កីឡាជាតិ
×![]()
សហព័ន្ធកីឡាបាល់ទះកម្ពុជាបានបន្ថែមសមាសភាពដែលមានតួនាទីជាអនុប្រធានចំនួន៨រូប និងសមាជិកពីររូបដើម្បីដឹកនាំ និងអភិវឌ្ឍន៍វិស័យកីឡាបាល់ទះក្នុងអាណត្តិថ្មី ខណៈលោក នេត សាវឿន បន្តតួនាទីជាប្រធាន។ ការបន្ថែមនេះ ធ្វើឡើងក្នុងមហាសន្និបាតបូកសរុបការងារអាណត្តិទី៤ និងដាក់ទិសដៅអាណត្តិទី៥ កាលពីថ្ងៃទី៧ ខែមីនា នៅទីស្នាក់ការគណៈកម្មាធិការជាតិកម្ពុជា(NOCC)។ 
ដើម្បីជួយពង្រឹង និងអភិវឌ្ឍន៍កីឡាបាល់ទះកម្ពុជាឲ្យកាន់តែរីកចម្រើន សម្រាប់ត្រៀមការប្រកួតកីឡាស៊ីហ្គេមឆ្នាំ២០២៣ ដែលកម្ពុជាធ្វើជាម្ចាស់ផ្ទះ សហព័ន្ធកីឡាបាល់ទះកម្ពុជាក្នុងអាណត្តិថ្មី(២០១៧-២០២១) បានបន្ថែមសមាសភាពអនុប្រធានចំនួន៨រូប និងសមាជិក២រូប។ ភាគច្រើននៃសមាសភាពទាំងនេះសុទ្ធសឹងជាអ្នកស្នេហាកីឡា និងជាអ្នកមានតួនាទីខ្ពស់ និងសម្បូរទ្រព្យធន។
សមាសភាពអនុប្រធានទាំង៨រូបនោះរួមមាន លោកឧកញ៉ា ខូវ សម្បិត្ត, ឧកញ៉ា សុខ ហុង, ឧកញ៉ា ជាម ឃុនណាត, ឯកឧត្តម ស សុខា, ឯកឧត្តម គង់ វិបុល, ឯកឧត្តម ឌី វិជ្ជា, ឯកឧត្តម គៀត ច័ន្ទថារិទ្ធ និងឯកឧត្តម ប៊ូ ជុំសេរី។ រីឯសមាសភាពសមាជិកទាំងពីររូប គឺឯកឧត្តម ឆាយ គឹមខឿន និងលោក រស់ ឈុនអៀង។
ជាមួយគ្នានេះ ដើម្បីរួមចំណែកឈានឆ្ពោះទៅរកភាពជោគជ័យនៅស៊ីហ្គេមឆ្នាំ២០២៣ អគ្គលេខាធិការនៃគណៈកម្មាធិការជាតិអូឡាំពិកកម្ពុជា លោក វ៉ាត់ ចំរើន បានជំរុញឲ្យសហព័ន្ធកីឡាបាល់ទះកម្ពុជារៀបចំផែនការយុទ្ធសាស្ត្រ និងសូចនាករឲ្យបានច្បាស់លាស់ ដើម្បីអនុវត្តន៍ឲ្យស្របតាមផែនការមេស៊ីហ្គេមឆ្នាំ២០២៣។ ដូច្នេះដើម្បីអភិវឌ្ឍន៍រួមគ្នា លោក បានដាក់ចេញនូវគោលការណ៍៤ចំណុចឲ្យសហព័ន្ធកីឡាជាតិទាំងអស់ត្រូវអនុវត្តន៍។
គោលការណ៍ទាំង៤នោះរួមមានទី១. ការងាររដ្ឋបាលកីឡា គឹសហព័ន្ធត្រូវមានទំនាក់ទំនងសាធារណក្នុងស្រុក និងក្រៅស្រុក។ ក្នុងនោះ សហព័ន្ធត្រូវមានទំនាក់ទំនងល្អជាមួយគណៈកម្មការធិការជាតិអូឡាំពិកកម្ពុជា ក្រសួងអប់រំ យុវជន និងកីឡា និងភាគីពាក់ព័ន្ធទាំងអស់នៅក្នុងស្រុក ជាពិសេសត្រូវមានទំនាក់ទំនងផ្ទាល់ជាមួយសហព័ន្ធអន្តរជាតិអាស៊ាន, អាស៊ី និងអន្តរជាតិពិភពលោក ដើម្បីសុំការជួយខាងបច្ចេក និងសម្ភារផ្សេងៗ។
