អន្តរជាតិ
ជាអំណោយថ្ងៃខួបកំណើត លោក Duterte ហៅស្តេចប្រដាល់ Pacquiao ថា«អនាគតប្រធានាធិបតី»
× លោកប្រធានាធិបតីហ្វីលីពីន Rodrigo Duterte ដែលជាមេដឹកនាំកំពុងតែលេចធ្លាក្នុងតំបន់ខ្លាំងនោះ បានហៅស្តេចប្រដាល់ និងជាសមាជិកព្រឹទ្ធសភាហ្វីលីពីនលោក Manny Pacquiao ថា«អនាគតប្រធានាធិបតី»។
លោកប្រធាធិបតីហ្វីលីពីន Rodrigo Duterte នៅថ្ងៃទី១៧ ធ្នូ ម្សិលមិញ បានចូលរួមពីធីខួបកំណើតអាយុ៣៨របស់ស្តេចប្រដាល់ និងជាសមាជិកព្រឹទ្ធសភា Manny Pacquiao នៅក្នុងក្រុង General Santos នៃប្រទេសហ្វីលីពីន។ ជាអំណោយសម្រាប់ក្នុងថ្ងៃពិសេសនោះ លោក Duterte បាននិយាយជូនពរ និសាទរដល់ លោក Manny Pacquiao យ៉ាងខ្លីថា៖« ខ្ញុំ ត្រូវតែជួបអនាគតប្រធានាធិបតី»។ នេះបើយោងតាមការចុះផ្សាយរបស់សារព័ត៌មានហ្វីលីពីន ABS-CBN។
ទំនងជាលោកប្រធានាធិបតី ពេញចិត្តពេញថ្លើមចំពោះស្តេចប្រដាល់រូបនេះ ក៏ដូចជាដឹងពីមហិច្ឆតារបស់ស្តេចប្រដាល់រូបនេះហើយ បានជាលោក ហ៊ានហៅថា«អនាគតប្រធានាធិបតី»នោះ។ យោងតាមភា្នក់ងារព័ត៌មាន AFP នៅឆ្នាំ២០១៣ Manny Pacquiao ធ្លាប់និយាយថា តំណែងប្រធានាធិបតី ក៏ស្ថិតនៅក្នុងមហិច្ឆតារបស់លោកដែរ។ ស្តេចប្រដាល់រូបនេះ បានជាប់ជាសមាជិកព្រឹទ្ធសភាហ្វីលីពីនតាមរយៈការបោះឆ្នោតសកល ក្នុងពេលដែល លោក Duterte ប្រជែងតំណែងប្រធានាធិបតីផងដែរ។
ថ្មីៗនេះ លោក Manny Pacquiao ទើបតែបានបញ្ចប់ដំណើរទស្សនកិច្ចមកកាន់កម្ពុជា ដោយលោក បានអមដំណើរជាមួយនឹងលោកប្រធានាធិបតី Duterte ផងដែរ៕
© រក្សាសិទ្ធិដោយ thmeythmey.com