អន្តរជាតិ
អឺរ៉ុប ហៅតំណាងហ្វីលីពីនមកសួររឿងលោក Duterte គំរាមព្យួរកមន្ត្រីអឺរ៉ុបប្រឆាំងទោសប្រហារជីវិត
× សហភាពអឺរ៉ុប នៅថ្ងៃទី២៧ ខែមីនា បានកោះហៅតំណាងហ្វីលីពីនប្រចាំក្រុងព្រុចសែល មកសួរនាំ និងពន្យល់សម្ដីរបស់ប្រធានាធិបតី Rodrigo Duterte ដែលប្រើពាក្យមិនសមរម្យដាក់អឺរ៉ុប ដោយសារជំទាស់បំណងរបស់លោកក្នុងអនុវត្តទោសប្រហារជីវិតឡើងវិញ។ លោក Duterte ថែមទាំងគំរាមព្យួរកមន្ត្រីអឺរ៉ុប ដែលប្រឆាំងគំនិតរបស់ទៀតផង ដែលរឿងនេះធ្វើឲ្យសហភាពអឺរ៉ុបមិនពេញចិត្តឡើយ។ នេះ ក៏បង្ហាញពីការធ្លាក់ចុះទំនាក់ទំនងរវាងសហភាពអឺរ៉ុប និងហ្វីលីពីនផងដែរ។
អ្នកនាំពាក្យសហភាពអឺរ៉ុប បាននិយាយថា ការិយាល័យកិច្ចការបរទេសអឺរ៉ុប បានកោះហៅភារធារីហ្វីលីពីនប្រចាំព្រុចសែលលោក Alan Deniega មកបកស្រាយសម្ដីរិះគន់របស់ប្រធានាធិបតី Rodrigo Duterte ។ សហភាពអឺរ៉ុប ចង់ឲ្យហ្វីលីពីនពន្យល់ការអធិប្បាយរបស់លោក Duterte ដែលប្រើពាក្យមិនសមរម្យដាក់មន្ត្រីអឺរ៉ុបដូចជាការគំរាមចងកជាដើម ព្រោះអឺរ៉ុបចង់ឲ្យលោកលុបចោលគម្រោងអនុវត្តទោសប្រហារជីវិតឡើងវិញ។
តាមពិតទៅ លោក Duterte មិនចូលចិត្តសហភាពអឺរ៉ុបតាំងពីដើមមកម្ល៉េះ ដោយសារអឺរ៉ុបរិះគន់រដ្ឋាភិបាលលោកមិនសំចៃមាត់ ជុំវិញយុទ្ធនាការបោសសម្អាតគ្រឿងញៀនដែលសម្លាប់មនុស្សអស់រាប់ពាន់នាក់មកហើយ។ លោក Duterte រឹតតែមិនសប្បាយចិត្ត ពេលអឺរ៉ុបរិះគន់គម្រោងអនុវត្តទោសប្រហារជីវិតឡើងវិញ ដែលអឺរ៉ុបលើកឡើងថា បំពានសិទ្ធិមនុស្សធ្ងន់ធ្ងរ។ សភាសហភាពអឺរ៉ុប ថែមទាំងអនុម័តសេចក្ដីសម្រេចថ្កោលទោសហ្វីលីពីនទៀតផង។
បើតាមសារព័ត៌មាន GMA News កាលពីថ្ងៃទី២៤ ខែមីនា ក្នុងសន្និសីទកាសែតនៅព្រលានយន្តហោះក្រោយបញ្ចប់ទស្សនកិច្ចនៅមីយ៉ាន់ម៉ា និងថៃ ប្រធានាធិបតីហ្វីលីពីនរូបនេះ ក៏ព្រលះសភាអឺរ៉ុបតែម្ដង។ ដោយចង់សំដៅមន្ត្រីសហភាពអឺរ៉ុប លោកនិយាយថា៖ «ខ្ញុំរីករាយបើបានព្យួរកអ្នក។ អ្នកតែងរិះគន់គេឯង និងដាក់សម្ពាធលើគ្រប់ប្រទេសដែលអនុវត្តទោសស្លាប់»។
សម្ដីគំរាមខាងលើនេះ ធ្វើឲ្យសហភាពអឺរ៉ុបភ្ញាក់ផ្អើលយ៉ាងខ្លាំង ដ្បិតមិននឹកស្មានប្រធានាធិបតីហ្វីលីពីនហ៊ានគំរាមដូចនេះសោះ។ សហភាពអឺរ៉ុប ចាត់ទុកការនិយាយបែបនេះ ជារឿងមិនអាចទទួលយកបានឡើយ ដែលចាំបាច់ត្រូវការការបកស្រាយឲ្យបានច្បាស់ពីហ្វីលីពីន។ អគ្គលេខាធិការរងការិយាល័យកិច្ចការបរទេសអឺរ៉ុប Jean-Christophe Belliard បានជួបតំណាងហ្វីលីពីន ដើម្បីស្ដាប់ការពន្យល់នេះ។
រដ្ឋាភិបាលលោក Duterte ចង់អនុវត្តទោសប្រហារជីវិតឡើងវិញ ដើម្បីធ្វើជាឧបករណ៍បន្លាចឧក្រិដ្ឋជន និងបន្ថយករណីឧក្រិដ្ឋកម្មធ្ងន់ធ្ងរនៅទូទាំងប្រទេស។ សំណើនេះ បានឆ្លងផុតដៃរដ្ឋសភាហើយ មុននឹងចូលដល់ដំណាក់កាលព្រឹទ្ធសភា។ ការជួញដូរថ្នាំញៀន និងសម្លាប់មនុស្ស សុទ្ធតែជាទោសស្លាប់ក្រោមសំណើច្បាប់នេះ ខណៈលោក Duterte ចង់បញ្ចូលករណីរំលោភចូលក្នុងទោសស្លាប់នេះដែរ។ វិធីសាស្ត្រសម្លាប់អ្នកទោសអាចជាការបាញ់នឹងកាំភ្លើង, ចាក់ថ្នាំ, ព្យួរក និងទោសជាប់គុកមួយជីវិត៕
Tag:
អឺរ៉ុប
ហ្វីលីពីន
Rodrigo Duterte
© រក្សាសិទ្ធិដោយ thmeythmey.com