ធនាគារជាតិ កំណត់មិនឲ្យអត្រាការប្រាក់កម្ចីលើសពី ១៨ភាគរយក្នុង១ឆ្នាំ

ជាតិ

សេដ្ឋកិច្ច

ធនាគារជាតិ កំណត់មិនឲ្យអត្រាការប្រាក់កម្ចីលើសពី ១៨ភាគរយក្នុង១ឆ្នាំ

13, Mar 2017 , 8:00 pm

រូបភាព

លោក ជា ចាន់តូ ទេសាភិបាលធនាគារជាតិនៃកម្ពុជា

ដោយ:

ភ្នំពេញ៖ ធនាគារជាតិនៃកម្ពុជា (NBC) បានកំណត់អត្រាការប្រាក់អតិបរមា (ដាក់ពិដានអត្រាការប្រាក់) ត្រឹម ១៨ភាគរយ ក្នុង១ឆ្នាំ ទៅលើឥណទានរបស់គ្រឹះស្ថានមីក្រូហិរញ្ញវត្ថុ និងប្រតិបត្តិករឥណទានជនបទទាំងអស់ ដែលត្រូវអនុវត្តចំពោះកម្ចីថ្មី ចាប់ពីថ្ងៃទី១ខែមេសាឆ្នាំ២០១៧ តទៅ។ នេះបើតាមប្រកាស របស់ NBC នៅថ្ងៃទី១៣ខែមីនានេះ។

ចំពោះកម្ចីថ្មី និងកម្ចីរៀបចំឡើងវិញ ដែលចុះកិច្ចសន្យាខ្ចី ចាប់ពីថ្ងៃទី១ខែមេសាឆ្នាំ២០១៧ តទៅ គ្រឹះស្ថានមីហិរញ្ញវត្ថុទទួលប្រាក់បញ្ញើ គ្រឹះស្ថានមីក្រូហិរញ្ញវត្ថុ និងប្រតិបត្តិករឥណទានជនបទ មិនត្រូវយកអត្រាការប្រាក់លើសពី ១៨ភាគរយក្នុង១ឆ្នាំឡើយ។ បើតាមប្រកាសរបស់ធនាគារជាតិ ការដាក់ពិដានអត្រាការប្រាក់នេះមានគោលដៅ ការពារអតិថិជនពីការគិតអត្រាការប្រាក់ខ្ពស់ពេកពីគ្រឹះស្ថាន និងជំរុញការប្រើប្រាស់ឥណទានឲ្យមានប្រសិទ្ធិភាព។

ប្រកាសដដែលនេះចែងទៀតថា គ្រឹះស្ថានដែលមិនគោរពតាមខ្លឹមសារនៃប្រកាសនេះ នឹងត្រូវរងទណ្ឌកម្មខាងវិន័យតាមច្បាប់ស្ដីពីគ្រឹះស្ថានធនាគារនិងហិរញ្ញវត្ថុ។

យោងតាមរបាយការណ៍ប្រចាំឆ្នាំរបស់ NBC ការប្រាក់កម្ចីជារៀលរបស់គ្រឹះស្ថានមីក្រូហិរញ្ញវត្ថុ គិតជាមធ្យមមានអត្រា ៣៦ភាគរយក្នុង១ឆ្នាំ ខណៈការប្រាក់កម្ចីជាប្រាក់ដុល្លារមានអត្រា ២៨ភាគរយ នៅឆ្នាំ២០១៦ ។ របាយការណ៍ឲ្យដឹងទៀតថា គិតត្រឹមបំណាច់ឆ្នាំ២០១៦ កម្ពុជាមានអ្នកខ្ចីប្រាក់ក្នុងវិស័យមីក្រូហិរញ្ញវត្ថុចំនួន ១,៩លានអតិថិជន លើទំហំឥណទានសរុបគិតជាដុល្លារប្រមាណ ៣ពាន់លាន ៕