អន្តរជាតិ
Duterte អរគុណចិនដែលស្រឡាញ់ហ្វីលីពីន ប្រធានាធិបតី Rodrigo Duterte ចាប់ដៃប្រធានាធិបតីចិន ស៊ី ជីនភីង (រូបភាព Xinhua)
× ប្រធានាធិបតីហ្វីលីពីន Rodrigo Duterte បានអរគុណសាធារណរដ្ឋប្រជាមានិតចិន ដែលជួយជ្រោមជ្រែងសេដ្ឋកិច្ចហ្វីលីពីនឲ្យរីកចម្រើនឡើងវិញ តាមរយៈការផ្ដល់ធនធានហិរញ្ញវត្ថុរាប់ពាន់លានដុល្លារ។ លោក Duterte ក៏បានរម្លឹកពីការសន្យារបស់ចិន ដែលមកវិនិយោគយ៉ាងច្រើនសន្ធឹកសន្ធាប់នៅហ្វីលីពីន និងអនុញ្ញាតឲ្យទំនិញហ្វីលីពីនហូរចូលទីផ្សាររបស់ខ្លួនថែមទៀត។
«សូមអរគុណដែលស្រឡាញ់ពួកយើង និងជួយយើងក្នុងពេលជីវិតជួបរឿងដ៏លំបាក»។ នេះជាសម្ដីដឹងគុណរបស់ប្រធានាធិបតីហ្វីលីពីន Rodrigo Duterte ចំពោះប្រធានាធិបតីចិន ស៊ី ជីនភីង និងប្រជាជនចិន ដែលបានផ្ដល់ជំនួយអភិវឌ្ឍយ៉ាងច្រើនសម្រាប់ហ្វីលីពីន។ លោកចាត់ទុករឿងនេះ ជាជោគជ័យនៃនយោបាយការបរទេសដែលលោក ហៅថានយោបាយឯករាជ្យ បន្ទាប់ពីផ្អៀងខ្លាំងពេកលើអាមេរិកអស់ពេលជាច្រើនឆ្នាំ។
ថ្លែងទៅកាន់កម្មវិធីមួយនៅមជ្ឈមណ្ឌលសន្និសីទអន្តរជាតិក្រុងម៉ានីលនៅថ្ងៃទី៨ ខែមីនា ក្រៅពីអរគុណចិនជាសាធារណៈ លោក Duterte និយាយដែរថា ចិន ក៏មានបំណងទិញទំនិញគ្រប់ប្រភេទពីហ្វីលីពីន ខណៈដែលការនាំចេញទៅកាន់ចិនកើនឡើង២ដងឯណោះ។ លោកបន្ថែមថា ចិន ក៏សន្យាជួយសាងសង់ផ្លូវរថភ្លើងភ្ជាប់ពីភាគខាងជើងទៅភាគខាងត្បូងប្រទេស ដែលត្រូវចំណាយរាប់ពាន់លានដុល្លារទៀតផង។
ប្រធានាធិបតីហ្វីលីពីន ក៏បាននិយាយការពារការផ្លាស់ប្ដូរ១៨០ដឺក្រនៃនយោបាយការបរទេសរបស់លោក ដោយងាកចេញពីសម្ព័ន្ធមិត្តយូរឆ្នាំអាមេរិក និងបោះដៃទៅរកគូប្រជែងរបស់អាមេរិក គឺចិន និងរុស្ស៊ីវិញ។ ក្នុងទស្សនកិច្ចនៅចិនកាលពីឆ្នាំមុន លោក Duterte បាននាំមកវិញនូវកិច្ចព្រមព្រៀងសេដ្ឋកិច្ចជាង១៥ពាន់លានដុល្លារ និងជំនួយមនុស្សធម៌ជាច្រើនទៀត។ មិនតែប៉ុណ្ណោះ លោក ក៏បន្ទន់ជំហរដាក់ចិន រឿងសាលក្រមសមុទ្រចិនខាងត្បូងផងដែរ។
បើតាមសារព័ត៌មាន ABS-CBN News របស់ហ្វីលីពីន លោក Duterte អះអាងថា លោកសម្រេចចិត្តត្រឹមត្រូវក្នុងការផ្លាស់ប្ដូរនយោបាយការបរទេស ដែលប្រទេសផ្សេងមិនអាចលូកលាន់កិច្ចផ្ទៃក្នុងហ្វីលីពីនទៀតផង។ ការផ្លាស់ប្ដូរនយោបាយការបរទេសបែបនេះ ធ្វើឲ្យលោករងការរិះគន់ខ្លាំងពីសាធារណជន ដ្បិតលោកបោះបង់សម្ព័ន្ធមិត្តអាមេរិក ប៉ុន្តែលោកនិយាយថា លោកមិនខ្វល់ពីការដែលអ្នកដទៃស្អប់លោកឡើយ។
ខណៈដែលទំនាក់ទំនងជាមួយអាមេរិកនៅទ្រឹងគ្មានការរីកចម្រើនអ្វីនោះ លោក Duterte ក៏ប្រឹងពង្រឹងទំនាក់ទំនងជាមួយគូប្រជែងអាមេរិកកាន់តែខ្លាំងថែមទៀត។ ក្នុងខែឧសភាខាងមុខ លោកនឹងទៅទស្សនកិច្ចលើកទី២នៅចិន ដើម្បីចូលរួមកិច្ចប្រជុំអន្តរជាតិនៅទីនោះ។ ហើយលោកក៏នឹងទៅជួប Idol របស់លោក គឺប្រធានាធិបតីរុស្ស៊ី វ្ល៉ាឌីមៀ ពូទីន ដល់ទឹកដីរុស្ស៊ីថែមទៀតផង៕
Tag:
ហ្វីលីពីន
Rodrigo Duterte
ចិន
© រក្សាសិទ្ធិដោយ thmeythmey.com