អន្តរជាតិ
កូរ៉េខាងជើង បង្ហាញឈ្មោះមេខ្លោងនៅពីក្រោយផែនការធ្វើឃាតលោក គីម ជុងអ៊ុន
× រដ្ឋអាជ្ញាកូរ៉េខាងជើង បានបង្ហាញឈ្មោះអ្នករៀបចំផែនការចំនួន៤នាក់ ជុំវិញការប៉ុនប៉ងធ្វើឃាតមេដឹកនាំកំពូលរបស់ខ្លួន លោក គីម ជុងអ៊ុន ដែលកូរ៉េខាងជើងអះអាងថា នៅពីក្រោយដោយទីភ្នាក់ងារស៊ើបអង្កេតកណ្ដាល CIA និងអង្គភាពចារកម្មកូរ៉េខាងត្បូង។ កូរ៉េខាងជើង បានស្នើឲ្យអាមេរិក និងកូរ៉េខាងត្បូង បញ្ជូនមេខ្លោងទាំង៤ មកឲ្យខ្លួនដើម្បីកាត់ទោស។
មនុស្សចំនួន៤នាក់ ត្រូវបានកូរ៉េខាងជើងចោទថាបានរៀបចំផែនការសម្លាប់លោក គីម ជុងអ៊ុន ដោយប្រើសារធាតុគីមី។ កាលពីសប្ដាហ៍ កូរ៉េខាងជើងនិយាយថា ភេវរករមួយក្រុមដែលគាំទ្រដោយ CIA របស់អាមេរិក និងអង្គភាពចារកម្មរបស់កូរ៉េខាងត្បូង បានជ្រៀតចូលទឹកដីរបស់ខ្លួន ក្នុងគោលដៅធ្វើឃាតលោក គីម ជុងអ៊ុន។
ការិយាល័យរដ្ឋអាជ្ញាកូរ៉េខាងជើងបានប្រកាសថា ខ្លួន នឹងដាក់ទោសឲ្យធ្ងន់ធ្ងរបំផុតលើមេគំនិតរៀបចំផែនការធ្វើឃាត ព្រមទាំងកូនចៅរបស់ពួកគេដែរ។ បើតាមទីភ្នាក់ព័ត៌មានកូរ៉េខាងត្បូង Yonhap ក្នុងចំណោមមេខ្លោងទាំង៤ ក៏មានឈ្មោះ Lee Byong-ho ប្រធានទីភ្នាក់ងារចារកម្មកូរ៉េខាងត្បូងដែរ។ ប៉ុន្តែលោក Lee Byong-ho នឹងចាកចេញពីតំណែងនៅពេលខាងមុខ ព្រោះតំណែងនេះត្រូវបានប្រគល់ទៅឲ្យលោក Suh Hoon វិញ។
ជាមួយនឹងការប្រកាសឈ្មោះមេគំនិត រដ្ឋអាជ្ញាកូរ៉េខាងជើង ក៏បានចាប់ផ្ដើមដំណើរការក្ដីផងដែរ ដោយអនុលោមតាមច្បាប់ឧក្រិដ្ឋរបស់ខ្លួន។ កូរ៉េខាងជើង ក៏ស្នើធ្វើបត្យាប័នជនសង្ស័យទាំងអស់ផងដែរ គឺទាំងអ្នករៀបចំផែនការ អ្នកចូលរួមគំនិតក្នុងផែនការភេរវកម្មគាំទ្រដោយរដ្ឋប្រឆាំងមេដឹកនាំកំពូល គីម ជុងអ៊ុន។ ប៉ុន្តែការស្នើរបស់កូរ៉េខាងជើង ទំនងជាមិនទទួលបានការឆ្លើយតបវិជ្ជមានឡើយ ហើយទាំងអាមេរិក ទាំងកូរ៉េខាងត្បូង មិនប្រគល់មន្ត្រីរបស់ខ្លួនឲ្យកូរ៉េខាងជើងដែរ។
ទាក់ទិននឹងរឿងនេះ កូរ៉េខាងជើងអះអាងថា អង្គភាពចារកម្មកូរ៉េខាងត្បូង បានរួមគំនិតជាមួយ CIA និងបានផ្ដល់ប្រាក់ឲ្យកម្មករកូរ៉េខាងជើងធ្វើការនៅរុស្ស៊ីក្នុងឆ្នាំ២០១៤ ដើម្បីឲ្យកម្មករដែលមានត្រកូលគីម ធ្វើសកម្មភាពសម្លាប់លោក គីម ជុងអ៊ុន ។ កូរ៉េខាងជើង ក៏ចោទកូរ៉េខាងត្បូងថាបានផ្ដល់លុយចំនួន២ម៉ឺនដុល្លារ និងឧបករណ៍ទទួលព័ត៌មានពីផ្កាយរណប ដើម្បីធ្វើឃាតមេដឹកនាំកូរ៉េខាងជើង ដោយប្រើសារធាតុគីមី។
លើសពីនេះ កូរ៉េខាងជើង ក៏គំរាមបើកយុទ្ធនាការប្រឆាំងភេរវកម្ម ដែលខ្លួនលើកឡើងថាផ្ដូចផ្ដើមគំនិតដោយអាមេរិក និងកូរ៉េខាងត្បូងផ្ទាល់។ គេមិនទាន់ច្បាស់ពីការគំរាមនេះឡើយ ហើយក៏មិនដឹងថាកូរ៉េខាងជើង នឹងធ្វើតាមការគំរាមរបស់ខ្លួនដែរ ព្រោះកូរ៉េខាងជើងតែងតែគំរាមរបៀបនេះរហូតមក។ យ៉ាងណាក្ដី កូរ៉េខាងជើងអាចសងសឹកតាមរយៈការធ្វើទុក្ខបុកម្នេញជនជាតិអាមេរិកដែលកំពុងជាប់ឃុំខ្លួននៅកូរ៉េខាងជើងក៏ថាបាន៕
Tag:
កូរ៉េខាងជើង
កូរ៉េខាងត្បូង
CIA
គីម ជុងអ៊ុន
© រក្សាសិទ្ធិដោយ thmeythmey.com