ជាតិ
នយោបាយជាតិ
តុលាការ កោះហៅឯកឧត្តម សម រង្ស៊ី ឲ្យចូលបំភ្លឺនៅថ្ងៃទី១៤ កុម្ភៈ ពីបទបរិហារកេរ្តិ៍សម្តេច ហ៊ុន សែន
× លោក សៀង សុខ តំណាងអយ្យការអមសាលាដំបូងរាជធានីភ្នំពេញ បានចេញដីការកោះហៅ ឯកឧត្តម សម រង្ស៊ី ប្រធានគណបក្សសង្គ្រោះជាតិ ដែលកំពុងនិរទេសខ្លួននៅបរទេស ឲ្យចូលទៅបំភ្លឺ នៅថ្ងៃទី១៤ ខែកុម្ភៈ ជុំវិញបទបរិហារកេរ្តិ៍ជាសាធារណៈ ដែលប្តឹងដោយ សម្តេច ហ៊ុន សែន។
ក្នុងដីការកោះចុះថ្ងៃទី២៥ ខែមករា សរសេរដូច្នេះថា៖«អញ្ជើញឈ្មោះ សម រង្ស៊ី ជាជនសង្ស័យ ឲ្យចូលទៅកាន់អយ្យការអមសាលាដំបូងរាជធានីភ្នំពេញ នៅថ្ងៃទី១៤ ខែកុម្ភៈ នៅម៉ោង៩ព្រឹក ដើម្បីសាកសួរបំភ្លឺ ពីដំណើររឿង ឈ្មោះ គី តិច ជាមេធាវីតំណាងដោយអណត្តិរបស់ សម្តេច ហ៊ុន សែន ប្តឹងពីបទបរិហារកេរ្តិ៍ជាសាធារណៈ កាលពីថ្ងៃទី១៤ ខែមករា ឆ្នាំ២០១៧»។
តាមរយៈបណ្តឹងថ្មីនេះ សម្តេចនាយករដ្ឋមន្ត្រី បានទារសំណងជំងឺចិត្ត ចំនួន១លានដុលា្លរពីប្រធានគណបក្សសង្គ្រោះជាតិ។ បណ្តឹងថ្មីនេះ គឺដោយសារតែឯកឧត្តម សម រង្ស៊ី ចោទ សម្តេច ហ៊ុន សែន ថា បានសូកប្រាក់ចំនួន១លានដុលា្លរ ដល់កញ្ញា ធី សុវណ្ណថា ដែលជាអ្នកគាំទ្រគណបក្សប្រជាជនកម្ពុជា ដើម្បីវាយប្រហារគណបក្សសង្គ្រោះជាតិ។ ព្រោះតែការលើកឡើងបែបនេះ កញ្ញា ធី សុវណ្ណថា ក៏បានប្តឹងឯកឧត្តម សម រង្ស៊ី ពីបទ «បរិហារកេរ្ត៍ជាសាធារណៈ» ដូចគ្នាដែរ ដោយទារសំណងជំងឺចិត្តចំនួន ២សែន ៥ម៉ឺនដុល្លារ។
សូមបញ្ជាក់ថា មកដល់ពេលនេះ ឯកឧត្តម សម រង្ស៊ី កំពុងរួមរឹតដោយបណ្តឹងចំនួន៨ ។ បណ្តឹងខ្លះ បានជម្រះរួចហើយ ដែលអាចឲ្យឯកឧត្តម សម រង្ស៊ី ជាប់ពន្ធនាគារដល់ទៅ៥ ឆ្នាំ និងបង់ប្រាក់ប្រហែល៥ម៉ឺនដុល្លារ។
ពាក់ព័ន្ធនឹងបណ្តឹងបរិហារកេរ្តិ៍ថ្មីនេះដែរ នាកិច្ចប្រជុំពេញអង្គរដ្ឋសភា នៅព្រឹកថ្ងៃទី៣១ ខែមករា សម្តេច ហ៊ុន សែន បានព្រមានបង្កកទ្រព្យសម្បត្តិឯកឧត្តម សម រង្ស៊ី និងព្រលយថាយកទ្រព្យរបស់ប្រធានគណបក្សប្រឆាំងរូបនេះទៅដាក់លក់ឡាយឡុង យកប្រាក់ជំងឺចិត្តសង់ផ្ទះឲ្យជនពិការ៕
Tag:
ហ៊ុន សែន
សម រង្ស៊ី
គី តិច
© រក្សាសិទ្ធិដោយ thmeythmey.com