ទី២. ការគ្រប់គ្រងការរៀបចំព្រឹត្តិការណ៍ឲ្យប្រកបដោយគោលការណ៍ Fair Play និងក្រមសីលធម៌កីឡា គឹសហព័ន្ធត្រូវរៀបចំដោយយុត្តិធម៌ តម្លាភាព និងគណនេយ្យភាពទៅតាមកម្រិតបច្ចេកទេស និងការហ្វឹកហាត់របស់កីឡាករ។ ប៉ុន្តែប្រសិនបើការគ្រប់គ្រងមិនបានល្អ វានឹងធ្វើឲ្យការប្រកួតបង្កឲ្យមានជម្លោះផ្ទៃក្នុងរវាងក្លិប និងក្លិប។
ទី៣. ការអភិវឌ្ឍបច្ចេកទេស ត្រង់ចំណុចនេះបែងចែកជាពីរ គឺបច្ចេកទេសជំនាញ និងបច្ចេកទូទៅ។ សហព័ន្ធត្រូវធ្វើការបែងចែកពីសមត្ថភាពរបស់កីឡាករ គ្រូបង្វឹក ចៅក្រម និងអាជ្ញាកណ្តាល ដើម្បីធ្វើការបណ្តុះបណ្តាលខាងផ្នែកបច្ចេកទេសឲ្យមានការរីកចម្រើនទៅតាមកម្រិតនីមួយៗ។
និងទី៤. ការទំនាក់ទំនងទីផ្សារ គឹសហព័ន្ធត្រូវស្វែងរកដៃគូអភិវឌ្ឍន៍ និងការឧបត្ថម្ភផ្សេងៗពីសំណាក់ក្រុមហ៊ុនឯកជន រីស្ថាប័នរដ្ឋផ្សេងៗ ដើម្បីរៀបចំវគ្គបណ្តុះបណ្តាល និងការប្រកួតជើងឯកផ្សេងៗដែលជាទំនួលខុសត្រូវរបស់ខ្លួនក្រៅពីទំនួលខុសត្រូវរបស់ NOCC និងក្រសួងអប់រំ យុវជន និងកីឡា។
ទន្ទឹមនឹងនេះ លោក នេត សាវឿន ប្រធានសហព័ន្ធកីឡាបាល់ទះកម្ពុជាបានគាំទ្រការលើកឡើងរបស់លោក វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជា និងបានយកគោលការណ៍ទាំងនោះដាក់បញ្ចូលក្នុងផែនការរបស់សហព័ន្ធដើម្បីអនុវត្តន៍ក្នុងអាណត្តិថ្មី។
បើយោងតាមប្រធានសហព័ន្ធកីឡាបាល់ទះរូបនេះ នៅក្នុងអាណត្តិទី៥នេះ លោកនឹងបង្កើតឲ្យមានក្រុមបាល់ទះនារីដែលជាប្រភេទវិញ្ញាសាសក្តានុពលរបស់កម្ពុជានាទស្សវត្សរ៍៦០ និង៧០។ ហើយលោកនឹងជំរុញឲ្យវិស័យកីឡាបាល់ទះនេះមាននៅគ្រប់ស្ថាប័នរដ្ឋ និងក្រុមហ៊ុនឯកជន។
តាមរយៈការបោះឆ្នោតនៅទីស្នាក់ការគណៈកម្មាធិការជាតិអូឡាំពិកកម្ពុជាកាលពីព្រឹកថ្ងៃទី៧ ខែមីនា សមាជិកប្រតិបត្តដែលត្រូវមកដឹកនាំអាណត្តិថ្មីរបស់សហព័ន្ធកីឡាបាល់ទះកម្ពុជាមាន២៣រូប។ ក្នុងនោះលោក នេត សាវឿន ជាប្រធាន, លោក ស សុខា, លោក គង់ វិបុល, លោក ប៊ូ ជុំសេរី, លោក គៀត ច័ន្ទថារិទ្ធ, លោក ឌី វិជ្ជា, លោក ខូវ សម្បត្តិ, លោក សុខ ហុង, លោក ជាម ឃុនណាត, លោក វុធ ផល្លី, ឡាក់ សំអាត, លោក សំ សោភាន់ និងលោក ជា ចំរើន ជាអនុប្រធាន។
លោក បឹង គឹមតោ អគ្គលេខាធិការ, លោក ឆាយ គីមខឿន, លោក តែម ម៉ឺន, លោក យ៉េត រ៉ាហ្សាក់, លោក ស ថេត, លោក ឆឹង យ៉ៅយ៉េន, លោក ម៉ាង វិបុល, លោក ញ៉ែម ជិនឌី, លោក កៅ យ៉ាន់ និងលោក រស់ ឈុនអៀង ជាសមាជិក៕
Tag:
បាល់ទះ
នេត សាវឿន
វ៉ាត់ ចំរើន
© រក្សាសិទ្ធិដោយ thmeythmey.com
