អន្តរជាតិ
ឌូទើតេ តែងតាំងមេទ័ពធ្វើរដ្ឋមន្ត្រីមហាផ្ទៃ ដើម្បីគ្រប់គ្រងប៉ូលិស ប្រធានាធិបតី រ៉ូឌ្រីហ្គោ ឌូទើតេ និងនាយសេធិការកងទ័ពហ្វីលីពីន អេឌូអាដូ អាញ៉ូ (រូបភាព Reuters)
× ប្រមុខកងទ័ពហ្វីលីពីនឧត្តមសេនីយ៍ អេឌូអាដូ អាញ៉ូ (Eduardo Año) នឹងក្លាយជារដ្ឋមន្ត្រីមហាផ្ទៃ ដែលទទួលខុសត្រូវគ្រប់គ្រងស្ថាប័នប៉ូលិស។ ប្រធានាធិបតី រ៉ូឌ្រីហ្គោ ឌូទើតេ (Rodrigo Duterte) និយាយថា លោកត្រូវការឧត្តមសេនីយ៍ អាញ៉ូ មកដឹកនាំក្រសួងមហាផ្ទៃដើម្បីត្រួតពិនិត្យប៉ូលិស ដែលកំពុងមានបញ្ហាពុករលួយយ៉ាងខ្លាំង។ លោក អាញ៉ូ ក្លាយជាឧត្តមសេនីយ៍មួយទៀត ដែលក្លាយជាសមាជិករដ្ឋាភិបាលលោក ឌូទើតេ ។
ប្រធានាធិបតីហ្វីលីពីន រ៉ូឌ្រីហ្គោ ឌូទើតេ បានប្រកាសថា នាយសេធិការកងទ័ពហ្វីលីពីនឧត្តមសេនីយ៍ អេឌូអាដូ អាញ៉ូ នឹងត្រូវមកគ្រប់គ្រងក្រសួងមហាផ្ទៃ និងរដ្ឋាភិបាលមូលដ្ឋាន បន្ទាប់ពីឧត្តមសេនីយ៍រូបនេះបញ្ចប់ការងារយោធារបស់ខ្លួននៅខែតុលា។ លោក ឌូទើតេ ប្រកាសបែបនេះ នៅឯសន្និសីទកាសែតថ្ងៃទី១០ ខែឧសភា នៅព្រលានយន្តហោះក្រុងម៉ានីល មុននឹងចាកចេញមកកាន់កម្ពុជា ដើម្បីចូលរួមកិច្ចប្រជុំវេទិកាសេដ្ឋកិច្ចពិភពលោកស្ដីពីអាស៊ាន។
ទាក់ទងមូលហេតុនៃការសម្រេចចិត្តជ្រើសរើសប្រមុខកងទ័ពឲ្យកាន់តំណែងរដ្ឋមន្ត្រីមហាផ្ទៃដែលត្រូវគ្រប់គ្រងប៉ូលិសដែរនោះ លោក ឌូទើតេ បានពន្យល់ថា ប៉ូលិសមានបញ្ហាខ្លាំងណាស់។ លោកបន្តថា មុនពេលមកដល់ព្រលានយន្តហោះ លោកបានអានរបាយការណ៍ស្ដីពីការចាប់ជំរិតមនុស្សដែលធ្វើឡើងដោយប៉ូលិស ដែលកំពុងចោមរោមដោយរឿងអាស្រូវពុករលួយស្រាប់។ ដូច្នេះទើបលោកត្រូវការមនុស្សដែលស្គាល់ប៉ូលិសច្បាស់។
តំណែងរដ្ឋមន្ត្រីមហាផ្ទៃនេះ បានទំនេរយូរគួរសមដែរហើយ ក្រោយ ឌូទើតេ បណ្ដេញលោក Ismael Sueno ចេញពីតំណែងនៅថ្ងៃទី៤ ខែមេសា ជុំវិញករណីពាក់ព័ន្ធអំពើពុករលួយ និងការបាត់ទំនុកចិត្ត។ លោក Ismael Sueno ដែលជាមនុស្សសំខាន់នៅពីក្រោយយុទ្ធនាការបោះឆ្នោតរបស់លោក ឌូទើតេ ជាមន្ត្រីជាន់ខ្ពស់ទី១ ដែលត្រូវបណ្ដេញចេញក្នុងយុទ្ធនាការប្រឆាំងអំពើពុករលួយរបស់លោក ឌូទើតេ ។
តាមពិតទៅ លោកប្រធានាធិបតី ឌូទើតេ ចង់ឲ្យលោក Ferdinand "Bongbong" Marcos Jr កាន់តំណែងនេះ តែលោក Marcos បានបដិសេធ។ ដោយសាររឿងនេះ លោក ឌូទើតេ ក៏ងាករកបេក្ខជនថ្មី ហើយក៏សម្រេចចិត្តជ្រើសរើសប្រមុខយោធាឧត្តមសេនីយ៍ អាញ៉ូ តែម្ដង។ ម្យ៉ាងទៀត ការជ្រើសរើសលោក អាញ៉ូ ក៏អាចជួយដល់យុទ្ធនាការបង្ក្រាបគ្រឿងញៀនដែលបញ្ហាខ្លះដោយសាររឿងអាស្រូវរបស់ប៉ូលិសនោះ។
យ៉ាងណាក្ដី ឧត្តមសេនីយ៍ អាញ៉ូ មិនទាន់ចូលកាន់តំណែងរដ្ឋមន្ត្រីមហាផ្ទៃនេះភ្លាមឡើយ ហើយលោកត្រូវបន្តតំណែងប្រមុខកងទ័ពរហូតដល់ខែតុលា។ លោក ឌូទើតេ បញ្ជាក់ថា លោកចង់ឲ្យលោក អាញ៉ូ បន្តការងារសិន ព្រោះកងទ័ពមានគម្រោងសំខាន់ៗជាច្រើនដែលត្រូវការលោក អាញ៉ូ ដឹកនាំឲ្យចប់ចុងចប់ដើម។ លោក អាញ៉ូ ជាអតីតប្រមុខកងទ័ពទី៦ ក្នុងជួររដ្ឋាភិបាល បន្ទាប់ពីលោក ឌូទើតេ ទើបតែតែងតាំងអតីតប្រមុខយោធា Roy Cimatu ជារដ្ឋមន្ត្រីបរិស្ថាន និងធនធានធម្មជាតិថ្មីៗនេះ៕
Tag:
ហ្វីលីពីន
Rodrigo Duterte
© រក្សាសិទ្ធិដោយ thmeythmey.com