ជាតិ
សេដ្ឋកិច្ច
ពន្ធដារ ដាស់តឿនដល់ម្ចាស់អាជីវកម្មឲ្យទៅបង់ពន្ធលើប្រាក់ចំណូល មុនដាច់ខែមីនានេះ
× ភ្នំពេញ៖ អគ្គនាយកដ្ឋានពន្ធដារ ក្រើនរំលឹកដល់សហគ្រាសជាអ្នកជាប់ពន្ធក្នុងរបបស្វ័យប្រកាសដែលមិនទាន់បង់ពន្ធលើប្រាក់ចំណូល ត្រូវរូសរាន់ទៅប្រកាសបង់ពន្ធលើប្រាក់ចំណូលប្រចាំឆ្នាំ២០១៦ ឲ្យបានត្រឹមថ្ងៃទី៣១ខែមីនាឆ្នាំនេះ។ នេះបើតាមសេចក្ដីជូនដំណឹងរបស់អគ្គនាយកដ្ឋាន នៅថ្ងៃទី២៧ខែមីនា។
សេចក្ដីជូនដំណឹងដដែលនេះឲ្យដឹងថា សហគ្រាសអ្នកជាប់ពន្ធភាគច្រើនបានដាក់លិខិតប្រកាសបង់ពន្ធលើប្រាក់ចំណូលប្រចាំឆ្នាំ២០១៦រួចរាល់ ប៉ុន្តែអ្នកមួយចំនួនទៀតនៅមិនទាន់មកបំពេញកាតព្វកិច្ចនេះនៅឡើយ។ អគ្គនាយកដ្ឋានពន្ធដារ បានក្រើនរលឹកដល់សហគ្រាសដែលមិនទាន់បង់ពន្ធលើប្រាក់ចំណូល ត្រូវរួសរាន់ទៅប្រកាសបង់ពន្ធលើប្រាក់ចំណូលឲ្យទាន់ពេលវេលាកំណត់។ ចំពោះការខកខានមិនបានដាក់លិខិតប្រកាសបង់ពន្ធទាន់ពេលវេលា អ្នកជាប់ពន្ធនឹងត្រូវទទួលរងទោសទណ្ឌ តាមច្បាប់ជាធរមាន។
ជាមួយគ្នានេះដែរ អគ្គនាយកដ្ឋានពន្ធដារបានគូសបញ្ជាក់ទាក់ទិនទៅនឹងការលើកទឹកចិត្តលើកលែងពន្ធលើប្រាក់ចំណូលរយៈពេល២ឆ្នាំ សម្រាប់សហគ្រាសធុនតូចនិងមធ្យមដែលបានចុះបញ្ជីស្ម័គ្រចិត្ត។ ការលើកទឹកចិត្តនេះត្រូវបានកំណត់ក្នុងអនុក្រឹត្យរបស់រដ្ឋាភិបាលកាលពីខែកុម្ភៈឆ្នាំនេះ។ អគ្គនាយកដ្ឋានអង្កេតឃើញមានការភ័ន្តច្រឡំថា ការលើកលែងពន្ធលើប្រាក់ចំណូលនេះ ត្រូវបានអនុវត្តជាទូទៅលើសហគ្រាសធុនតូច និងមធ្យម (SME) ទាំងអស់ ដែលនាំឲ្យសហគ្រាសមួយចំនួនខកខានមិនមកបំពេញកាតព្វកិច្ចដាក់លិខិតប្រកាសបង់ពន្ធប្រចាំខែ ប្រចាំឆ្នាំឡើយ។ អគ្គនាយកដ្ឋានបញ្ជាក់ថា ការលើកទឹកចិត្តលើកលែងពន្ធលើប្រាក់ចំណូលនេះផ្ដល់ឲ្យចំពោះតែ SME ដែលបានមកចុះបញ្ជីពន្ធដារដោយស្ម័គ្រចិត្ត ក្នុងអំឡុង២០១៧ និងឆ្នាំ២០១៨ ប៉ុណ្ណោះ។
SME ទាំងអស់ បើទោះបីបាន ឬមិនបានទទួលការលើកទឹកចិត្តនេះក្ដី ត្រូវតែមកដាក់លិខិតប្រកាសប្រចាំខែ ប្រចាំឆ្នាំ និងកាតព្វកិច្ចសារពើពន្ធផ្សេងទៀតតាមការកំណត់នៃច្បាប់ជាធរមាន។ នេះបើតាមសេចក្ដីជូនដំណឹងខាងលើ៕
© រក្សាសិទ្ធិដោយ thmeythmey.com