អន្តរជាតិ
ក្រុមប្រឹក្សាសិទ្ធិមនុស្សអាចបង្កើតស្ថាប័នពិសេសស៊ើបអង្កេតរឿងរំលោភសិទ្ធិមនុស្សធ្ងន់ធ្ងរនៅមីយ៉ាន់ម៉ា បេសកជនពិសេសទទួលបន្ទុកសិទ្ធិមនុស្សមនុស្សប្រចាំប្រទេសមីយ៉ាន់ម៉ាលោកស្រី Yanghee Lee
× បេសកជនពិសសអង្គការសហប្រជាជាតិប្រចាំមីយ៉ាន់ម៉ាបានស្នើឲ្យមានការបង្កើតគណៈកម្មការស៊ើបអង្កេតពិសេសមួយសម្រាប់ទទួលខុសត្រូវសំណុំsរឿងរំលោភសិទ្ធិមនុស្សនៅមីយ៉ាន់ម៉ា។ការស្នើសុំនេះកើតឡើងស្របពេលដែលមីយ៉ាន់ម៉ាកំពុងរងការចោទប្រកាន់ពីស្ថាប័នសិទ្ធិមនុស្សនិងបណ្តាក្រុមសកម្មជនសិទ្ធិមនុស្សថា បានបំពានសិទ្ធិជនជាតិភាគតិចឥស្លាម រ៉ូហ៊ីងយ៉ាធ្ងន់ធ្ងរ។
បេសកជនពិសេសទទួលបន្ទុកសិទ្ធិមនុស្សប្រចាំប្រទេសមីយ៉ាន់ម៉ាលោកស្រី Yanghee Lee បានធ្វើសំណើរមួយក្នុងរបាយការណ៍ខ្លួននាថ្ងៃ ២មីនា ដើម្បីសុំបង្កើតគណៈកម្មការពិសេសមួយស៊ើបអង្កេតករណីសិទ្ធិមនុស្សនៅមីយ៉ាន់ម៉ា។ បើសិនជាមានការអនុម័តដោយក្រុមប្រឹក្សាសិទ្ធិមនុស្សមែន គណៈកម្មការពិសេសនេះជាគណៈកម្មការស៊ើបអង្កេតខ្ពស់បំផុតមួយដែលមានភារកិច្ចស៊ើបអង្កេតករណីរំលោភសិទ្ធិមនុស្ស។
យោងតាមទីភ្នាក់ងារព័ត៌មាន AFP ដែលស្រង់សម្តីលោកស្រីតាមរបាយការណ៍ដាក់ចូលទៅក្រុមប្រឹក្សាសិទ្ធិមនុស្សនោះ លោកស្រី បេសកជនពិសេសនេះទទូចសុំឲ្យក្រុមប្រឹក្សាទាំងមូលដែលមានប្រទេសសមាជិកចំនួន ៤៧នោះ ចូលរួមបង្កើតគណៈកម្មការនេះឡើងដើម្បីស្វែងរកភស្តុតាងនិងស៊ើបអង្កេតឲ្យបានល្អិតល្អន់ពីការរំលោភសិទ្ធិមនុស្សជាប្រព័ន្ធ, ការអនុវត្តគោលនយោបាយ និងច្បាប់ដែលមានលក្ខណៈរើសអើងចំពោះប្រជាជនភាគតិចរ៉ូហ៊ីងយ៉ានារដ្ឋរ៉ាក់ឃីន នោះ។
បេសកជនរូបនេះបានបន្តថា ការស៊ើបអងេ្កតក៏ត្រូវផ្តោតសំខាន់លើអំពើហិង្សាដែលបង្កឡើងដោយអាជ្ញាធរកាលពីឆ្នាំ ២០១២ ឆ្នាំ ២០១៤ និង ការបង្ក្រាបនិងធ្វើទុក្ខបុកម្នេញលើប្រជាជនរ៉ូហ៊ីងយ៉ាងកាលពីខែតុលាឆ្នាំ ២០១៦ ពីសំណាក់ក្រុមយោធាផងដែរ។ បើតាមសកម្មភាពបំពារបំពានសិទ្ធិមនុស្សនេះវាអាចស្មើនឹងបទឧក្រិដ្ឋប្រឆាំងមនុស្សជាតិថែមទៀតផង។
កន្លងមកការិយាល័យសិទ្ធិមនុស្សបានបញ្ចេញរបាយការណ៍ស៊ើបអង្កេតមួយក្នុងសំណុំរឿងមីយ៉ាន់ម៉ាដែរ ដោយរបាយការណ៍នោះបង្ហាញថា កងកម្លាំងសន្តិសុខមីយ៉ាន់ម៉ា បានប្រព្រឹត្តបទល្មើសជាច្រើនក្នុងនោះមានទាំងការរំលោភសម្លាប់ និងធ្វើទារុណកម្មព្រៃផ្សៃលើប្រជាជនរ៉ូហ៊ីងយ៉ាថែមទៀតក្នុងប្រតិបត្តិការកាលពីខែតុលា។
ប៉ុន្តែមីយ៉ាន់ម៉ាបានទាត់ចោលរបាយការណ៍របស់អង្គការសិទ្ធិមនុស្សនេះ ដោយអះអាងថា ខ្លួនមិនបានប្រព្រឹត្តអំពើទាំងអម្បាលម៉ានដូចការចោទប្រកាន់ឡើយ។ រដ្ឋាភិបាលនេះក៏ថែមទាំងហៅរបាយការណ៍នេះថាជារបាយការណ៍មិនត្រឹមត្រូវ និងលម្អៀងផងដែរ។
យ៉ាងណាក៏ដោយ ការឈានទៅបង្កើតគណៈកម្មការស៊ើបអង្កេតកម្រិតខ្ពស់នេះ វាចាំបាច់ត្រូវមានការសម្រេចពីសមាជិកក្រុមប្រឹក្សាទាំងមូលតាមការអនុម័តដំណោះស្រាយមួយ។ គេរំពឹងថាដំណោះស្រាយនោះអាចនឹងត្រូវអនុម័តឡើងនៅចុងខែមីនានេះមុនពេលដែលកិច្ចប្រជុំក្រុមប្រឹក្សាប្រចាំឆ្នាំចប់៕
Tag:
មីយ៉ាន់ម៉ា
រ៉ូហ៊ីងយ៉ា
ក្រុមប្រឹក្សាសិទ្ធិមនុស្ស
Yanghee Lee
© រក្សាសិទ្ធិដោយ thmeythmey.com