ជាតិ
សេដ្ឋកិច្ច
ផ្ទះតម្លៃ ២៣៥០០ទៅជាង ៣ម៉ឺនដុល្លារសម្រាប់អ្នកមានចំណូលទាបនិងមធ្យម ចាប់ផ្ដើមសង់នៅខែឧសភា រូបថតពីហ្វេសប៊ុកលោក ជា សុផារ៉ា
×
ភ្នំពេញ៖ ក្រុមហ៊ុន ប៊ុន ជេស្ឋ គ្រុប (Bun Ches Group) និងក្រសួងរៀបចំដែនដី នគរូបនីយកម្មនិងសំណង់ នៅថ្ងៃទី២ខែមីនា បានចុះអនុស្សារណៈនៃការយោគយល់គ្នា (MOU) ដើម្បីសាងសង់លំនៅឋានតម្លៃសមរម្យសម្រាប់មន្ត្រីរាជការ កងកម្លាំងប្រដាប់អាវុធ និងប្រជាពលរដ្ឋដែលមានចំណូលទាប និងមធ្យម។
បើតាម លោក ផៃ សុម៉ៃ ប្រធានគម្រោងលំនៅឋានតម្លៃសមរម្យរបស់ក្រុមហ៊ុន ប៊ុន ជេស្ឋ គ្រុប ក្រុមហ៊ុននឹងអនុវត្តគម្រោងរបស់ខ្លួនលើផ្ទៃដី ៨២ហិកតា ចាប់ពីខែឧសភាឆ្នាំនេះ និងត្រូវបញ្ចប់ក្នុងចន្លោះពេលពី៣ឆ្នាំទៅ៥ឆ្នាំ លើទីតាំងស្ថិតក្នុងភូមិស្លែងដីដុះ ឃុំព្រែកតាទែន ស្រុកពញ្ញាឮ ខេត្តកណ្ដាល មានចម្ងាយ ២១គីឡូម៉ែត្រពីវត្តភ្នំ រាជធានីភ្នំពេញ តាមបណ្ដោយផ្លូវជាតិលេខ៥ (ទីតាំងគម្រោងមានចម្ងាយ ៤០០ម៉ែត្រពីផ្លូវជាតិ)។
លោក ផៃ សុម៉ែ បន្តថ្លែងប្រាប់សារព័ត៌មានថ្មីៗទៀតថា ក្រុមហ៊ុននឹងសាងសង់ផ្ទះចំនួន ៥៣៤០ល្វែង ក្នុងនោះប្រភេទផ្ទះទំហំ ៤,១ម៉ែត្រគុណ១៣ម៉ែត្រមានចំនួន ៨៦៤ខ្នង និងផ្ទះទំហំ ៥,១ម៉ែត្រគុណ៧,២ម៉ែត្រមាន ៤៤៧៦ខ្នង និងមានដីលំហមុខក្រោយ ៥ម៉ែត្រ។ លោក បន្ថែមថា ក្នុងគម្រោងនេះមានសួនច្បារ ចំណត និងផ្សារ និងនៅក្បែរទីតាំងគម្រោងមានសាលារៀន និងមន្ទីរពេទ្យរបស់រដ្ឋ ដែលបង្កភាពស្រួលដល់អ្នកចូលទៅរស់នៅទីនោះ។
ចំពោះតម្លៃ លោក ផៃ សុម៉ៃ អះអាងថា ផ្ទះទាំងនេះនឹងត្រូវលក់ក្នុងតម្លៃ ២៣៥០០ ទៅ ៣១៨៧៩ដុល្លារក្នុង១ល្វែង។ លោកបញ្ជាក់ថា អតិថិជនត្រូវបង់ប្រាក់កក់៣០ភាគរយនៃតម្លៃផ្ទះ ដោយ១ខែត្រូវបង់១០ភាគរយសម្រាប់៣ខែដំបូង និងនៅសល់ ៧០ភាគរយទៀតអតិថិជនអាចបង់រំលួសរហូតដល់២០ឆ្នាំ ដោយ១ខែត្រូវបង់ពី ១៤០ ទៅជាង ១៦០ដុល្លារ ជាមួយអត្រការប្រាក់ ៨,៥ភាគរយក្នុង១ឆ្នាំ។ លោកបន្ថែមថា អ្នកនៅលីវ និងមានគ្រួសារដែលមានចំណូលទាបនិងមធ្យមអាចទិញផ្ទះនេះបានដូចគ្នា តែក្រុមហ៊ុនលោកផ្ដល់អាទិភាពដល់មន្ត្រីរាជការ ហើយទិញបានរយៈពេល៥ឆ្នាំទើបអាចលក់បាន។
