អន្តរជាតិ
ប្រមុខការទូតចិន៖ បើអាមេរិកនិងចិនវាយគ្នា គ្មានអ្នកណាឈ្នះឡើយ
× រដ្ឋមន្ត្រីការបរទេសចិន លោកវ៉ាង យី (Wang Yi) បានប្រាប់អ្នកកាសែតក្នុងទីក្រុងកង់បេរ៉ា ថា នឹងមិនមានអ្នកឈ្នះឡើយក្នុងករណីដែលអាមេរិក និងចិន ធ្លាក់ចូលជម្លោះជាមួយគ្នាដោយចៀសមិនរួចមែននោះ។ រដ្ឋមន្ត្រីការបរទេសចិន ថ្លែងដូចនេះបន្ទាប់ពីជំនួបជាមួយសមភាគីអូស្ត្រាលី Julia Bishop នៅថ្ងៃទី៧ ខែកុម្ភៈ ហើយក៏ចំពេលដែលទំនាក់ទំនងរវាងអាមេរិក និងចិន កំពុងដើរទៅរកស្ថានភាពអាក្រក់ក្រោមអាណត្តិប្រធានាធិបតី ដូណាល់ ត្រាំ ដែលទើបចូលកាន់តំណែង។
«ចិន និងអាមេរិក មិនអាចមានជម្លោះនឹងគ្នាឡើយ ព្រោះភាគីទាំងពីរ នឹងចាញ់ដូចគ្នា ហើយភាគីទាំងពីរ ក៏មិនអាចឈ្លោះគ្នាដែរ។» នេះគឺជាការព្រមានរបស់ប្រមុខការទូតចិន វ៉ាង យី ជុំវិញការធ្លាក់ចុះទំនាក់ទំនងរវាងអាមេរិក និងចិននាពេលចុងក្រោយនេះ ចាប់តាំងពីប្រធានាធិបតី ដូណាល់ ត្រាំ ប្ដូរជំហរនយោបាយការបរទេសដាក់ចិន និងបានចោទប្រកាន់ចិនថា ទម្លាក់តម្លៃប្រាក់យ័ន និងកសាងមូលដ្ឋានយោធានៅសមុទ្រចិនខាងត្បូង។
ឈរអមដោយរដ្ឋមន្ត្រីការបរទេសអូស្ត្រាលី Julia Bishop ប្រមុខការទូតចិនរូបនេះបានប្រាប់អ្នកកាសែតថា ក្រុងប៉េកាំង នៅតែប្ដេជ្ញាចិត្តរក្សាសន្តិភាព និងស្ថិរភាពក្នុងតំបន់ ក៏ដូចជាពិភពលោកដែរ។ ហើយចិន ក៏មិនចង់ដឹកនាំអ្នកណា ឬជំនួសតំណែងមេដឹកនាំពិភពលោកណាអ្វីដែរ។ បើតាមសម្ដីលោក វ៉ាង យី ដែលផ្សាយលើគេហទំព័រក្រសួងការបរទេសចិន ក្រុងប៉េកាំង នៅមិនទាន់តែលើការអភិវឌ្ឍខ្លួនឯងប៉ុណ្ណោះ។
ទីភ្នាក់ងារព័ត៌មាន Reuters ផ្សាយថា ឆ្លៀតពេលនោះ រដ្ឋមន្ត្រីការបរទេសចិន វ៉ាង យី ក៏ឆ្លៀតរិះគន់នយោបាយគាំពារនិយមដែលជាគោលនយោបាយស្នូលរបស់ប្រធានាធិបតី ដូណាល់ ត្រាំ ។ លោកបញ្ជាក់ថា៖ «វាជារឿងសំខាន់ក្នុងការអនុវត្តសេដ្ឋកិច្ចបើកចំហ។ ហើយវាក៏ជារឿងសំខាន់ក្នុងការកាច់ចង្កូតសេដ្ឋកិច្ចសកលភាវូបនីយកម្ម ទៅកាន់ប្រព័ន្ធសេដ្ឋកិច្ចដែលរួមបញ្ចូលប្រទេសទាំងអស់ និងបែងចែកផលប្រយោជន៍ឲ្យមាននិរន្តរ៍ភាពសម្រាប់ពិភពលោក។»
តាមពិតទៅ ទំនាក់ទំនងរវាងក្រុងប៉េកាំង និងក្រុងវ៉ាស៊ីនតោន មកដល់ចំណុចនេះ តាំងតែពីប្រធានាធិបតី ដូណាល់ ត្រាំ និយាយទូរសព្ទជាមួយប្រធានាធិបតីតៃវ៉ាន់ក្នុងខែធ្នូមក។ វាជាលើកដំបូងពេលជាង៤០ឆ្នាំមកនេះ ដែលប្រធានាធិបតីអាមេរិក និយាយទូរសព្ទជាមួយមេដឹកនាំតៃវ៉ាន់ ដែលចិនអះអាងថា គ្មានសិទ្ធិធ្វើនយោបាយឯករាជ្យជាមួយអ្នកណាឡើយ ហើយបានចាត់ទុកជាខេត្តមួយរបស់ខ្លួនតាំងពីដើមរៀងមក។
អ្វីដែលគួរកត់សម្គាល់នោះ លោក ត្រាំ ក៏ប្រុងឈប់អនុវត្តនយោបាយចិនតែមួយ និងបែរជាទាមទារឲ្យចិន ធ្វើសម្បទានខ្លះដូចជាសេដ្ឋកិច្ច និងការដំឡើងតម្លៃប្រាក់យ័នឲ្យខ្ពស់ជាងបច្ចុប្បន្ន។ ដោយសាររឿងនេះ ក្រុងប៉េកាំង ខឹងសម្បារយ៉ាងខ្លាំង និងទាមទារឲ្យរដ្ឋបាលក្រុងវ៉ាស៊ីនតោនថ្មី គោរពជំហរដែលរដ្ឋបាលអាមេរិកចាស់ធ្លាប់អនុវត្តរហូតមក ដើម្បីចៀសវាងការប្រឈមមុខគ្នាទាំងផ្នែកសេដ្ឋកិច្ច និងសន្តិសុខ៕
Tag:
ចិន
អាមេរិក
Wang Yi
អូស្ត្រាលី
© រក្សាសិទ្ធិដោយ thmeythmey.com