះសន្និសីទស្រូវអង្ករពិភពលោកនេះ៕
Tag:
អង្ករ
សុខ ពុទ្ធីវុធ
© រក្សាសិទ្ធិដោយ thmeythmey.com