ពូទីន ប្រាប់ប្រធានាធិបតីកូរ៉េខាងត្បូងថា រុស្ស៊ីត្រៀមខ្លួនរួចរាល់ដើម្បីដោះស្រាយវិបត្តិកូរ៉េខាងជើង

អន្តរជាតិ

ពូទីន ប្រាប់ប្រធានាធិបតីកូរ៉េខាងត្បូងថា រុស្ស៊ីត្រៀមខ្លួនរួចរាល់ដើម្បីដោះស្រាយវិបត្តិកូរ៉េខាងជើង

13, May 2017 , 7:39 pm

រូបភាព

ដោយ: តន ចាន់រិទ្ធារ៉ា

រុស្ស៊ី ត្រៀមខ្លួនរួចរាល់ហើយក្នុងការជួយដោះស្រាយវិបត្តិនុយក្លេអ៊ែរកូរ៉េខាងជើង។ នេះជាអ្វីដែលប្រធានាធិបតីរុស្ស៊ី វ្ល៉ាឌីមៀ ពូទីន និយាយក្នុងទូរសព្ទជាមួយសមភាគីកូរ៉េខាងត្បូង មូន ចេអ៊ីន (Moon Jae-in) ដែលទើបចូលកាន់តំណែងថ្មីៗនេះ។ រុស្ស៊ី ដែលមិនពេញចិត្តវត្តមានប្រព័ន្ធការពារ THAAD នៅកូរ៉េខាងត្បូង មានជំហរដោះស្រាយនុយក្លេអ៊ែរនៅឧបទ្វីបកូរ៉េដោយសន្តិវិធី និងបានជំទាស់ការប្រើប្រាស់កម្លាំងលើកូរ៉េខាងជើងដែរ។

កាន់តំណែងមិនទាន់បានប៉ុន្មានថ្ងៃផងនោះ ប្រធានាធិបតីថ្មីកូរ៉េខាងត្បូង មូន ចេអ៊ីន បាននិយាយទូរសព្ទជាមួយដៃគូសំខាន់ៗស្ទើរទាំងអស់ទៅហើយ។ ប្រធានាធិបតីអាមេរិក ដូណាល់ ត្រាំ ប្រធានាធិបតីចិន ស៊ី ជីនភីង និងនាយករដ្ឋមន្ត្រីជប៉ុន ស៊ីនហ្សូ អាបេ សុទ្ធតែបានជជែកតាមទូរសព្ទជាមួយលោក មូន ចេអ៊ីន រួចហើយទាំងអស់។ បញ្ហាធំពីរនៃការជជែកតាមទូរសព្ទនេះ គឺទំនាក់ទំនងទ្វេភាគី និងកម្មវិធីនុយក្លេអ៊ែរកូរ៉េខាងជើងតែម្ដង។

មកដល់ថ្ងៃទី១២ ខែឧសភា លោក មូន ចេអ៊ីន ក៏បន្តនិយាយទូរសព្ទជាមួយដៃគូសំខាន់មួយទៀត គឺប្រធានាធិបតីរុស្ស៊ី វ្ល៉ាឌីមៀ ពូទីន។ មិនខុសពីការជជែកតាមទូរសព្ទជាមួយដៃគូសន្ទនាដទៃទៀត មេដឹកនាំកូរ៉េខាងត្បូង និងរុស្ស៊ី ក៏បាននិយាយដល់បញ្ហាកូរ៉េខាងជើងដែរ។ លោក ពូទីន បានប្រាប់សមភាគីថ្មីថ្មោង មូន ចេអ៊ីន ថា រុស្ស៊ី នៅតែរក្សាជំហរជួយដោះស្រាយកម្មវិធីនុយក្លេអ៊ែរនេះឲ្យបានដដែល។

រុស្ស៊ី ដែលមានព្រំដែន១៩គីឡូម៉ែត្រជាមួយកូរ៉េខាងជើង ជាតួអង្គមិនអាចខ្វះបានក្នុងការដោះស្រាយបញ្ហានៅឧបទ្វីបកូរ៉េ។ រុស្ស៊ី ព្រមទាំងចិន គឺជាមហាអំណាចពីរដែលនៅអាចនិយាយគ្នាជាមួយកូរ៉េខាងជើង។ ប៉ុន្តែមួយរយៈពេលចុងក្រោយ ចិនហាក់បង្ហាញជំហរម៉ឺងម៉ាត់ខ្លាំងដាក់កូរ៉េខាងជើង ដែលរឿងនេះធ្វើឲ្យកូរ៉េខាងជើងអន់ចិត្តយ៉ាងខ្លាំង។ នេះ ក៏ព្រោះចិនរងសម្ពាធខ្លាំងពីរដ្ឋបាលប្រធានាធិបតី ដូណាល់ ត្រាំ ដែលតែងរកបញ្ហាពាណិជ្ជកម្មមកសង្កត់ចិនរហូត។

ងាកមករឿងនិយាយទូរសព្ទវិញ មេដឹកនាំរុស្ស៊ី និងកូរ៉េខាងត្បូង ក៏សន្យាពង្រឹងទំនាក់ទំនងទ្វេភាគីឲ្យកាន់តែប្រសើរឡើងដែរ។ បើការផ្សាយរបស់ទីភ្នាក់ងារព័ត៌មាន Reuters ប្រធានាធិបតីប្រទេសទាំងពីរ ក៏បានអញ្ជើញគ្នាទស្សនកិច្ចផ្លូវរដ្ឋនៅប្រទេសរៀងៗខ្លួនដែរ។ ជាមួយគ្នានេះ លោក មូន ចេអ៊ីន ក៏និយាយដែរថា លោក នឹងបញ្ជូនប្រេសិតទៅកាន់រុស្ស៊ីទៀតផង។ លោក ពូទីន ឆ្លើយវិញថា លោកនឹងទទួលប្រេសិតពិសេសកូរ៉េខាងត្បូងដោយផ្ទាល់។

ទំនាក់ទំនងរវាងរុស្ស៊ី និងកូរ៉េខាងត្បូង មិនសូវជាល្អប៉ុន្មានឡើយ មុនការឡើងកាន់អំណាចរបស់លោក មូន ចេអ៊ីន ។ ក្រុងមូស្គូ ជំទាស់យ៉ាងខ្លាំងការពង្រាយប្រព័ន្ធការពារមីស៊ីល THAAD របស់ក្រុងវ៉ាស៊ីនតោននៅឧបទ្វីបកូរ៉េ។ រដ្ឋបាលក្រុងសេអ៊ូលក្រោមអាណត្តិលោកស្រី ប៉ាក ហ្គឺនហេ បានសម្រេចពង្រាយប្រព័ន្ធការពារនេះ ដើម្បីទប់ទល់មីស៊ីលកូរ៉េខាងជើង បើទោះជាក្រុងមូស្គូ និងក្រុងប៉េកាំងលើកឡើងថា ប្រព័ន្ធការពារនេះប៉ះពាល់ដល់អធិបតេយ្យរបស់ពួកគេក៏ដោយ៕