ការបង្ក្រាបបទល្មើសអាជីវកម្មផ្លូវភេទ និងពលករចំណាកស្រុកថយចុះប្រមាណ ៤០ភាគរយ

ជាតិ

ការបង្ក្រាបបទល្មើសអាជីវកម្មផ្លូវភេទ និងពលករចំណាកស្រុកថយចុះប្រមាណ ៤០ភាគរយ

15, Feb 2017 , 11:04 am

រូបភាព

ដោយ: ថ្មីៗ

ភ្នំពេញ៖ អគ្គស្នងការនគរបាលជាតិ លោក នេត សាវឿន ថ្លែងផ្អែកតាមលទ្ធផលបង្ក្រាបថា បទល្មើសអាជីវកម្មផ្លូវភេទបានថយចុះចំនួន ១៨ករណី ស្មើនឹង ១៩,១៤៨ភាគរយ និងពលករចំណាកស្រុកថយចុះចំនួន ១៣២.៣១២នាក់ ស្មើនឹង ២៩,៣៤ភាគរយ ក្នុងឆ្នាំ២០១៦ កន្លងទៅនេះ ធៀបនឹងឆ្នាំ ២០១៥ ។

លោក នេត សាវឿន នៅតែចាត់ទុកអំពើជួញដូរមនុស្ស ជាសកម្មភាពឧក្រិដ្ឋ ដែលមានបណ្តាញស្មុគស្មាញ ដោយសារវាបានពង្រីកភូមិសាស្ត្រធ្វើសកម្មភាពកាន់តែធំប្រកបដោយល្បិចកល ស្ទើរគ្រប់ប្រទេសក្នុងតំបន់ និងទូទាំងពិភពលោក។

ថ្លែងពិធីបិទកិច្ចប្រជុំបូកសរុបដំណើរការចំណុចខ្ពស់វាយលុកបង្ក្រាបបទល្មើសជួញដូរមនុស្សឆ្លងដែនរវាង កម្ពុជា វៀតណាម និងឡាវ នៅថ្ងៃទី១៤ ខែកុម្ភៈនេះ លោកបានបន្តថ្លែងថា ពួកឧក្រិដ្ឋជនបានទទួលផល ប្រយោជន៍ពីការជួញដូរមនុស្សប្រមាណ ១៥០កោដិដុល្លារអាមេរិកក្នុងមួយឆ្នាំៗ ក្នុងនោះ បទល្មើស ៦៨ភាគរយ ជាអំពើជួញដូរកម្លាំងពលកម្មដោយបង្ខំ និងអំពើជួញដូរផ្លូវភេទ។

បន្ថែមលើសពីនេះ អគ្គស្នងការនគរបាលជាតិរូបនេះ បានជំរុញអាជ្ញាធរប្រទេសក្រោមកិច្ចសហប្រតិបត្តិ ការប្រយុទ្ធប្រឆាំងអំពើជួញដូរឆ្លងដែនទាំង៣ ត្រូវបន្តពង្រឹងកិច្ចសហប្រតិបត្តិការផ្លាស់ប្តូរព័ត៌មានទៅវិញទៅមក តាមរយៈយន្តការមានស្រាប់ និងពង្រឹងសកម្មភាពត្រួតពិនិត្យតាមច្រកព្រំដែន ដើម្បីបង្កើនសមត្ថភាពប្រឆាំងការជួញដូរមនុស្សឆ្លងកាត់ព្រំដែនរួមគ្នា។

ទន្ទឹមគ្នា លោកបានជំរុញអាជ្ញាធរត្រូវសហការជាមួយអាជ្ញាធរដែនដី ជាពិសេសតំបន់ជាប់ព្រំដែន ចុះអប់រំប្រជាពលរដ្ឋពីផលប៉ះពាល់ ល្បិចកលរបស់ពួកឧក្រិដ្ឋជន ឬមេខ្យល់ជួញដូរមនុស្សផងដែរ។ តាមទិន្នន័យប៉ាន់ស្មានរបស់អង្គការពលកម្មអន្តរជាតិ (ILO) ពលរដ្ឋក្នុងប្រទេសកម្ពុជា វៀតណាម និងឡាវប្រមាណ ២១លាននាក់ បានរងគ្រោះក្នុងអំពើជួញដូរ មនុស្ស កាលពីឆ្នាំ២០១៦កន្លងទៅ៕