ជាតិ
អាជ្ញាធរអប្សរានឹងសង់ស្ពានឆ្លងថ្មីជំនួសមុនការដ្ឋានជួសជុលស្ពានហាល ប្លង់ស្ពានថ្មី។ រូបថត អាជ្ញាធរអប្សរា
× សៀមរាប៖ ការដ្ឋានជួសជុលស្ពានហាលប្រាសាទអង្គរវត្តដំណាក់កាលទីពីរ នឹងចាប់ផ្តើមដំណើរការក្នុងពេលដ៏ឆាប់ខាងមុខនេះ។ ការដ្ឋាននេះ តម្រូវឲ្យបិទចរាចរណ៍ទាំងស្រុងនៅលើស្ពានហាល (ផ្លូវចូលខាងមុខអង្គរវត្ត) ដែលកន្លងមកភ្ញៀវទេសចរជាតិ និងអន្តរជាតិ តែងឆ្លងកាត់ដើម្បីចូលទស្សនាប្រាសាទងអង្គរវត្ត។ ដើម្បីសម្រួលចរាចរណ៍ទាំងនេះ អាជ្ញាធរជាតិអប្សរា នឹងសង់ស្ពានជ័របណ្តែតទឹកមួយបណ្តោះអាសន្ន ដែលនឹងដំណើរនៅចុងខែវិច្ឆិកាខាងមុខនេះ។
អាជ្ញាធរជាតិអប្សរា តាមរយៈសេចក្តីជូនដំណឹងចុះផ្សាយនៅថ្ងៃទី២៣ វិច្ឆិកា ឆ្នាំ២០១៦ បានធ្វើការជម្រាបជូនដល់ភ្ញៀវទេសចរជាតិ អន្តរជាតិ និងសាធារណជនទាំងអស់ អំពីការងារសាងសង់ស្ពានបណ្តែតទឹក ដើម្បីជំនួសស្ពានហាល ដែលនឹងត្រូវជួសជុលនាពេលខាងមុខ។ ក្នុងសេចក្តីជូនដំណឹងនោះបានបញ្ជាក់ថា ការជួសជុលនឹងតម្រូវឲ្យបិទចរាចរណ៍ទាំងស្រុង ដើម្បីទុកលទ្ធភាពឲ្យក្រុមការងារអនុវត្តការជួសជុលស្ពានហាលឲ្យបានល្អប្រសើរ។
ដើម្បីសម្រួលចរាចរណ៍ខាងលើឲ្យមានសុវត្ថិភាព និងបញ្ចៀសនូវរាល់ហានិភ័យផ្សេងៗ អាជ្ញាធរជាតិអប្សរា នឹងរៀបចំសាងសង់ស្ពានបណ្តែតទឹកបណ្តោះអាសន្ន ដែលមានទីតាំងនៅខាងត្បូងស្ពានហាល។ ការសាងសង់ស្ពានបណ្តែតទឹកនេះ នឹងចាប់ផ្តើមដំណើរការនៅចុងខែវិច្ឆិកា ឆ្នាំ២០១៦ រហូតដល់ចុងខែឧសភា ឆ្នាំ២០១៧៕
Tag:
ស្ពានហាលអង្គរវត្ត
អង្គរវត្ត
© រក្សាសិទ្ធិដោយ thmeythmey.com