អន្តរជាតិ
រុស្ស៊ីសង្ឃឹមថា ភាពតានតឹងរវាងអាមេរិកជាមួយអ៊ីរ៉ង់និងចិន មិនរាលដាលពេញពិភពលោក
× ប្រេសិតរុស្ស៊ីប្រចាំអង្គការសហប្រជាជាតិ លោក Vitaly Churkin បានបង្ហាញក្ដីសង្ឃឹមថា ទំនាស់រវាងរដ្ឋបាលប្រធានាធិបតី ដូណាល់ ត្រាំ ជាមួយអ៊ីរ៉ង់ និងចិន នឹងមិនក្លាយជាបញ្ហាពិភពលោកធ្ងន់ធ្ងរឡើយ។ រយៈពេលចុងក្រោយនេះ លោក ត្រាំ បានប្រើវោហារសាស្ត្រខ្លាំងៗដាក់អ៊ីរ៉ង់ជាពិសេសកិច្ចព្រមព្រៀងនុយក្លេអ៊ែរ ព្រមទាំងបានរិះគន់ចិនរឿងតម្លៃប្រាក់យ័ន និងសកម្មភាពយោធានៅសមុទ្រចិនខាងត្បូង។ ហើយគេព្រួយបារម្ភថា ភាពតានតឹងនេះ អាចរាលដាលពេញខ្លាំងមិនខាន។
តំណាងរុស្ស៊ីប្រចាំអង្គការសហប្រជាជាតិ បានបង្ហាញការព្រួយបារម្ភជុំវិញភាពតានតឹងពាក្យសម្ដីរវាងអាមេរិកជាមួយអ៊ីរ៉ង់ និងចិន នាពេលចុងក្រោយនេះ។ លោក Vitaly Churkin ដែលជាអគ្គរដ្ឋទូតរុស្ស៊ី បានហៅភាពតានតឹងថ្មីៗនេះ ជាការប្រើប្រាស់អារម្មណ៍ឆ្លើយតបនឹងបញ្ហាដែលកើតឡើង។ យ៉ាងណាក្ដី លោកនិយាយការពារអ៊ីរ៉ង់ក្នុងជម្លោះជាមួយអាមេរិក ដោយបានលើកឡើងពីតួនាទីរបស់អ៊ីរ៉ង់ក្នុងការកម្ចាត់ភេរវកម្ម។
ក្នុងកិច្ចសម្ភាសជាមួយសារព័ត៌មាន RT លោក Churkin និយាយការពារអ៊ីរ៉ង់ដែលត្រូវប្រមុខការពារជាតិអាមេរិកចាត់ទុកជារដ្ឋគាំទ្រភេរវកម្ម ថាក្រុងតេហេរ៉ង់ បានដើរតួយ៉ាងសកម្មក្នុងការប្រយុទ្ធប្រឆាំងក្រុមជ្រុលនិយមជាមួយរុស្ស៊ី។ អគ្គរដ្ឋទូតរូបនេះ ក៏បានយល់ស្របដែរថា ក្រុងមូស្គូ និងក្រុងវ៉ាស៊ីនតោន មានជំហរខុសគ្នាលើបញ្ហាជាច្រើន រួមទាំងតូនាទីរបស់អ៊ីរ៉ង់នេះផ្ទាល់។ នេះក៏ព្រោះរុស្ស៊ីមានទំនាក់ទំនងជិតស្និទ្ធជាមួយអ៊ីរ៉ង់ ខណៈដែលអាមេរិកមិនត្រូវគ្នាជាមួយអ៊ីរ៉ង់តែម្ដង។
តាមរយៈកិច្ចសម្ភាសដដែលនោះ អ្នកការទូតរូបនេះ ក៏បានរិះគន់ការប្រើវោហារសាស្ត្ររបស់រដ្ឋបាលក្រុងវ៉ាស៊ីនតោន ដែលលោកគិតថាពឹងផ្អែកតែលើអារម្មណ៍ ជាជាងការប្រើប្រាស់ហេតុផលដើម្បីសម្រេចចិត្ត។ ទំនងជាសំដៅលោកប្រធានាធិបតី ត្រាំ លោក Churkin បន្តថា៖ «លើឆាកអន្តរជាតិ អ្នកត្រូវបែងចែកឲ្យដាច់រវាងអារម្មណ៍, អ្វីដែលអ្នកចង់ឃើញ និងអ្វីដែលអ្នកចង់ឲ្យបានពីប្រទេសមួយផ្សេងទៀត។»
ដោយឡែកលើការសាកល្បងមីស៊ីលបាលីស្ទិករបស់អ៊ីរ៉ង់ លោក Churkin ក៏បានបង្ហាញការងឿងឆ្ងល់ដែលអាមេរិកចាត់ទុកការសាកល្បងនេះជារឿងខុសច្បាប់នោះ។ ប៉ុន្តែលោកមិនគិតថា អ៊ីរ៉ង់បានល្មើសបម្រាមអង្គការសហប្រជាជាតិឡើយ ព្រោះបម្រាមទាំងនោះ ត្រូវបានព្យួរអស់ទៅហើយ។ លោកក៏បានពន្យល់ទៀតថា៖ «អង្គការសហប្រជាជាតិ បានត្រឹមស្នើឲ្យអ៊ីរ៉ង់បញ្ឈប់ការសាកល្បងមីស៊ីលបាលីស្ទិកប៉ុណ្ណោះ មិនមែនហាមឃាត់ឡើយ។»
ដូច្នេះវាមានន័យថា តាមបច្ចេកទេស ឬផ្លូវច្បាប់ អាមេរិកមិនអាចនិយាយថា អ៊ីរ៉ង៉បំពានការហាមឃាត់ឡើយ។ នៅមុននេះ ក្រុងតេហេរ៉ង់បានប្រកាសថា ខ្លួនបានសាកល្បងមីស៊ីលបាលីស្ទិក ហើយអាមេរិកក៏បានចោទប្រកាន់ថា អ៊ីរ៉ង់បានល្មើសកិច្ចព្រមព្រៀងនុយក្លេអ៊ែរជាមួយមហាអំណាចទាំង៦ ក៏ដូចជាបំពានដំណោះស្រាយរបស់ក្រុមប្រឹក្សាសន្តិសុខ។ អាមេរិក ក៏បានដាក់ទណ្ឌកម្មថ្មីៗទៀតលើអ៊ីរ៉ង់ជាការឆ្លើយតបផង៕
Tag:
រុស្ស៊ី
ចិន
អ៊ីរ៉ង់
Vitaly Churkin
© រក្សាសិទ្ធិដោយ thmeythmey.com