អន្តរជាតិ
នាយករដ្ឋមន្ត្រីម៉ាឡេស៊ី ថាការបណ្ដេញទូតកូរ៉េខាងជើងដើម្បីការពារកិត្តិយសប្រទេស លោក Kang Chol ទូតកូរ៉េខាងជើងប្រចាំម៉ាឡេស៊ី
× នាយករដ្ឋមន្ត្រី ណាជីប រ៉ាហ្សាក់ បាននិយាយការពារការបណ្ដេញអគ្គរដ្ឋទូតកូរ៉េខាងជើង Kang Chol ចេញពីទឹកដីម៉ាឡេស៊ី ជុំវិញការអធិប្បាយមិនសមរម្យរបស់អគ្គរដ្ឋទូតរូបនេះក្នុងឃាតកម្មលោក គីម ជុងណាំ កាលពីថ្ងៃទី១៣ ខែកុម្ភៈ។ លោកនាយករដ្ឋមន្ត្រី ណាជីប បានហៅចំណាត់ការរដ្ឋាភិបាលរបស់លោក ជាជំហរដ៏រឹងមាំដើម្បីការពារមុខមាត់ម៉ាឡេស៊ី ដែលរងការចោទប្រកាន់ពីសំណាក់កូរ៉េខាងជើងថាព្យាយាមបំបាក់ខ្លួន។
ទំនាក់ទំនងការទូតរវាងម៉ាឡេស៊ី និងកូរ៉េខាងជើង បានធ្លាក់ដល់ចំណុចទាបបំផុត បន្ទាប់ពីរដ្ឋាភិបាលក្រុងកូឡាឡាំពួរ ប្រកាសដាក់អគ្គរដ្ឋទូតកូរ៉េខាងជើង Kang Chol ជាជនមិនត្រូវបានស្វាគមន៍ និងត្រូវរៀបចំបង្វេចចេញពីទឹកដីម៉ាឡេស៊ីនៅត្រឹមល្ងាចថ្ងៃទី៦ ខែមីនា។ ម៉ាឡេស៊ី មិនពេញចិត្តឡើយដែលលោក គីម ជុងណាំ បងប្រុសម្ដាយទីទៃរបស់មេដឹកនាំកូរ៉េខាងជើង គីម ជុងអ៊ុន ត្រូវធ្វើឃាតលើទឹកដីខ្លួន ហើយថែមទាំងស្លាប់ដោយសារធាតុគីមីហាមឃាត់ទៅទៀត។
ការបណ្ដេញចេញអគ្គរដ្ឋទូតកូរ៉េខាងជើង ធ្វើឡើងក្រោយម៉ាឡេស៊ីមិនទទួលបានពាក្យសុំទោសជាលាយលក្ខណ៍អក្សរពីមន្ត្រីទូតជាន់ខ្ពស់កូរ៉េខាងជើង ដែលប្រើពាក្យមិនសមរម្យលើការស៊ើបអង្កេតករណីឃាតកម្ម គីម ជុងណាំ ។ លោក Kang Chol បានរិះគន់ការស៊ើបអង្កេតរបស់អាជ្ញាធរម៉ាឡេស៊ី ដោយបានចោទប្រកាន់ថា ម៉ាឡេស៊ី ចូលដៃជាមួយសត្រូវកូរ៉េខាងជើង ដើម្បីបង្ខូចមុខមាត់ខ្លួន។ ម្យ៉ាងទៀតនោះ កូរ៉េខាងជើងក៏មិនទទួលស្គាល់សពលោក គីម ជុងណាំ ជាសពបងប្រុសមេដឹកនាំខ្លួនដែរ។
នាយករដ្ឋមន្ត្រី ណាជីប រ៉ាហ្សាក់ បាននិយាយប្រាប់អ្នករាយការណ៍ព័ត៌មាននៅថ្ងៃទី៦ ខែមីនា ថា កូរ៉េខាងជើង គួរតែសុំទោសម៉ាឡេស៊ី ប៉ុន្តែលោកមិនរំពឹងថា កូរ៉េខាងជើងសុំទោសឡើយ ដូច្នេះហើយបានម៉ាឡេស៊ីដាក់ទូតកូរ៉េខាងជើងជាជនមិនត្រូវបានស្វាគមន៍។ បើតាមទីភ្នាក់ងារព័ត៌មាន Reuters លោកនិយាយទៀតថា ចំណាត់ការរបស់លោក គឺដើម្បីការពារមុខមាត់ប្រទេសជាតិ ព្រោះគ្មាននរណាអាចបំពានម៉ាឡេស៊ីឡើយ។
ទាក់ទិនទំនាក់ទំនងជាមួយកូរ៉េខាងជើង ប្រមុខរដ្ឋាភិបាលម៉ាឡេស៊ី ក៏បញ្ជាក់ថា ម៉ាឡេស៊ី ចាត់វិធានការម្ដងមួយជំហានសិន និងរង់ចាំមើលសកម្មភាពរបស់កូរ៉េខាងជើង ទើបឆ្លើយបន្តទៀត។ នៅពេលនេះ រដ្ឋាភិបាលបានហៅអគ្គរដ្ឋទូតរបស់ខ្លួនមកវិញដែរ ហើយក៏ទើបតែបញ្ឈប់ការអនុញ្ញាតឲ្យជនជាតិកូរ៉េខាងជើងចូលទឹកដីម៉ាឡេស៊ីដោយមិនចាំបាច់មានទិដ្ឋាការទៀតដែរ។
ទាក់ទងសំណុំរឿងឃាតកម្ម គីម ជុងណាំ វិញ មកទល់ពេលនេះមានតែស្ត្រី២នាក់ប៉ុណ្ណោះដែលត្រូវតុលាការម៉ាឡេស៊ីចោទប្រកាន់ផ្លូវការ ខណៈអាជ្ញាធរម៉ាឡេស៊ីកំពុងតាមរកចាប់ខ្លួនជនជាតិកូរ៉េខាងជើងច្រើននាក់ទៀត ដែលជាប់សង្ស័យក្នុងសំណុំរឿងនេះ។ កាលពីសប្ដាហ៍មុន ក្រុងកូឡាឡាំពួរ ក៏បានដោះលែងជនជាតិកូរ៉េខាងជើងដែរ ព្រោះគ្មានភស្តុតាងគ្រប់គ្រាន់ដាក់បន្ទុក ហើយជននេះក៏ត្រូវបានបណ្ដេញចេញពីទឹកដីម៉ាឡេស៊ីដែរ៕
Tag:
ម៉ាឡេស៊ី
កូរ៉េខាងជើង
Najib Razak
© រក្សាសិទ្ធិដោយ thmeythmey.com