ប្រធានគម្រោងរូបនេះ ឲ្យដឹងថា ក្រុមហ៊ុនលោកដែលមានលោក ប៊ុន ជេស្ឋ ជាប្រធាន សម្រេចសាងសង់ផ្ទះតម្លៃសមរម្យនេះឡើង គឺដើម្បីរួមចំណែកកាត់បន្ថយភាក្រីក្ររបស់ពលរដ្ឋ និងផ្ដល់លទ្ធភាពដល់អ្នកមានចំណូលទាបនិងមធ្យមមានផ្ទះនៅសមរម្យ។ លោក សុម៉ៃ បន្តថា ចំពោះកិច្ចសហការរវាងក្រុមហ៊ុន និងក្រសួងរៀបចំដែនដី គឺខាងភាគីក្រុមហ៊ុនជាអ្នកបោះទុនសាងសង់ តែលោកមិនអាចបញ្ជាក់បានពីដើមទុននោះទេ ហើយខាងក្រសួងនឹងជួយរៀបចំតភ្ជាប់ហេដ្ឋារចនាសម្ព័ន្ធនានា ទឹកស្អាត អគ្គិសនី និងសម្រួលនីតិវិធីរដ្ឋបាលផ្សេងៗ។
លោក ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ដែលបានចូលរួមជាអធិបតីក្នុងពិធីចុះ MOU នោះបានសរសេរនៅលើទំព័រហ្វេសប៊ុករបស់ខ្លួនថា៖«សូមអបអរសាទរពិធីចុះអនុស្សរណៈយោគយល់គ្នា រវាងអគ្គនាយកដ្ឋានលំនៅឋាននៃក្រសួងរៀបចំដែនដី នគរូបនីយកម្ម និងសំណង់ និងក្រុមហ៊ុន ប៊ុន ជេស្ឋ គ្រុប ដើម្បីធ្វើកិច្ចសហប្រតិបត្តិការ សំដៅចូលរួមសម្រេចចក្ខុវិស័យនៃគោលនយោបាយជាតិស្តីពីលំនៅឋានក្នុងការផ្តល់ជូនដល់ប្រជាពលរដ្ឋ ទទួលបានលំនៅឋានក្នុងតម្លៃសមរម្យសម្រាប់រស់នៅប្រកបដោយសុខមាលភាព សុវត្ថិភាព និងសេចក្តីថ្លៃថ្នូរ ជាពិសេស ប្រជាពលរដ្ឋដែលមានប្រាក់ចំណូលមធ្យម ចំណូលទាប និងក្រុមជនងាយរងគ្រោះ»។
គួរបញ្ជាក់ថា ក្រុមហ៊ុន ប៊ុន ជេស្ឋ គ្រុប គឺជាក្រុមហ៊ុនទី២ហើយ បន្ទាប់ពីក្រុមហ៊ុន Worldbridge Land របស់លោក សៀ ឫទ្ធី ដែលបានសហការជាមួយក្រសួងរៀបចំដែនដី បោះទុនសាងសង់ផ្ទះសម្រាប់អ្នកមានចំណូលទាបនិងមធ្យម។ ក្រុមហ៊ុន Worldbridge Land កំពុងដំណើរការគម្រោងរបស់ខ្លួននៅស្រុកស្អាង ខេត្តកណ្ដាល៕
Tag:
ផ្ទះតម្លៃសមរម្យ
ប៊ុន ជេស្ឋ គ្រុប
© រក្សាសិទ្ធិដោយ thmeythmey.com