ជាតិ
នយោបាយជាតិ
ទោះមានជំហរស្របសម្ដេច ហ៊ុន សែន តែឯ.ឧ សម រង្ស៊ី មិនគាំទ្រឲ្យកែរដ្ឋធម្មនុញ្ញឡើយ
× ភ្នំពេញ៖ បើទោះជាមេដឹកនាំគណបក្សប្រឆាំង ឯកឧត្តម សម រង្ស៊ី បានបង្ហាញជំហរស្របគ្នានឹងសម្តេច ហ៊ុន សែន ក្នុងការស្នើរដ្ឋាភិបាលបារាំង ឲ្យជួយផ្ដល់ជំនួយបច្ចេកទេសក្នុងការរៀបចំខ្នាតផែនទីប្រទេសកម្ពុជាសម្រាប់យកទៅដោះស្រាយបញ្ហាព្រំដែនជាមួយប្រទេសវៀតណាមក្តី តែឯកឧត្តម សម រង្ស៊ី មិនគាំទ្រឲ្យកែរដ្ឋធម្មនុញ្ញឡើយ។
ឆ្លើយតបនឹងសំណួររបស់អ្នកគាំទ្រខ្លួន ដែលបានចោទសួរអំពីគោលជំហរ ដែលគាំទ្ររដ្ឋាភិបាលក្នុងការកែប្រែផែនទីនោះ ប្រធានគណបក្សសង្គ្រោះជាតិ ឯកឧត្តម សម រង្ស៊ី បានបកស្រាយដោយអះអាងថា ការពង្រីកផែនទីពីខ្នាត១លើ១០០ពាន់(១/១០០០០០) ទៅខ្នាត១លើ៥០ពាន់ (១/៥០០០០) វិញ មានលក្ខណៈមូលដ្ឋានច្បាស់លាស់សម្រាប់ដោះស្រាយបញ្ហាព្រំដែនកម្ពុជា-វៀតណាម។ បន្ថែមពីលើការពន្យល់នេះឯកឧត្តម សម រង្ស៊ី ដែលហាក់មានជំហគាំទ្រសម្ដេច ហ៊ុន សែន បានបញ្ជាក់ថា ក្នុងការផ្ទេខ្នាតផែនទីនេះ មិនចាំបាច់ត្រូវកែប្រែរដ្ឋធម្មនុញ្ញឡើយ។
ប្រធានគណបក្សប្រឆាំង ដែលត្រូវបានរាជរដ្ឋាភិបាលហាមមិនឲ្យចូលស្រុក បានសរសេរលើហ្វេសប៊ុករបស់ខ្លួន ឆ្លើយតបនឹងម្ចាស់គណនីហ្វេសប៊ុកម្នាក់ឈ្មោះ Dara In យ៉ាងដូច្នេះថា៖«ការពង្រីកខ្នាតផែនទីពី ១/១០០.០០០ (គឺ ១ សង់ទីម៉ែត្រ លើផែនទីក្រដាស ស្មើនឹង ១ គីឡូម៉ែត្រ លើផែនដីជាក់ស្តែង) ទៅជា ១/៥០.០០០ (គឺ ២ សង់ទីម៉ែត្រ លើផែនទីក្រដាស ស្មើនឹង ១ គីឡូម៉ែត្រដដែល លើផែនដីជាក់ស្តែង) មានន័យថា ផែនទី ១/៥០.០០០ លម្អិតជាង ២ ដង ហើយក៏ច្បាស់ជាង ២ ដង ប្រៀបធៀបទៅនឹងផែនទី ១/១០០.០០០ ដោយគ្មានប្រែប្រួលអ្វីដែលជាលក្ខណៈមូលដ្ឋានឡើយ។ ដូច្នេះ មិនចាំបាច់កែរដ្ឋធម្មនុញ្ញទេ ចំពោះការពង្រីកផែនទីនេះតែប៉ុណ្ណោះ»។
មាត្រា ២ នៃរដ្ឋធម្មនុញ្ញកម្ពុជា បានចែងថា បូរណភាពទឹកដីរបស់ព្រះរាជាណាចក្រកម្ពុជា មិនអាច រំលោភបាន ដាច់ខាតក្នុងព្រំដែនរបស់ខ្លួនដែលមានកំណត់ក្នុងផែនទីខ្នាត ១/១០០,០០០ ធ្វើនៅចន្លោះ ឆ្នាំ១៩៣៣ និងឆ្នាំ១៩៥៣ ហើយដែលត្រូវបានទទួលស្គាល់ជាអន្តរជាតិនៅចន្លោះឆ្នាំ១៩៦៣ និងឆ្នាំ១៩៦៩។
កន្លងទៅពេលថ្មីៗនេះ សម្ដេចនាយករដ្ឋមន្ត្រី ហ៊ុន សែន បានបង្គាប់ឲ្យលោក ឡុង វីសាឡូ រដ្ឋលេខាធិការក្រសួង ការបរទេសកម្ពុជា ព្រាងឯកសារច្បាប់ជាមួយភាគីវៀតណាម ដើម្បីរៀបចំលិខិតស្នាមផ្លូវកាស្នើទៅបារាំងស្នើសុំ ជំនួយបច្ចេកទេសមកជួយរៀបចំផែនទីផ្ទេរពីខ្នាត១លើ១០០ពាន់ មកខ្នាត១លើ៥០ពាន់វិញ។ សម្តេចបានចេញការណែនាំដូច្នេះនៅក្នុងជំនួបពិភាក្សាទ្វេភាគីជាមួយនាយករដ្ឋមន្ត្រីវៀតណាម លោក ង្វៀន សួនហ្វ៊ុក នៅ ខេត្តសៀមរាប កាលពីថ្ងៃទី២៣ វិច្ឆិកា។ ប៉ុន្តែ សម្តេចនាយករដ្ឋមន្ត្រីមិនបានបញ្ជាក់ហេតុផលនៅពីក្រោយគោលបំណងបំលែងផែនទីពីខ្នាត១លើ១០០ពាន់ ដូចមានចែងក្នុងរដ្ឋធម្មនុញ្ញកម្ពុជា ទៅប្រើខ្នាត១លើ ៥០ពាន់វិញទេ៕
Tag:
សម រង្ស៊ី
ហ៊ុន សែន
ផែនទី
ព្រំដែន
© រក្សាសិទ្ធិដោយ thmeythmey.com