រដ្ឋាភិបាល និងក្រុមហ៊ុនឯកជនមួយ ចំណាយថវិកា៤លានដុល្លារ សាងសង់ពន្ធនាគារបង់ថ្លៃសេវាថែទាំសុខភាព

ជាតិ

រដ្ឋាភិបាល និងក្រុមហ៊ុនឯកជនមួយ ចំណាយថវិកា៤លានដុល្លារ សាងសង់ពន្ធនាគារបង់ថ្លៃសេវាថែទាំសុខភាព

12, May 2017 , 8:39 am

រូបភាព

ដោយ: តន ចាន់រិទ្ធារ៉ា

ភ្នំពេញ៖ រដ្ឋាភិបាល បានសហការជាមួយក្រុមហ៊ុន គន្ធរីខុន ហូលឌីង ដែលបានវិនិយោគលើការសាងសង់អគារស្នាក់នៅ និងអប់រំកែប្រែអ្នកប្រើប្រាស់គ្រឿងញៀន ដោយមានផ្ដល់សេវាថែទាំសុខភាព សម្រាប់ជនជាប់ទោសទាំងឡាយណា ដែលមានលទ្ធភាពបង់ថ្លៃសេវាដោយស្ម័គ្រចិត្ត។

ថ្លែងក្នុងពិធីបញ្ចុះបឋមសីមាសាងសង់អគារពន្ធនាគារថ្មីនេះ រដ្ឋលេខាធិការក្រសួងមហាផ្ទៃ លោក ប៉ាវ ហមផាន បានឲ្យថា ពន្ធនាគារបង់ថ្លៃសេវានេះ គឺជាផ្នែកមួយនៃការលើកកម្ពស់មុខងារអប់រំកែប្រែរបស់មណ្ឌលអប់រំកែប្រែទី១ ដើម្បីឆ្លើយតបនឹងយុទ្ធសាស្ត្រកំណែទម្រង់នៃការគ្រប់គ្រងពន្ធនាគាររបស់រាជរដ្ឋាភិបាល។

បើតាមលោក ប៉ាវ ហមផាន បន្ថែមថា អគារពន្ធនាគារថ្មីនេះ មានផ្តល់សេវាកម្មថែទាំសុខភាពដូចជា សេវាកម្មអគារស្នាក់នៅសម្រាប់ជនជាប់ឃុំ ,សេវាកម្មសុខាភិបាលសម្រាប់ជនជាប់ឃុំ និងសេវាផ្តាច់គ្រឿងញៀន ,សេវាកម្មផ្គត់ផ្គង់អាហារ និងសម្ភារៈជាដើម។

គម្រោងសាងសង់ពន្ធនាគារផ្ដល់សេវាកម្មនេះ នឹងបញ្ចប់នៅពាក់កណ្តាលឆ្នាំ២០១៨ខាងមុខនេះ ក្នុងទំហំវិនិយោគជាង ៤លាន ដុល្លារសហរដ្ឋអាមេរិក លើផ្ទៃដីទំហំជាង ១ហិកកា ស្ថិតក្នុងមណ្ឌលអប់រំកែប្រែទី១។ អគារពន្ធនាគារថ្មីនេះអាចផ្ទុកអ្នកជាប់ពន្ធនាគារចំនួន១,២០០នាក់។ នេះជាការបញ្ជាក់របស់លោក យ៉ាវ ចេងមិញ អគ្គនាយករងក្រុមហ៊ុន គន្ធរីខុនហូលឌីង៕

ប្រភពអគ្គស្នងការដ្ឋាននគរបាលជាតិ