បក្សកាន់អំណាច និងបក្សប្រឆាំង ត្រៀមខ្លួនរួចហើយ ដើម្បីចូលរួមឃោសនាបោះឆ្នោត

ជាតិ

បក្សកាន់អំណាច និងបក្សប្រឆាំង ត្រៀមខ្លួនរួចហើយ ដើម្បីចូលរួមឃោសនាបោះឆ្នោត

15, May 2017 , 9:19 pm

រូបភាព

ដោយ: ម៉ៅ សុផា

ភ្នំពេញ៖ រហូតមកដល់ពេលនេះ គណបក្សសង្គ្រោះជាតិ និងគណបក្សប្រជាជនកម្ពុជា សុទ្ធតែបានរៀបចំលក្ខណៈរួចរាល់អស់ហើយ ដើម្បីធ្វើយុទ្ធនាការនៃការឃោសនាបោះឆ្នោតថ្នាក់ឃុំ សង្កាត់ ដែលនឹងចាប់ផ្តើមពីថ្ងៃទី២០ ខែឧសភា ដល់ថ្ងៃទី២ ខែមិថុនា ឆ្នាំ២០១៧។

លោក យឹម សុវណ្ណ អ្នកនាំពាក្យគណបក្សសង្គ្រោះជាតិ បានប្រាប់សារព័ត៌មានថ្មីៗថា អ្វីៗ គឺគណបក្សសង្គ្រោះជាតិ បានគិតគូររួចហើយ សម្រាប់ការឃោសនាបោះឆ្នោត។ លោក លើកឡើងដូច្នេះថា៖«ថវិកា ធនធានមនុស្ស សារនយោបាយ និងបទចម្រៀង គឺយើងរៀបចំអស់ហើយ»។

បើតាមលោក យឹម សុវណ្ណ គណបក្សសង្គ្រោះជាតិ បានត្រៀមថវិកាប្រមាណជា ២លានដុល្លារ សម្រាប់ការឃោសនាបោះឆ្នោត។ លោក បញ្ជាក់ថា ថវិកាទាំងនេះ គឺបានមកពីមន្ត្រីគណបក្សនៅថ្នាក់ក្រោមជាតិ និងមន្ត្រីគណបក្សនៅថ្នាក់ជាតិ រួមទាំងអ្នកគាំទ្រនៅឯបរទេស។

អ្វីដែលអ្នកនាំពាក្យបក្សប្រឆាំងរូបនេះ ចាត់ទុកថាសំខាន់ជាងគេ នៅក្នុងយុទ្ធនាការនៃការឃោសនាបោះឆ្នោត គឺធ្វើយ៉ាងណា កុំឲ្យមានអំពើហិង្សាកើតឡើង។ លោក សង្កត់ធ្ងន់ថា ដើម្បីកុំឲ្យមានអំពើហិង្សាកើតឡើង សកម្មជន និងឃោសនិករបស់បក្សប្រឆាំង ត្រូវតែប្រកាន់ភ្ជាប់នូវក្រមសីលធម៌ ដោយមិនត្រូវប្រើពាក្យអសុរោះ ឬជេរប្រមាថទៅលើអ្នកដទៃ ជាដាច់ខាត។

ចំណែកឯ គណបក្សប្រជាជនកម្ពុជា ក៏បានរៀបចំថវិកា និងចំនួនមនុស្សរួចហើយដែរ ដើម្បីធ្វើយុទ្ធនាការនៃការឃោសនាបោះឆ្នោត។ នេះបើតាមលោក សុខ ឥសាន អ្នកនាំពាក្យគណបក្សប្រជាជនកម្ពុជា។

យ៉ាងណា លោក សុខ ឥសាន មិនអាចបញ្ជាក់បានទេ ថាគណបក្សប្រជាជនកម្ពុជា នឹងត្រូវចំណាយថវិកាប៉ុន្មាន ឬក៏ត្រូវមានចំនួនមនុស្សប៉ុន្មាននាក់ សម្រាប់ការឃោសនាបោះឆ្នោត។ អ្នកនាំពាក្យបក្សកាន់អំណាចរូបនេះ ប្រាប់សារព័ត៌មានថ្មីៗដូច្នេះថា៖«យើងត្រៀមរួចយូរហើយ រឿងឃោសនាហ្នឹងនុ៎ះ។ តែយើង មិនអាចប៉ាន់ស្មានបានទេ ថាយើងមានថវិកាប៉ុន្មាន និងមនុស្សប៉ុន្មាន។ តែបើថ្នាក់ក្រោមខ្វះខាតអ្វីមួយ ហើយប្រាប់មកថ្នាក់លើ គឺយើងនឹងជួយតែម្តង»។

សម្រាប់លោក សុខ ឥសាន យន្តការ ដើម្បីបញ្ចៀសអំពើហិង្សាក្នុងអំឡុងនៃការឃោសនាបោះឆ្នោត គឺការប្រកាន់ភ្ជាប់នូវក្រមសីលធម៌ និងគោលការណ៍ ដែលគណៈកម្មាធិការជាតិរៀបចំការបោះឆ្នោត (គ.ជ.ប) បានកំណត់។

សូមបញ្ជាក់ថា ការឃោសនាបោះឆ្នោតថ្នាក់ឃុំ សង្កាត់ នាអាណត្តិទី៤នេះ ហាក់មានសភាពតឹងរឹងជាងអាណត្តិមុនៗ។ គ.ជ.ប បានផ្តល់រយៈពេលត្រឹមតែ១៤ថ្ងៃ ឲ្យគណបក្សនយោបាយ ឃោសនាពីគោលនយោបាយ។ ហើយ ក្នុងរយៈពេល១៤ថ្ងៃនោះ គណបក្សនយោបាយ មានរយៈពេលតែ២ថ្ងៃប៉ុណ្ណោះ ដើម្បីដង្ហែក្បួនឃោសនាបោះឆ្នោត។ ម្យ៉ាងទៀត ក្បួនឃោសនាបោះឆ្នោតក្នុងឃុំ សង្កាត់មួយ មិនអាចដង្ហែឆ្លងទៅកាន់ឃុំ សង្កាត់មួយផ្សេងទៀត នោះទេ៕