អន្តរជាតិ
បារាំង៖ ៥នាក់ របួសក្នុងហេតុការណ៍ផ្ទុះក្នុងរោងចក្រថាមពលនុយក្លេអ៊ែរ
× មនុស្សយ៉ាងតិច៥នាក់ បានរងរបួសក្នុងហេតុការណ៍ផ្ទុះក្នុងរោងចក្រនុយក្លេអ៊ែរនៅពាយព្យប្រទេសបារាំង។ ជាសំណាងល្អ មិនមានការលេចធ្លាយសារធាតុនុយក្លេអ៊ែរក្នុងហេតុការណ៍ផ្ទុះនៅថ្ងៃទី៩ ខែកុម្ភៈនេះឡើយ។ នេះបើយោងតាមការផ្សាយរបស់ទីភ្នាក់ងារព័ត៌មាន AFP ។
ហេតុការណ៍ផ្ទុះនេះ បានកើតឡើងនៅឯរោងចក្រថាមពលនុយក្លេអ៊ែរ Flamanville។ មនុស្ស៥នាក់ ត្រូវរាយការណ៍ថា កំពុងទទួលការព្យាបាលដោយសារពួកគេឈ្លក់ផ្សែង ចំណែកមនុស្សស្លាប់ មិនមានសេចក្ដីរាយការណ៍ឡើយ។
បើតាមទីភ្នាក់ងារ AFP រ៉េអាក់ទ័រមួយរបស់រោងចក្រ បានឈប់ដំណើរការជាបណ្ដោះអាសន្ន។ លោក Olivier Marmion បានប្រាប់ AFP ថា ហេតុការណ៍ផ្ទុះនេះ កើតឡើងដោយសារបញ្ហាបច្ចេកទេស និងមិនមែនជាការផ្ទុះចេញពីនុយក្លេអ៊ែរឡើយ ដ្បិតហេតុការណ៍ផ្ទុះនេះ ចេញពីបន្ទប់ម៉ាស៊ីន មិនមែនកើតចេញពីទីតាំងរបស់នុយក្លេអ៊ែរទេ។
រោងចក្រថាមពលនុយក្លេអ៊ែរនៅ Flamanville នេះ ដំណើរការដោយក្រុមហ៊ុន EDF និងមានរ៉េអាក់ទ័រសម្ពាធទឹកចំនួនបី ដោយរ៉េអាក់ទ័រនីមួយៗអាចផលិតថាមពលបាន១.៣ជីហ្កាវ៉ាតអេឡិចទ្រិក (1.3 Gwe)។ ម៉ាស៊ីនរ៉េអាក់ទ័រទី១ និងទី២ ត្រូវបានសាងសង់ក្នុងឆ្នាំ១៩៨៦ និងឆ្នាំ១៩៨៧ បន្តបន្ទាប់គ្នា ចំណែករ៉េអាក់ទ័រទី៣ នឹងត្រូវបញ្ចប់ការសាងសង់ក្នុងឆ្នាំ២០១៨ ៕
© រក្សាសិទ្ធិដោយ thmeythmey.com