ជាតិ
ស្ពានជ្រៃធំភ្ជាប់កម្ពុជា-វៀតណាមនឹងបើកដំណើរការ ក្នុងខែមេសា ឆ្នាំ២០១៧នេះ លោក ជុំ សុន្ទរី អ្នកនាំពាក្យក្រសួងការបរទេស។ រូបថត រឿន ភារុន
× ភ្នំពេញ៖ រដ្ឋាភិបាលកម្ពុជា និងរដ្ឋាភិបាលវៀតណាមបានឯកភាពសម្ពោធស្ពានជ្រៃធំដែលស្ថិតជាប់ព្រំប្រទល់ស្រុកកោះធំ ខេត្តកណ្តាល និងខេត្ដអាងយ៉ាង វៀតណាម ក្នុងខែមេសា ឆ្នាំ២០១៧ខាងមុខ។ នេះបើតាមលោក ជុំ សុន្ទរី អ្នកនាំពាក្យក្រសួងការបរទេស។
លោក ជុំ សុន្ទរី បានឲ្យដឹងថា ភាគីទាំងពីរបានកំណត់ពេលបើកសម្ពោធស្ពានជ្រៃធំ នាពេលខាងមុខនេះ ដើម្បីសាទរខួប ៥០ឆ្នាំនៃទំនាក់ទំនងការទូតទ្វេភាគីផង។
ថ្លែងក្រោយកិច្ចប្រជុំគណៈកម្មការចម្រុះកម្ពុជា និងវៀតណាមលើកទី១៥ រវាងលោកទេសរដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេសកម្ពុជា និងលោកឧបនាយករដ្ឋមន្ត្រី ផាម ប៊ិញ មិញ (Pham Binh Minh) រដ្ឋមន្ត្រីក្រសួងការបរទេសវៀតណាម នៅថ្ងៃទី១៥ ខែមីនា ក្នុងទីស្តីការក្រសួងការបរទេស អ្នកនាំពាក្យក្រសួងការបរទេស ជឿជាក់ថា ស្ពាននេះ នឹងតភ្ជាប់ទំនាក់ទំនងពាណិជ្ជកម្ម និងប្រជាជនប្រទេសទាំងពីថែមទៀត។
គួរបញ្ជាក់ថា ស្ពានជ្រៃធំមានប្រវែង ៤២៨ម៉ែត្រ និងទទឹង ១៣,៥០ ម៉ែត្រ រួមទាំងចំណាយថវិកាសាងសង់សរុប ៣៨,៣៩លានដុល្លារ ក្នុងនោះ កម្ចីសម្បទានសាធារណរដ្ឋសង្គមនិយមវៀតណាមចំនួន ២០,៥៩លានដុល្លារអាមេរិក ថវិការដ្ឋាភិបាលនៃសាធារណរដ្ឋសង្គមនិយមវៀតណាមចំនួន ១៧,៨៣លានដុល្លារ និងថវិកាបដិភាគរបស់រដ្ឋាភិបាលកម្ពុជាចំនួន ១,៨៣ លានដុល្លារ។ ស្ពានជ្រៃធំ-ឡុងប៊ិញ ដែលឆ្លងកាត់ព្រែកជ្រៃធំ-ព្រែកបាក់ដាយនេះ ត្រូវបានបើកការដ្ឋានសាងសង់កាលពីថ្ងៃទី១៤ ខែមករា ឆ្នាំ២០១៤កន្លងទៅ ក្រោមវត្តមានសម្តេចនាយករដ្ឋមន្ត្រី ហ៊ុន សែន និងលោកនាយករដ្ឋមន្ត្រីវៀតណាម ង្វៀន តាន់យ៉ុង៕
Tag:
ប្រាក់ សុខុន
Pham Binh Minh
ជុំ សុន្ទរី
ជ្រៃធំ
កម្ពុជា
វៀតណាម
© រក្សាសិទ្ធិដោយ thmeythmey.com