អន្តរជាតិ
ដូណាល់ ត្រាំ ហៅកាសែត CNN, NBC, ABC,… មកស្តីឲ្យដល់ផ្ទះ
× ប្រធានាធិបតីទើបជាប់ឆ្នោត ដូណាល់ ត្រាំ បានកោះហៅសារព័ត៌មានធំៗជាច្រើនរបស់អាមេរិកមកជួបលោកនៅឯ Trump Tower នៅល្ងាចថ្ងៃទី២១ ខែវិច្ឆិកា។ ដំបូងក្រុមអ្នកកាសែតល្បីឈ្មោះទាំងនោះគិតថាលោក ត្រាំ ហៅពួកគេដើម្បីប្រាប់ពីរបៀបធ្វើការរវាងអ្នកកាសែតនិងប្រធានាធិបតីជាប់ឆ្នោតថ្មី។ អ្វីដែលមិននឹកស្មាននោះ អ្នកកាសែតទាំងនោះ បែរជាត្រូវលោក ដូណាល់ ត្រាំ ហៅទៅជម្រះបញ្ជីដែលធ្លាប់រិះគន់លោកទៅវិញ។
បណ្ដាញសារព័ត៌មាននៅអាមេរិក ដើរតួយ៉ាងសំខាន់ក្នុងការបោះឆ្នោតប្រធានាធិបតីនៅដើមខែវិច្ឆិកានេះ។ ប៉ុន្តែពួកគេភាគច្រើនមាននិន្នាការងាកទៅបេក្ខជនបក្សប្រជាធិបតេយ្យ លោកស្រី ហ៊ីឡារី គ្លីនតុន និងជួយឃោសនាឲ្យលោកស្រីទៀតផង។ សារព័ត៌មានធំៗដូចជា CNN, NBC, ABC និងបណ្ដាញសារព័ត៌មានមួយចំនួនទៀត បានរិះគន់វាយប្រហារលោក ត្រាំ យ៉ាងចាស់ដៃ។ តែចុងក្រោយលោកស្រី ហ៊ីឡារី នៅតែចាញ់ឆ្នោតលោក ដូណាល់ ត្រាំ ។
បន្ទាប់ពីជាប់ឆ្នោតជាប្រធានាធិបតីហើយ គឺដល់វេនលោក ដូណាល់ ត្រាំ វាយបកលើក្រុមសារព័ត៌មានទាំងនោះវិញ។ ប្រធានាធិបតីជាប់ឆ្នោតនេះ បានអញ្ជើញក្រុមអ្នកកាសែតធំៗរបស់អាមេរិកទៅ Trump Tower ក្នុងក្រុង New York នៅថ្ងៃទី២១ ខែវិច្ឆិកា ហើយលោកក៏ឆ្លៀតពេលនោះហៅអ្នកកាសែតទាំងនោះជា «មនុស្សកុហក»។ មិនតែប៉ុណ្ណោះ លោកថែមទាំងមិនឲ្យផ្សាយព័ត៌មានទាក់ទងនឹងជំនួបលើកនេះទៀតផង។
បើតាមសារព័ត៌មាន The Independent តំណាងមកពី CNN, NBC, ABC និងសារព័ត៌មានធំៗខ្លះទៀត ដែលប្រមូលផ្ដុំគ្នានៅ Trump Tower រំពឹងនឹងបានរៀនសូត្រពីរបៀបធ្វើការ របស់លោក ត្រាំ ជាមួយអ្នកកាសែតពេលលោកចូលកាន់តំណែង។ ផ្ទុយទៅវិញ ពួកគេបែរជាត្រូវលោក ត្រាំ ព្រលះធ្ងន់ៗលើសកម្មភាពអំឡុងយុទ្ធនាការស្វែងរកសំឡេងឆ្នោត ដែលពួកគេវាយប្រហារខ្លាំងលើគោលនយោបាយ និងអាកប្បកិរិយាបុគ្គលរបស់លោក។
ប្រភពពីអ្នកដែលចូលរួមកិច្ចប្រជុំនោះបង្ហើបថា ប្រធានាធិបតីជាប់ឆ្នោត រិះគន់សារព័ត៌មាន CNN មុនគេ។ លោកប្រាប់ប្រធានក្រុមហ៊ុន CNN លោក Jeff Zucker ថា លោកស្អប់ CNN ណាស់ ហើយអ្នកគ្រប់គ្នាធ្វើការនៅ CNN គឺជាមនុស្សកុហក។ ប៉ុន្តែគេមិនបានដឹងថា សេដ្ឋីអចលនទ្រព្យរូបនេះ ប្រើសម្ដីយ៉ាងម៉េចទៀតជាមួយតំណាងសារព័ត៌មានធំៗដទៃទៀតដែលលោកហៅទៅជួបដែរ។
ទំនាក់ទំនងរវាងប្រធានាធិបតីជាប់ឆ្នោត ដូណាល់ ត្រាំ និងក្រុមសារព័ត៌មានភាគច្រើននៅអាមេរិក មិនល្អឡើយ។ លោកចាត់ទុកសារព័ត៌មានទាំងនោះថា ផ្សាយព័ត៌មានលម្អៀង មិនស្មោះត្រង់ និងតែងសរសេរវាយប្រហារលើរូបលោក។ ដោយសារហេតុនេះ ទើបលោកនិយមប្រើបណ្ដាញសង្គម Twitter សម្រាប់បញ្ចេញព័ត៌មានទាំងឡាយ ជំនួសឲ្យការផ្សាយលើទំព័រកាសែត។ ពេលខ្លះទៀត លោក ដូណាល់ ត្រាំ គំរាមប្ដឹងសារព័ត៌មានទាំងនោះផងដែរ។ ជាក់ស្ដែង លោកគំរាមប្ដឹងកាសែត The Times ដែលចុះផ្សាយព័ត៌មានថា លោកបំពានលើរាងកាយស្ត្រីម្នាក់ទៀតផង៕
Tag:
អាមេរិក
ដូណាល់ ត្រាំ
© រក្សាសិទ្ធិដោយ thmeythmey.com