ជាតិ
នយោបាយជាតិ
ឧទ្ធរណ៍ គ្រោងបើកសវនាការរឿងលោក ហុង សុខហួរ នៅថ្ងៃទី៧ មេសា តែមេធាវីសុំពន្យារពេល
× ភ្នំពេញ៖ សាលាឧទ្ធរណ៍ នឹងបើកសវនាការ នៅព្រឹកថ្ងៃសុក្រ ជុំវិញសំណុំរឿងរបស់លោក ហុង សុខហួរ ដែលជាប់ពាក់ព័ន្ធនឹងការក្លែងឯកសារនៃសទ្ធិសញ្ញាព្រំដែនកម្ពុជា-វៀតណាម។ ប៉ុន្តែ ក្រុមេធាវីរបស់លោក ហុង សុខហួរ ចង់ឲ្យសាលាឧទ្ធរណ៍ លើកពេលបើកសវនាការ នៅថ្ងៃក្រោយវិញ។
សាលាឧទ្ធរណ៍ បានផ្តល់ព័ត៌មានទៅកាន់ក្រុមមេធាវីរួចហើយ ថា នឹងបើកសវនាការនៅថ្ងៃទី៧ ខែមេសា ឆ្នាំ២០១៧ ជុំវិញសំណុំរឿងរបស់លោក ហុង សុខហួរ សមាជិកព្រឹទ្ធសភាគណបក្ស សម រង្ស៊ី ដែលកំពុងជាប់ពន្ធនាគារ។ ការបើកសវនាការនេះ គឺធ្វើតាមសំណើរបស់ក្រុមមេធាវី ក្នុងការសុំជំទាស់នឹងសាលាដំបូងរាជធានីភ្នំពេញ ដែលកាត់ទោសលោកហុង សុខហួរ ឲ្យជាប់ពន្ធនាគាររយៈពេល៧ឆ្នាំ ក្រោមបទចោទ «ក្លែងឯកសារសាធារណៈ ប្រើប្រាស់ឯកសារសាធារណៈក្លែងក្លាយ និងញុះញង់ឲ្យប្រព្រឹត្តបទឧក្រិដ្ឋ»។
ប៉ុន្តែ នៅល្ងាចថ្ងៃទី៦ ខែមេសា ឆ្នាំ២០១៧នេះ ក្រុមមេធាវី របស់លោក ហុង សុខហួរ បែរជាដាក់លិខិតទៅកាន់សាលាឧទ្ធរណ៍ ដើម្បីសុំពន្យារពេលនៃការបើកសវនាការទៅវិញ។ នេះបើតាមលោក ហែម សុជាតិ មេធាវីមួយរូបក្នុងចំណោមមេធាវីទាំងប្រាំរូប ដែលរួមគ្នាការពារក្តីឲ្យលោក ហុង សុខហួរ។
លោក ហែម សុជាតិ បានប្រាប់សារព័ត៌មានថ្មីៗថា ការស្នើសុំបែបនេះ គឺដោយសារតែមេធាវីចំនួនពីររូប ជាប់បំពេញបេសកកម្ម នៅក្រៅប្រទេស ដោយមិនអាចទៅចូលរួមសវនាការបាន។ លោក និយាយដូច្នេះថា៖«រឿងហ្នឹង គឹជារឿងធំ។ អ៊ីចឹងយើងចង់ឲ្យមេធាវីមកជុំគ្នា ដើម្បីឲ្យមានគំនិតច្រើនក្នុងការការពារកូនក្តី»។
យ៉ាងណា ក្រុមេធាវីនៅមិនទាន់ទទួលបានការឆ្លើយតបពីសាលាឧទ្ធរណ៍យ៉ាងណានោះទេ ចំពោះសំណើខាងលើ។ ម្យ៉ាងទៀត ក្រុមមេធាវី ក៏មិនទាន់សម្រេចចិត្តដែរ ថាចូលរួមក្នុងសវនាការ ឬមិនចូល ប្រសិនបើសាលាឧទ្ធរណ៍ មិនព្រមពន្យារពេល៕
© រក្សាសិទ្ធិដោយ thmeythmey.com