ពលរដ្ឋកូរ៉េខាងត្បូងរើសមេដឹកនាំថ្មី ក្រោយប្រឈមព្យុះភ្លៀងនយោបាយរាប់ខែ

អន្តរជាតិ

ពលរដ្ឋកូរ៉េខាងត្បូងរើសមេដឹកនាំថ្មី ក្រោយប្រឈមព្យុះភ្លៀងនយោបាយរាប់ខែ

09, May 2017 , 1:59 pm

រូបភាព

ដោយ: តន ចាន់រិទ្ធារ៉ា

ពលរដ្ឋកូរ៉េខាងត្បូងមានសិទ្ធិបោះឆ្នោតរាប់លាននាក់ ទៅកាន់ការិយាល័យបោះឆ្នោតនៅទូទាំងប្រទេសដើម្បីជ្រើសរើសមេដឹកនាំថ្មី ក្រោយជួបប្រទះវិបត្តិនយោបាយជាច្រើនខែលើសំណុំរឿងពុករលួយរបស់អតីតប្រធានាធិបតី ប៉ាក ហ្គឺនហេ ។ បេក្ខជនប្រធានាធិបតីសំខាន់ចំនួន៥ ប្រជែងគ្នាដណ្ដើមកៅអីប្រធានាធិបតីនេះ ខណៈបញ្ហាជាច្រើនកំពុងរង់ចាំមេដឹកនាំថ្មីដូចជាទំនាក់ទំនងជាមួយកូរ៉េខាងជើង វិសមភាពសង្គម និងអំពើពុករលួយជាដើម។ អតីតគូប្រជែងលោកស្រីប៉ាក លោក Moon Jae-in មានលទ្ធភាពខ្ពស់ជាងគេក្នុងការឈ្នះឆ្នោតជាប្រធានាធិបតីកូរ៉េខាងត្បូងនេះ។

ការបោះឆ្នោតជ្រើសរើសប្រធានាធិបតីកូរ៉េខាងត្បូង បានចាប់ផ្ដើមហើយនៅថ្ងៃទី៩ ខែឧសភា ដោយអ្នកបោះឆ្នោតកូរ៉េខាងត្បូងរាប់លាននាក់ បានទៅកាន់មណ្ឌលបោះឆ្នោតដែលបានបើកតាំងពីម៉ោង៦ព្រឹក។ ពួកគេ ត្រូវសម្រេចចិត្តជ្រើសរើសប្រធានាធិបតីថ្មី ដែលត្រូវដឹកនាំកូរ៉េខាងត្បូងសម្រាប់អាណត្តិ ៥ឆ្នាំខាងមុខ។ នេះជាការបោះជំហានថ្មីទៅមុខ ក្រោយការផ្ទុះរឿងអាស្រូវពុករលួយដែលឈានដល់ការទម្លាក់តំណែងលោកស្រី ប៉ាក ហ្គឺនហេ ។

គណៈកម្មការរៀបចំការបោះឆ្នោតកូរ៉េខាងត្បូង ប្រកាសថា ការិយាល័យបោះឆ្នោតចំនួនជាង១ម៉ឺន៣ពាន់កន្លែង បានបើកនៅម៉ោង ៦ព្រឹក និងបិទវិញនៅម៉ោង ៨យប់ មិនមែនម៉ោង ៦ល្ងាចដូចការបោះឆ្នោតលើកមុនៗឡើយ។ នេះ ជារឿងកម្រមួយដែលមានការពន្យារពេលបិទការិយាល័យបោះឆ្នោតមុនអាណត្តិបែបនេះ។ ប្រជាជនកូរ៉េខាងត្បូងចំនួនជាង ៤២លាននាក់ ក្នុងចំណោមប្រជាជនសរុប ៥១លាននាក់ មានសិទ្ធិបោះឆ្នោត ដែលនេះជាចំនួនដ៏ខ្ពស់មួយ។

បើតាមទីភ្នាក់ងារព័ត៌មាន Yonhap បេក្ខជនចំនួន ១៣នាក់បានប្រជែងគ្នាក្នុងការបោះឆ្នោតនេះ តែមានតែបេក្ខជនចំនួន ៣នាក់ប៉ុណ្ណោះ ដែលមានភាគរយច្រើនសម្រាប់កៅអីប្រធានាធិបតី។ បេក្ខជនសេរីនិយមលោក Moon Jae-in នៅតែមានសង្ឃឹមខ្ពស់ជាងគេ ខណៈបេក្ខជនបក្សអភិរក្សលោក Hong Joon-pyo និងបេក្ខជនកណ្ដាលលម្អៀងឆ្វេងលោក Ahn Cheol-soo ក៏មានសង្ឃឹមដូចគ្នាដែរ។

លោក Moon Jae-in រំពឹងថាអាចក្លាយជាប្រធានាធិបតីកូរ៉េខាងត្បូង ព្រោះប្រជាជនកូរ៉េខាងត្បូង ទំនងជាមិនអាចជ្រើសរើសបេក្ខជនមកពីក្រុមអភិរក្សដូចលោកស្រី ប៉ាក ហ្គឺនហេ ឡើយ។ ខុសពីការបោះឆ្នោតនាពេលកន្លងមក ប្រសិនបើបេក្ខជនណាត្រូវបានគណៈកម្មការរៀបចំការបោះឆ្នោតប្រកាសថាឈ្នះឆ្នោត បេក្ខជននោះនឹងត្រូវស្បថចូលកាន់តំណែងភ្លាមៗតែម្ដងមិនរង់ចាំយូរឡើយ។ លទ្ធផលផ្លូវការនឹងប្រកាសមួយថ្ងៃក្រោយការបោះឆ្នោត គឺនៅថ្ងៃទី១០ ខែឧសភា។

ការងារបន្ទាន់របស់ប្រធានាធិបតីថ្មី គឺត្រូវជ្រើសរើសនាយករដ្ឋមន្ត្រីថ្មី ដែលចាំបាច់ត្រូវការការយល់ព្រមពីសំណាក់សភា។ បន្ទាប់មក ប្រធានាធិបតីថ្មី ក៏ត្រូវរៀបចំគណៈរដ្ឋមន្ត្រីថ្មីរាប់ទាំងរដ្ឋមន្ត្រីហិរញ្ញវត្ថុ និងទីប្រឹក្សាសន្តិសុខជាតិ ប៉ុន្តែមិនចាំបាច់មានការយល់ព្រមពីសភាឡើយ។ មេដឹកនាំថ្មី ក៏ត្រូវប្រឈមមុខនឹងបញ្ហាជាច្រើនទៀតដូចជាការពង្រឹងសេដ្ឋកិច្ចឡើងវិញ និងត្រូវដោះស្រាយបញ្ហានុយក្លេអ៊ែរកូរ៉េខាងជើងទៀតផង៕