កីឡាអន្តរជាតិ
អន្តរជាតិ
Frank Lampard ចូលនិវត្តន៍ពីអាជីពជាកីឡាករក្រោយប្រឡូកអស់២១ឆ្នាំ
× Frank Lampard អតីតខ្សែបម្រើជម្រើសជាតិអង់គ្លេស និងក្លិប Chelsea សម្រេចចិត្តចូលនិវត្តន៍ពីអាជីពជាកីឡាករបាល់ទាត់ ដែលខ្លួនបានប្រឡូកនារយៈពេល២១ឆ្នាំកន្លងមកនេះ។ កីឡាកររូបនេះ បានប្រកាសពីការសម្រេចចិត្តរបស់ខ្លួនតាមរយៈបណ្តាញសង្គម កាលពីថ្ងៃទី២ ខែកុម្ភៈ។
«ខ្ញុំទទួលបាននូវការផ្តល់ដ៏រំភើបជាច្រើនដើម្បីឲ្យខ្ញុំបន្តអាជីព ប៉ុន្តែឈានដល់វ័យ៣៨ឆ្នាំ ខ្ញុំមានអារម្មណ៍ថា ពេលនេះ ជាពេលដែលខ្ញុំត្រូវចាប់ផ្តើមទំព័រថ្មីមួយទៀតក្នុងជីវិតរបស់ខ្ញុំ»។ នេះជាការលើកឡើងរបស់ Lampard នៅលើបណ្តាញសង្គម។
Lampard បានចូលលេងចំនួន១០៦ប្រកួតសម្រាប់ក្រុមជម្រើសជាតិអង់គ្លេសចន្លោះពីឆ្នាំ១៩៩៩ ដល់ឆ្នាំ២០១៤ ។ ខ្សែបម្រើរូបនេះ បានប្រឡូកក្នុងក្របខណ្ឌអាជីពចាប់តាំងពីឆ្នាំ១៩៩៦ ដោយចាប់ផ្តើមជាមួយក្លិប West Ham ដែលមានលោក Harry Redknapp ជាគ្រូបង្វឹក និងជាឪពុមមារបស់ខ្លួន។ នាពេលនោះ Lampard ក៏ធ្លាប់លេងជាកីឡាករខ្ចីជើងនៅ Swansea City ផងដែរ។
ពីឆ្នាំ២០០១ ដល់ឆ្នាំ២០១៤ Lampard ជាកីឡាកររបស់ក្លិបតោខៀវ Chelsea ដោយបានបង្ហាញខ្លួនរហូតដល់៦៤៩លើក។ ក្រោយការសម្រេចចូលនិវត្តន៍ពីក្រុមជម្រើសជាតិ Lampard បានបន្តអាជីពរបស់ខ្លួននៅក្លិប Manchester City (២០១៤-២០១៥) និងចុងក្រោយ ក្លិប New York City (២០១៥-២០១៦)។
ក្នុងអាជីពរបស់ខ្លួន Lampard ឈ្នះពានសំខាន់ៗចំនួន១១ ក្នុងនោះ មាន Premier League ៣លើក Champions League នៅឆ្នាំ២០១២ FA Cup ៤លើក League Cup ២លើក និង Europa League ១លើក រួមទាំងពានឯកត្តជនជាច្រើនទៀត។
Lampard ត្រូវបានគ្រូបង្វឹក មិត្តរួមអាជីព និងអ្នកជំនាញបាល់ទាត់វាយតម្លៃថា ជាកីឡាករដ៏គួរឲ្យគោរព និងកោតសរសើរម្នាក់ ជាពិសេសសមិទ្ធផលដ៏ធំធេងបំផុតនៅកីឡដ្ឋាន Stamford Bridge នៃក្លិប Chelsea។
សម្រាប់អនាគតបន្ទាប់ Lampard ទំនងជាប្រឡូកខ្លួនក្នុងអាជីពជាគ្រូបង្វឹក ដោយក្នុងសាររបស់ខ្លួន គេក៏បានថ្លែងអំណរគុណដល់សហព័ន្ធកីឡាបាល់ទាត់អង់គ្លេសផងដែរ ដែលបានផ្តល់ឱកាសដល់រូបគេក្នុងការសិក្សាអាជីពមួយនេះ៕
Tag:
បាល់ទាត់
Frank Lampard
Chelsea
© រក្សាសិទ្ធិដោយ thmeythmey.com