មន្ត្រីប្រឆាំងអំពើពុករលួយថៃ អាចស្នើសុំរថយន្តការពារគ្រាប់កាំភ្លើងដើម្បីការពារខ្លួន

អន្តរជាតិ

មន្ត្រីប្រឆាំងអំពើពុករលួយថៃ អាចស្នើសុំរថយន្តការពារគ្រាប់កាំភ្លើងដើម្បីការពារខ្លួន

09, Feb 2017 , 2:03 pm

រូបភាព

ដោយ: តន ចាន់រិទ្ធារ៉ា

គណៈកម្មការប្រឆាំងអំពើពុករលួយជាតិថៃ (NACC) បានចេញបទបញ្ញត្តិថ្មីមួយ ដែលអនុញ្ញាតឲ្យមន្ត្រីប្រឆាំងអំពើពុករលួយថ្នាក់ខេត្ត អាចស្នើសុំរថយន្តធ្វើដំណើរមានសមត្ថភាពការពារគ្រាប់កាំភ្លើងអំឡុងពេលបំពេញការងាររបស់ខ្លួន។ ការផ្ដល់សិទ្ធិស្នើសុំនេះ ធ្វើឡើងដើម្បីការពារមន្ត្រីប្រឆាំងអំពើពុករលួយនៅក្រោម ដែលប្រឈមមុខគ្រោះថ្នាក់ដល់ជីវិតខ្ពស់ពេលអនុវត្តភារកិច្ចរបស់ខ្លួន។

យោងតាមបទបញ្ញត្តិថ្មីរបស់គណៈកម្មការប្រឆាំងអំពើពុករលួយជាតិជាតិ មន្ត្រីប្រឆាំងអំពើពុករលួយថ្នាក់ខេត្តរួមមានប្រធាន និងសមាជិកគណៈកម្មាធិការ អាចស្នើសុំឡានការពារគ្រាប់បាន ប្រសិនបើពួកគេចង់បានការពារពេលធ្វើការងារ។ បញ្ញត្តិដដែលបន្តថា មិនត្រឹមតែមន្ត្រីថ្នាក់ខ្ពស់ទេ សូម្បីតែបុគ្គលិកដែលធ្វើការជាមួយពួកគេ ក៏មានសិទ្ធិស្នើសុំឡានការពារគ្រាប់ដែរ។

បើតាមកាសែតបាងកកប៉ុស្តិ៍ គណៈកម្មាធិការប្រឆាំងអំពើពុករលួយថ្នាក់ខេត្តមានសមាជិកចំនួន៣ ទៅ៥នាក់ ដែលធ្វើឲ្យចំនួនមន្ត្រីប្រឆាំងអំពើពុករលួយថ្នាក់ខេត្តទូទាំងប្រទេសមានប្រហែល៣០០នាក់។ ចំនួននេះមិនទាន់រាប់បញ្ចូលមន្ត្រីធ្វើការនៅតាមអនុគណៈកម្មាធិការដែលសរុបទៅមានដល់ជាង១ពាន់នាក់ឯណោះ។ នេះមានន័យថា បើមន្ត្រីប្រឆាំងអំពើពុករលួយទាំងនេះ ស្នើសុំឡានការពារគ្រាប់ដូចគ្នា រដ្ឋាភិបាលថៃត្រូវចំណាយលុយយ៉ាងច្រើនដើម្បីទិញឡានការពារគ្រាប់ ទុកបម្រើការងារ។

មិនតែប៉ុណ្ណោះ គណៈកម្មការប្រឆាំងអំពើពុករលួយថ្នាក់ជាតិថៃ ក៏ផ្ដល់សិទ្ធិឲ្យស្ថាប័នផ្សេងទៀតដែលធ្វើការជាមួយខ្លួន ស្នើសុំឡានការពារគ្រាប់ដូចគ្នាដែរ។ ប្រភពព័ត៌មានដដែលបន្តថា ស្ថាប័នទាំងនោះ ត្រូវប្រាប់ពីមូលហេតុ និងត្រូវដាក់សំណើសុំឡានតាមរយៈថ្នាក់លើរបស់ពួកគេ។

យ៉ាងណាក្ដី គេមិនទាន់ដឹងថា បទបញ្ញត្តិថ្មីនេះ អាចនឹងត្រូវបានអនុវត្តយ៉ាងណាដែរ ខណៈអនាគតរបស់គណៈកម្មាធិការប្រឆាំងអំពើពុករលួយថ្នាក់ខេត្ត កំពុងស្ថិតក្នុងស្ថានភាពមិនច្បាស់លាស់ ព្រោះក្រុមការងារព្រាងច្បាប់ថ្មី ចង់លុបចោលគណៈកម្មាធិការនេះ។ គណៈកម្មាធិការព្រាងរដ្ឋធម្មនុញ្ញ ចង់ឲ្យ NACC ទទួលខុសត្រូវករណីពុករលួយប្រព្រឹត្តដោយមន្ត្រីជាន់ខ្ពស់ ហើយករណីពុករលួយថ្នាក់ខេត្ត អាចដោះស្រាយដោយស្ថាប័នផ្ទាល់បានហើយ។

ជាការពិត ប្រឆាំងអំពើពុករលួយជារឿងគ្រោះថ្នាក់សម្រាប់មន្ត្រីអនុវត្តច្បាប់ថ្នាក់ក្រោម ព្រោះពួកគេតែងរងការគំរាមពីសំណាក់បុគ្គលមានអំណាច។ ជារឿយៗ ពួកគេប្រឈមមុខការគំរាមសម្លាប់ជីវិត ឬក៏ត្រូវលបវាយប្រហារជាដើម ដូច្នេះហើយបានជាគណៈកម្មការថ្នាក់ជាតិថៃ សម្រេចចេញបញ្ញត្តិថ្មីដើម្បីការពារសុវត្ថិភាពមន្ត្រីខ្លួន។

រយៈពេលចុងក្រោយនេះ របបយោធាថៃ បានបង្កើនការប្រយុទ្ធប្រឆាំងអំពើពុករលួយយ៉ាងខ្លាំង រហូតដល់ពិចារណាអនុវត្តទោសប្រហារជីវិតមន្ត្រីមានកំហុសពុករលួយទៀតផង។ កន្លងមក ទោសធ្ងន់បំផុតនៃករណីពុករលួយ គឺមានត្រឹមជាប់ពន្ធនាគារ និងបង់ប្រាក់ពិន័យប៉ុណ្ណោះ ចំណែកការប្រហារជីវិតវិញ ក៏អនុវត្តលើទោសធ្ងន់ដូចជាជួញដូរគ្រឿងញៀន, រំលោភ និងក្បត់ជាតិជាដើម៕