លោក ម៉ម ប៊ុនហេង ប្រាប់សភាថា ក្រសួងសុខាភិបាលធ្វើការស្របតាមច្បាប់ទាំងអស់

ជាតិ

លោក ម៉ម ប៊ុនហេង ប្រាប់សភាថា ក្រសួងសុខាភិបាលធ្វើការស្របតាមច្បាប់ទាំងអស់

29, Dec 2016 , 10:40 am

រូបភាព

ដោយ:

ភ្នំពេញ៖ លោក ម៉ម ប៊ុនហេង រដ្ឋមន្ត្រីក្រសួងសុខាភិបាល បានឆ្លើយប្រាប់សភាថា ការអភិវឌ្ឍន៍វិស័យសុខាភិបាល និងគម្រោងនានា គឺស្របតាមច្បាប់នីតិវិធីរបស់ក្រសួង និងការអភិវឌ្ឍរបស់សាលារាជធានីភ្នំពេញ។

លោក រដ្ឋមន្ត្រីក្រសួងសុខាភិបាល បានទៅឆ្លើយបំភ្លឺនៅរដ្ឋសភា តាមការសាកសួរពីសមាជិកសភាបក្សសង្គ្រោះជាតិព្រឹកថ្ងៃទី២៩ ខែធ្នូនេះ។

លោក ម៉ម ប៊ុនហេង បានអានចម្លើយចំនួន៩ទំព័រ ដែលត្រូវបានរៀបចំដើម្បីឆ្លើយសំណួររបស់តំណាងរាស្ត្រគណបក្សសង្គ្រោះជាតិ។ បើតាមចម្លើយរបស់លោក ម៉ម ប៊ុនហេង ទាក់ទងនឹងការប្រើប្រាស់ជំនួយក្នុងការទិញមុងការបារជំងឺគ្រុនចាញ់គម្រោងមូលនិធិសកល(Global Fund) ក្រសួងបានពុំមានកាតព្វកិច្ចដោះស្រាយជាមួយ Global Fund នោះទេ នេះជាសមត្ថកិច្ចផ្តាច់មុខរបស់អង្គភាពប្រឆាំងអំពើពុករលួយ ដែលបានធ្វើការជាមួយមូលនិធិសកល ក្នុងការស៊ើបអង្កេតករណីនេះ។

ទាក់ទងនឹងការដោះដូរមន្ទីរពេទ្យ លោក ម៉ម ប៊ុនហេង បានបញ្ជាក់ថា ក្រសួងបានអនុវត្តន៍ដោយតម្លាភាព តាមនីតិវិធីរបស់រដ្ឋ ដោយមានការចូលរួមរបស់គណៈកម្មការអន្តរក្រសួង។ លោក ម៉ម ប៊ុនហេង បានស្នើឲ្យប្តឹងទៅ អង្គភាព ប្រឆាំងអំពើពុករលួយ ក្នុងករណីរកឃើញថាមានការដោះដូរ ឃុបឃិត ឬអំពើពុករលួយ។ ករណីផ្សេងៗទៀត លោករដ្ឋមន្ត្រីក៏អះអាងដូចគ្នាថា ក្រសួងធ្វើទៅនីតិច្បាប់ដែលរដ្ឋមាន។

សូមបញ្ជាក់ថា តំណាងរាស្ត្រគណបក្សសង្គ្រោះជាតិបានកោះអញ្ជើញលោក រដ្ឋមន្ត្រីក្រសួងសុខាភិបាល ឲ្យឆ្លើយត្រូវឆ្លើយបំភ្លឺសំណួរចំនួន១០ ដែលរួមមាន ១. ការបាត់ប្រាក់ជំនួយរបស់ Global Fund ការលក់មន្ទីរពេទ្យ និងមន្ទីរពេទ្យបង្អែកមួយចំនួននៅភ្នំពេញ និងបណ្តាខេត្ត និងការទិញគ្រឿងបរិក្ខា និងថ្នាំពេទ្យ ២. ការផ្តល់សេវាសុខាភិបាល ៣. វិធានការក្នុងការពង្រឹងគុណភាពជំនាញ និងក្រមសីលធម៌ពេទ្យ ៤. ការចែកចាយ និងគ្រប់គ្រងសម្ភារពេទ្យ និងថ្នាំពេទ្យ ៥. ការគ្រប់គ្រងមន្ទីរពេទ្យឯកជន និងរថយន្តសង្គ្រោះបន្ទាន់ ៦. និរន្តរភាពមន្ទីរពេទ្យគន្ធបុប្ផា ៧. កិច្ចគាំពារជនរងគ្រោះពីកំហុសគ្រូពេទ្យ និងការកេងប្រវ័ញ្ច ៨. វិធានការរបស់ក្រសួងចំពោះប្រសិទ្ធភាពនៃការផ្តល់សេវាសុខភាពដល់ពលរដ្ឋក្រីក្រ ៩.ការគ្រប់គ្រងការផលិត និងនាំចូលថ្នាំពេទ្យ និង១០.ការគ្រប់គ្រងឱសថស្ថាន ថ្នាំពេទ្យក្លែងក្លាយ និងថ្នាំពេទ្យខូចគុណភាព។