ជាតិ
គ.ជ.ប សម្រេចបន្ថែមរយៈពេលចុះឈ្មោះបោះឆ្នោត តែ១ថ្ងៃប៉ុណ្ណោះ
×
ភ្នំពេញ៖ គណៈកម្មាធិការជាតិរៀបចំការបោះឆ្នោត (គ.ជ.ប) បានសម្រេចបន្ថែមរយៈពេលចុះឈ្មោះបោះឆ្នោត ចំនួន១ថ្ងៃទៀត។ នេះជាការជូនដំណឹងរបស់គ.ជ.ប នៅមុននេះបន្តិច។
សេចក្តីជូនដំណឹងនោះបានសរសេរថា៖«គ.ជ.ប ពន្យារពេលចុះឈ្មោះបោះឆ្នោត ចំនួន១ថ្ងៃទៀតនៅគ្រប់ឃុំ-សង្កាត់។ ការចុះឈ្មោះបោះឆ្នោត នឹងត្រូវបិទបញ្ចប់ត្រឹមម៉ោង ៥និង៣០នាទីល្ងាច នាថ្ងៃពុធ ទី៣០ ខែវិច្ឆិកា ឆ្នាំ២០១៦»។
ការសម្រេចខាងលើ ធ្វើឡើងក្នុងកិច្ចប្រជុំរបស់គ.ជ.ប នៅព្រឹកថ្ងៃទី២៩ ខែវិច្ឆិកា ឆ្នាំ២០១៦នេះ។ ការបន្ថែមរយៈពេលនៃការចុះឈ្មោះបោះឆ្នោត គឺជាសំណើរបស់គណបក្សសង្គ្រោះជាតិ រួមទាំងក្រុមសង្គមស៊ីវិលមួយចំនួន។ តាមពិតទៅ គណបក្សសង្គ្រោះជាតិ បានស្នើឲ្យគ.ជ.ប បន្ថែមរយៈពេលនៃការចុះឈ្មោះបោះឆ្នោត ចំនួន៣ថ្ងៃឯណោះ។ តែទីបំផុត គ.ជ.ប បានបន្ថែមតែមួយថ្ងៃប៉ុណ្ណោះ។
យ៉ាងណា សារព័ត៌មានថ្មីៗ មិនទាន់អាចទាក់ទងអ្នកនាំពាក្យរបស់គណបក្សសង្គ្រោះជាតិ ដើម្បីសុំអត្ថាធិប្បាយបន្ថែមបានទេ ជុំវិញបញ្ហានេះ។
មូលហេតុដែល គណបក្សសង្គ្រោះជាតិ ស្នើឲ្យគ.ជ.ប បន្ថែមរយៈពេលសម្រាប់ការចុះឈ្មោះបោះឆ្នោត ចំនួន៣ថ្ងៃទៀត គឺដោយសារតែបក្សប្រឆាំងមួយនេះ យល់ថាប្រជាពលរដ្ឋជាច្រើននៅមិនទាន់ទៅចុះឈ្មោះបោះឆ្នោត។
បើគិតពីថ្ងៃទី១ ខែកញ្ញា ដល់ថ្ងៃទី២៩ ខែវិច្ឆិកានេះ ប្រជាពលរដ្ឋជាង ៧លាន ៧សែននាក់ហើយ បានទៅចុះឈ្មោះបោះឆ្នោត។ ដោយឡែក ប្រជាពលរដ្ឋជិត២លាននាក់ទៀត នៅមិនទាន់ទៅចុះឈ្មោះបោះឆ្នោតនៅឡើយទេ ខណៈការចុះឈ្មោះបោះឆ្នោត នឹងត្រូវបិទបញ្ចប់នៅម៉ោង៥រសៀល ថ្ងៃអង្គារនេះឯង៕
© រក្សាសិទ្ធិដោយ thmeythmey.com