ជាតិ
រថយន្តធុនធំ ត្រូវផ្អាកឆ្លងកាត់ការដ្ឋានផ្លូវជាតិលេខ១ជាបណ្តោះអាសន្ន
× ភ្នំពេញ៖ សាលារាជធានីភ្នំពេញ បានចេញសេចក្ដីជូនដំណឹងស្ដីពីការពង្វាងចរាចរណ៍ ដល់រថយន្តធ្វើដំណើរ និងរថយន្តដឹកទំនិញគ្រប់ប្រភេទ ដែលឆ្លងកាត់តំបន់ការដ្ឋានផ្លូវជាតិលេខ១ ចន្លោះពីស្ពានព្រះមុនីវង្ស ដល់វត្តក្ដីតាកុយ។ ការផ្អាកមិនឲ្យមានចរាចរណ៍នេះ គឺដើម្បីកាត់បន្ថយការកកស្ទះចរាចរណ៍ និងពន្លឿននៃការដ្ឋានសាងសង់ឲ្យឆាប់ចាប់តាមផែនការកំណត់នៅថ្ងៃទី៣១ ខែមីនា ឆ្នាំ២០១៧ខាងមុខនេះ។
យោងតាមសេចក្ដីជូនដំណឹងរបស់រដ្ឋបាលរាជធានីភ្នំពេញ គិតត្រឹមថ្ងៃទី២៦ ខែមករា ឆ្នាំ២០១៧នេះ ដំណើរការនៃការដ្ឋានសាងសង់កំណាត់ផ្លូវជាតិលេខ១ ចាប់ពីគល់ស្ពានព្រះមុនីវង្ស ដល់វត្តក្ដីតាកុយ បានសម្រេចលទ្ធផល ៨០%ហើយ ។ ជាមួយគ្នានេះ ការសម្រេចពង្វាងចរាចរណ៍នេះ ដោយសារតែ ការដ្ឋានសាងសង់បានដំណើរការមកដល់ចំណុចទីប្រជុំជនផ្សារច្បារអំពៅ ដែលជាចំណុចកកស្ទះចរាចរណ៍ខ្លាំង។
ជាការកត់សម្គាល់សាលារាជធានីបានបញ្ជាក់ថា ចំពោះយានយន្តធ្វើដំណើរចូលមករាជធានីភ្នំពេញ តាមដងផ្លូវជាតិលេខ១ ត្រូវពង្វាងតាមផ្លូវក្រវ៉ាត់ក្រុងទី២ពីផ្លូវជាតិលេខ១ ឆ្លងកាត់មុខរោងចក្រថៃហ្គ័រ ឆ្ពោះទៅស្ពានសំរោងតាខ្មៅ។ បន្ថែមលើនេះ ចំពោះយានយន្តធ្វើដំណើរចេញពីរាជធានីភ្នំពេញ តាមដងមហាវិថីព្រះមុនីវង្ស មហាវិថីព្រះនរោត្តម ត្រូវពង្វាងតាមផ្លូវជាតិលេខ២ ចាក់អង្រែឆ្ពោះទៅស្ពានសំរោងតាខ្មៅ រួចធ្វើដំណើរតាមផ្លូវក្រវ៉ាត់ក្រុងទី២ ដោយមិនអនុញ្ញាតឲ្យឆ្លងកាត់ស្ពានព្រះមុនីវង្សថ្មីឡើយ។
សាលារាជធានីភ្នំពេញ ជឿជាក់ថាសាធារណជន ប្រជាពលរដ្ឋ ដែលជាម្ចាស់រថយន្តដឹកទំនិញគ្រប់ប្រភេទ និងម្ចាស់រថយន្តដឹកអ្នកដំណើរទាំងអស់ និងចូលរួមអនុវត្តតាមខ្លឹមសារខាងលើនេះ ចាប់ពីថ្ងៃជូនដំណឹងនេះតទៅ។ ជាពិសេស អាជ្ញាធរគ្រប់លំដាប់ថ្នាក់ ត្រូវចូលរួមសហការអនុវត្តឲ្យបានម៉ឺងម៉ាត់៕
© រក្សាសិទ្ធិដោយ thmeythmey.com