អន្តរជាតិ
បារាំង មិនគាំទ្រការជំពាក់បំណុលរួមគ្នាជាមួយរដ្ឋអឺរ៉ុបឡើយ អធិការបតីអាល្លឺម៉ង់ អែនជេឡា មើគែល និងប្រធានាធិបតីបារាំង អេម៉ានុយអែល ម៉ាក្រុង ក្នុងសន្និសីទកាសែរួមគ្នា (រូបភាព Xinhua)
× ប្រធានាធិបតីបារាំងថ្មី អេម៉ានុយអែល ម៉ាក្រុង បានផ្ដើមទស្សនកិច្ចបរទេសលើកដំបូងទៅកាន់អាល្លឺម៉ង់ ដើម្បីជួបពិភាក្សារឿងកិច្ចការអឺរ៉ុបជាមួយអធិការបតី អែនជេឡា មឺហ្កែល ។ ទាំងលោក ម៉ាក្រុង ទាំងលោកស្រី មឺហ្កែល សុទ្ធតែយល់ស្របគ្នាថា ការកែទម្រង់អឺរ៉ុបគឺជារឿងចាំបាច់ និងបន្ទាន់។ ហើយបារាំង និងអាល្លឺម៉ង់ ក៏អាចចាប់ដៃគ្នាកសាងផែនទីចង្អុលផ្លូវសម្រាប់សហភាពអឹរ៉ុប និងតំបន់ចាយលុយអឺរ៉ូដែរ។
អាល្លឺម៉ង់ គឺជាទិសដៅទី១ របស់ប្រធានាធិបតីបារាំងថ្មី អេម៉ានុយអែល ម៉ាក្រុង ។ លោក ម៉ាក្រុង ទៅដល់រដ្ឋធានីបែរឡាំងនៅថ្ងៃទី១៥ ខែឧសភា តែមួយថ្ងៃក្រោយលោកស្បថចូលកាន់តំណែងប្រធានាធិបតីបារាំង។ លោក ម៉ាក្រុង សម្រេចចិត្តទៅអាល្លឺម៉ង់មុនគេ ព្រោះលោកដឹងច្បាស់ថា អំណើះតទៅ មានតែបារាំង និងអាល្លឺម៉ង់ទេដែលត្រូវដឹកនាំអឺរ៉ុបទៅមុខ ក្រោយចក្រភពអង់គ្លេសសម្រេចចិត្តចាកចេញទៅហើយ។
លោកប្រធានាធិបតី ម៉ាក្រុង បានប្រាប់អធិការបតី អែនជេឡា មឺហ្កែល ថា បារាំងមិនជំទាស់នឹងកែប្រែសន្ធិសញ្ញាអឺរ៉ុប ហើយលោកសប្បាយចិត្តនឹងសហការជាមួយលោកស្រី មើរគែល ដើម្បីផ្លាស់ប្ដូរសហភាពអឺរ៉ុបដូចគ្នា។ លោកបន្តថា ការងារកែទម្រង់អឺរ៉ុប ចាំបាច់ត្រូវការការសហការគ្នារវាងបារាំង និងអាល្លឺម៉ង់។ លោកស្រី មើរគែល បានឆ្លើយតបវិញដោយបង្ហាញការគាំទ្រសម្ដីរបស់លោក ម៉ាក្រុង តែក៏បានសង្កត់ធ្ងន់ថា អ្វីៗមិនអាចសម្រេចបានក្នុងរយៈពេលខ្លីឡើយ។
បើតាមទីភ្នាក់ងារព័ត៌មាន Reuters អធិការបតីអាល្លឺម៉ង់ បានប្រាប់ប្រធានាធិបតីបារាំងដែរថា បញ្ហារបស់អង់គ្លេស ជារឿងមិនអាចដោះស្រាយបាន តែមានបញ្ហាជាច្រើនទៀតដែលអឺរ៉ុបត្រូវគិតដូចជាការកែទម្រង់ស៊ីជម្រៅនៅក្នុងតំបន់សហភាពអឺរ៉ុប និងប្លុកចាយលុយអឺរ៉ុបជាដើម។ ចំពោះការកែប្រែសន្ធិសញ្ញាអឺរ៉ុបវិញ លោកស្រី មឺហ្កែល មិនជំទាស់ឡើយព្រោះវាបើកផ្លូវដល់ការផ្លាស់ប្ដូរអឺរ៉ុប តែលោកស្រីចង់ដឹងថា អ្វីដែលត្រូវកែប្រែមុនគេ។
ក្នុងសន្និសីទកាសែតបន្ទាប់ពីជំនួបទល់មុខគ្នាលើកទី១ នេះ លោក ម៉ាក្រុង ក៏បង្ហាញជំហរប្រឆាំងគំនិតបង្កើតតំបន់បំណុលរួមគ្នានៅក្នុងចំណោមរដ្ឋចាយលុយអឺរ៉ូ។ អ្នកនយោបាយអភិរក្សនៅអាល្លឺម៉ង់ បាមរម្ភថាលោក ម៉ាក្រុង នឹងជំរុញឲ្យគំនិតបែបនេះលេចជារូបរាង ដ្បិតវានឹងបង្កផលវិបាកសម្រាប់អាល្លឺម៉ង់មិនខាន។ នេះ ក៏ព្រោះពេលបោះពុម្ពបណ្ណបំណុលរួមគ្នានោះ លុយនឹងហូរចេញអាល្លឺម៉ង់កាន់តែច្រើន ដោយសារគេទុកចិត្តលើអាល្លឺម៉ង់។
ច្បាស់ណាស់ថា លោក ម៉ាក្រុង នឹងមិនបង្កការលំបាកឲ្យអាល្លឺម៉ង់ឡើយ ព្រោះគំនិតនៃការបង្កើតតំបន់បំណុលរួមគ្នានេះលេចជារូបរាងមែននោះ សូម្បីតែបារាំងផ្ទាល់ក៏រងផលប៉ះពាល់ដែរ។ ម្យ៉ាងទៀត ដោយសារគំនិតនេះ ក៏មិនមែនជាអាទិភាពនៃការកែទម្រង់សហភាពអឺរ៉ុបដែលបារាំង និងអាល្លឺម៉ង់ដឹកនាំដែរ។ នៅពេលនេះ បារាំង និងអាល្លឺម៉ង់ កំពុងចាប់ដៃគ្នាគូសវាសផែនទីសម្រាប់ការងារដ៏សំខាន់នេះ ដើម្បីឈានដល់ការបើកទ្វារសម្រាប់មហិច្ឆតាផ្លាស់ប្ដូរអឺរ៉ុប៕
Tag:
បារាំង
អាល្លឺម៉ង់
អេម៉ានុយអែល ម៉ាក្រុង
អែនជេឡា មើគែល
© រក្សាសិទ្ធិដោយ thmeythmey.com