រដ្ឋាភិបាលបង្កើតការិយាល័យប្រមូល និងទទួលពាក្យបណ្តឹងពលរដ្ឋនៅថ្នាក់មូលដ្ឋាន

ជាតិ

រដ្ឋាភិបាលបង្កើតការិយាល័យប្រមូល និងទទួលពាក្យបណ្តឹងពលរដ្ឋនៅថ្នាក់មូលដ្ឋាន

14, Feb 2017 , 10:19 pm

រូបភាព

ដោយ: ថ្មីៗ

ភ្នំពេញ៖ សម្តេចនាយករដ្ឋមន្ត្រី ហ៊ុន សែន បានសម្រេចបង្កើតការិយាល័យប្រជាពលរដ្ឋនៅរដ្ឋបាលថ្នាក់ក្រោមជាតិ ឲ្យអាជ្ញាធរប្រមូល និងទទួលពាក្យបណ្តឹងពីពលរដ្ឋនានា នៅទូទាំងប្រទេស ដើម្បីពិនិត្យ និងដោះស្រាយជូនពួកគេវិញ។ អនុក្រឹត្យរដ្ឋាភិបាលធ្វើឡើង មុនការបោះឆ្នោតជ្រើសរើស ក្រុមប្រឹក្សាឃុំសង្កាត់ ឆ្នាំ២០១៧ និងតំណាងរាស្ត្រឆ្នាំ២០១៨ ខាងមមុខ។

ប្រមុខរដ្ឋាភិបាល បានចេញអនុក្រឹត្យបង្កើតការិយាល័យ ប្រជាពលរដ្ឋ នៅរដ្ឋបាល ថ្នាក់ក្រោមជាតិ ក្នុងគោលបំណងលើកកម្ពស់អភិបាលកិច្ចល្អ ការផ្តល់សេវា និងការអភិវឌ្ឍសេដ្ឋកិច្ចជូនប្រជាលរដ្ឋ នៅថ្នាក់មូលដ្ឋាន។

តាមអនុក្រឹត្យចុះថ្ងៃទី០៨ ខែកុម្ភៈ ឆ្នាំ២០១៧ ការិយាល័យប្រជាពលរដ្ឋនៅរដ្ឋបាលថ្នាក់ក្រោមជាតិនេះ មានតួនាទីភារកិច្ចប្រមូល និងទទួលពាក្យបណ្តឹងនានានៅក្នុងដែនសមត្ថកិច្ចរបស់ខ្លួន ឬបញ្ជូនពាក្យបណ្តឹង ទាំងឡាយដែលមិនស្ថិតនៅក្នុងសមត្ថកិច្ចរបស់ខ្លួន ទៅស្ថាប័នមានសមត្ថកិច្ចពាក់ព័ន្ធ ដើម្បី ពិនិត្យតាមដាន និងដោះស្រាយ ឬផ្តល់ព័ត៌មានដល់ម្ចាស់ពាក្យបណ្តឹង។ នេះបើតាមទីភ្នាក់ងារសារព័ត៌មានកម្ពុជា។

បន្ថែមលើសពីនេះ អនុក្រឹត្យបង្គាប់មន្ត្រីការិយាល័យនេះ ត្រូវផ្តល់ព័ត៌មានអំពីលទ្ធផលដោះស្រាយបណ្តឹង និងផ្សព្វផ្សាយឲ្យទូលំទូលាយ អំពីយន្តការសម្រុះសម្រួលដោះស្រាយ បណ្តឹងរដ្ឋបាលត្រឡប់ដល់ប្រជាពលរដ្ឋនៅក្នុងដែនសមត្ថកិច្ចខ្លួនជាប្រចាំ។ ការិយាល័យប្រជាពលរដ្ឋរាជធានី ខេត្ត ចែកចេញជាពីរផ្នែក រួមមាន ផ្នែកទទួលពាក្យបណ្តឹង និងកិច្ចការរដ្ឋបាល និងផ្នែកច្បាប់និងស៊ើបអង្កេត៕