អន្តរជាតិ
ឌូទើតេ ចង់បានលិខិតអញ្ជើញផ្លូវការពី ត្រាំ សិន មុនសម្រេចចិត្តបំពេញទស្សនកិច្ចនៅអាមេរិក ប្រធានាធិបតីហ្វីលីពីន រ៉ូឌ្រីហ្គោ ឌូទើតេ កំពុងនិយាយទូរសព្ទជាមួយប្រធានាធិបតីអាមេរិក ដូណាល់ ត្រាំ នៅថ្ងៃទី២៩ ខែមេសា (រូបភាព Manila Bulletin)
× មកទល់ពេលនេះ ប្រធានាធិបតីហ្វីលីពីន រ៉ូឌ្រីហ្គោ ឌូទើតេ (Rodrigo Duterte) មិនទាន់សម្រេចចិត្តទៅទស្សនកិច្ចនៅអាមេរិកតាមការអញ្ជើញរបស់ប្រធានាធិបតី ដូណាល់ ត្រាំ នៅឡើយ។ បើតាមក្រសួងការបរទេសហ្វីលីពីន លោក ឌូទើតេ ចង់បានការអញ្ជើញផ្លូវការពីសំណាក់ភាគីអាមេរិកសិន ទើបសម្រេចចិត្តតាមក្រោយថា ទៅឬមិនទៅ។ លោក ត្រាំ បានអញ្ជើញលោក ឌូទើតេ ទៅកាន់សេតវិមានក្នុងការសន្ទនាតាមទូរសព្ទកាលពីថ្ងៃទី២៩ ខែមេសាកន្លងទៅ។
ប្រធានាធិបតីហ្វីលីពីន រ៉ូឌ្រីហ្គោ ឌូទើតេ កំពុងរង់ចាំការអញ្ជើញផ្លូវការពីសំណាក់ប្រធានាធិបតី ដូណាល់ ត្រាំ ដើម្បីទស្សនកិច្ចនៅអាមេរិក។ ប្រមុខរដ្ឋហ្វីលីពីន នៅអល់អែកនៅឡើយទាក់ទងទស្សនកិច្ចនេះ បើទោះជាលោក ត្រាំ បានអញ្ជើញលោកដោយផ្ទាល់តាមទូរសព្ទក៏ដោយ។ ទាក់ទងបញ្ហានេះ ក្រសួងការបរទេសហ្វីលីពីនបញ្ជាក់ថា មានការអញ្ជើញជាផ្លូវការពីអាមេរិកសិន ទើបលោក ឌូទើតេ សម្រេចចិត្តបាន។
អ្នកនាំពាក្យក្រសួងការបរទេសហ្វីលីពីន Robespierre Bolivar នៅថ្ងៃទី៨ ខែឧសភា បាននិយាយថា លោក ឌូទើតេ អាចបដិសេធ ឬទទួលយកសំណើបាន លុះត្រាមានការអញ្ជើញផ្លូវសិន។ បើតាមសារព័ត៌មាន Manila Bulletin អ្នកនាំពាក្យដដែលនេះពន្យល់ថា៖ «នេះជាការអនុវត្តតាមផ្លូវការទូត ហើយមកទល់ពេលនេះ ហ្វីលីពីនក៏មិនទាន់បានទទួលការអញ្ជើញណាមួយដែរ។ ក្នុងករណីមានការអញ្ជើញ ហើយប្រធានាធិបតី ឌូទើតេ ទទួលយក យើងនឹងប្រាប់ដំណឹងនេះទៅពួកគេវិញ»។
លោក Robespierre Bolivar សង្កត់ធ្ងន់ថា ហ្វីលីពីន អាចចាប់ផ្ដើមរៀបចំដំណើរទស្សនកិច្ចនេះបាន លុះត្រាតែលោក ឌូទើតេ ទទួលយកការអញ្ជើញសិន។
តាមពិតទៅ ប្រធានធិបតី ឌូទើតេ ផ្ទាល់ក៏ធ្លាប់ប្រកាសរួចម្ដងហើយថា លោក មិនទាន់ទទួលយកការអញ្ជើញផ្ទាល់មាត់ពីសំណាក់ប្រធានាធិបតី ត្រាំ នៅឡើយទេ ព្រោះលោកកំពុងរវល់ខ្លាំង។ បើតាមការគ្រោងទុកនៅក្នុងខែឧសភា លោក ឌូទើតេ មានកម្មវិធីទស្សនកិច្ចនៅចិន និងរុស្ស៊ី ក៏ដូចជាត្រូវធ្វើដំណើរទៅកាន់អ៊ីស្រាអែលផងដែរ។
ខុសពីលោក ឌូទើតេ ប្រមុខរដ្ឋាភិបាលសិង្ហបុរី លី សៀនឡុង និងមេដឹកនាំរបបសឹកថៃ ប្រាយុទ្ធ ចន្ទអូចា បានទទួលការអញ្ជើញភ្លាមៗ តាមរយៈការនិយាយទូរសព្ទជាមួប្រធានាធិបតី អាមេរិក។ លោក ត្រាំ ជជែកតាមទូរសព្ទជាមួយមេដឹកនាំអាស៊ានទាំង ៣ប្រទេសលើប្រធានបទំនាក់ទំនងទ្វេភាគី និងបញ្ហានុយក្លេអ៊ែរកូរ៉េខាងជើង ដែលកំពុងឡើងកម្ដៅខ្លាំង៕
Tag:
ហ្វីលីពីន
Rodrigo Duterte
ដូណាល់ ត្រាំ
© រក្សាសិទ្ធិដោយ thmeythmey.com