ឯកឧត្តម សម រង្ស៊ី ៖ « ការលាលែងរបស់ខ្ញុំនេះ ដើម្បីការពារគណបក្សកុំឲ្យត្រូវគេរំលាយ»

ជាតិ

នយោបាយជាតិ

ឯកឧត្តម សម រង្ស៊ី ៖ « ការលាលែងរបស់ខ្ញុំនេះ ដើម្បីការពារគណបក្សកុំឲ្យត្រូវគេរំលាយ»

12, Feb 2017 , 5:08 pm

រូបភាព

ដោយ: ធឿន បញ្ញាឬទិ្ធ

ភ្នំពេញ៖ កិច្ចប្រជុំនៃគណៈអចិន្ត្រៃយ៍នៃគណបក្សសង្គ្រោះជាតិ សម្រេចទទួលយកនូវពាក្យលាលែងរបស់ឯកឧត្តម សម រង្ស៊ី ពីប្រធាន និងសមាជិកនៃគណបក្សហើយ។ តាមរយៈវីដេអូឃ្លីបមួយក្នុងហ្វេសប៊ុកខ្លួននៅរសៀលថ្ងៃទី១២ កុម្ភៈនេះ ឯកឧត្តម សម រង្ស៊ី បានបញ្ជាក់ថា មូលហេតុដែលលោកលាលែងចេញពីតំណែងប្រធានបក្សនេះ គឺដើម្បីការពារផលប្រយោជន៍គណបក្ស បញ្ចៀសហានិភ័យណាមួយដែលស្ថិតនៅក្នុងគោលបំណងរំលាយគណបក្សខ្លួននេះ។

សូមស្ដាប់សំឡេងលោក សម រង្ស៊ី៖

អ្វីដែលគួរឲ្យកត់សម្គាល់នោះគឺឯកឧត្តម សម រង្ស៊ី បានប្រកាសលាលែងពីប្រធាន និងសមាជិកភាពពីគណបក្ស នៅថ្ងៃទី១១ កុម្ភៈនេះ ស្របពេលដែលដែលសេចក្តីស្នើច្បាប់ ដែលមិនផ្តល់ឱកាសឲ្យទណ្ឌិត មានសិទ្ធិធ្វើជាប្រធានគណបក្សនយោបាយ ត្រូវបានបញ្ជូនទៅកាន់រដ្ឋសភា។

កិច្ចប្រជុំនៃគណៈអចិន្ត្រៃយ៍នៃគណបក្សសង្គ្រោះជាតិបានសម្រេចប្រគល់សិទ្ធិជូនឯកឧត្តម កឹម សុខា អនុប្រធាគណបក្ស ទទួលតួនាទីជាប្រធានស្តីទីដើម្បីដឹកនាំគណបក្សរហូតដល់មានការជ្រើសរើសប្រធានគណបក្សថ្មី។ លោក យឹម សុវណ្ណ អ្នកនាំពាក្យគណបក្សសង្គ្រោះជាតិបានបញ្ជាក់បន្ថែមថា ឯកឧត្តម កឹម សុខា នឹងកាន់តួនាទីជាប្រធានស្តីទីគណបក្សសង្គ្រោះជាតិរហូតដល់ថ្ងៃទី៧ខែមេសាឆ្នាំ២០១៨ ជាពេលវេលាដែលគណបក្សនឹងប្រារព្ធធ្វើសមាជជាផ្លូវការ៕