អន្តរជាតិ
អាមេរិក ចោទថារដ្ឋាភិបាលស៊ីរីដុតសាកសពដើម្បីបិទបាំងការសម្លាប់រង្គាល រូបភាពពន្ធនាគារ Saydnaya ថតតាមផ្កាយរណប (រូបភាព EPA)
× រដ្ឋបាលអាមេរិក បានចោទប្រកាន់រដ្ឋាភិបាលស៊ីរីថាបានបង្កើតកន្លែងដុតសាកសពនៅក្នុងពន្ធនាគាររបស់ខ្លួន ដើម្បីកម្ទេចសាកសពអ្នកទោសរាប់ពាន់នាក់ដែលត្រូវបានសម្លាប់ក្នុងពេលឃុំខ្លួន។ មន្ត្រីក្រសួងការបរទេសអាមេរិក បានបង្ហាញរូបភាពថតពីផ្កាយរណបនៃពន្ធនាគារយោធា Saydnaya ក្បែរក្រុងដាម៉ាស់ ហើយគេឃើញមានព្រិលគ្របដណ្ដប់ពីអាគារដែលសង្ស័យថាជាកន្លែងកម្ទេចសាកសពជនរងគ្រោះ។
អាមេរិកនិយាយថា ខ្លួនមានភស្តុតាងបង្ហាញសកម្មភាពដុតសាកសពអ្នកជាប់ពន្ធនាគារ Saydnaya ដើម្បីបិទបាំងការសម្លាប់រង្គាលរបស់ខ្លួន។ លោក Stuart Jones ឧបការីរងក្រសួងការបរទេសអាមេរិក បានបង្ហាញរូបភាពពន្ធនាគារយោធាភាគខាងជើងរដ្ឋធានីដាម៉ាស់ដែលអាគារនៅទីនោះ ត្រូវបានកែប្រែឲ្យក្លាយជាកន្លែងដុតសាកសពអ្នកទោស ក្នុងគោលដៅបំផ្លាញភស្តុតាងសកម្មភាពឃោរឃៅរបស់រដ្ឋាភិបាលស៊ីរី។
បើតាមសារព័ត៌មាន Al Jazeera លោក Stuart Jones អះអាងថា យោធាស៊ីរី បានចាប់ផ្ដើមកែប្រែសំណង់អាគារក្នុងពន្ធនាគារ Saydnaya ក្នុងឆ្នាំ២០១៣ ។ លោកបន្តថា បើទោះជាការសម្លាប់រង្គាលនៅស៊ីរីត្រូវបានកត់ត្រាច្បាស់លាស់ក្ដី អាគារពន្ធនាគារដែលត្រូវកែប្រែឡើងវិញ បានបង្ហាញពីការប្រឹងប្រែងរបស់យោធាស៊ីរី ក្នុងការបិទបាំងទង្វើមិនល្អរបស់ខ្លួន។
មន្ត្រីជាន់ខ្ពស់ក្រសួងការបរទេសអាមេរិករូបនេះបញ្ជាក់ដែរថា ព័ត៌មានជុំវិញការសម្លាប់រង្គាលនេះ គឺលោកទទួលបានពីទីភ្នាក់ងារមនុស្សធម៌ដែលអាចទុកចិត្តបាន និងពីចារកម្មរបស់អាមេរិក។ បើតាមព័ត៌មានដែលលោក Stuart Jones ទទួលបាន យ៉ាងហោចណាស់មានអ្នកទោស៥០នាក់ ត្រូវបានព្យួរករៀងរាល់ថ្ងៃ។ លោក Stuart Jones ក៏បានស្រង់ចំនួនអ្នកស្លាប់ក្នុងពន្ធនាគារនេះពីរបាយការណ៍អង្គការលើកលែងទោសអន្តរជាតិ ដែលមានចំនួនចន្លោះ៥ពាន់នាក់ ដល់លើស១ម៉ឺននាក់។
ប៉ុន្តែអ្វីដែលគួរឲ្យកត់សម្គាល់នោះ រូបភាពដែលលោក Stuart Jones យកមកបង្ហាញ ត្រូវបានថតតាំងពីឆ្នាំ២០១៥ មកម្ល៉េះ។ គេមិនដឹងថាហេតុអ្វីបានជារដ្ឋបាលអាមេរិកទើបបញ្ចេញរូបភាពពន្ធនាគារនៅពេលនេះឡើយ។
អ្វីដែលជាបញ្ហានោះ គឺវិបត្តិស៊ីរីបានអូសបន្លាយមកដល់ឆ្នាំទី៧ ហើយ ខណៈដំណោះស្រាយនៅតែងងឹតសូន្យសុងដដែល។ ប្រជាជនស៊ីរីជិតកន្លះលាននាក់ស្លាប់ដោយសារសង្គ្រាមហើយប្រជាជនពាក់កណ្ដាលប្រទេស ត្រូវរត់ភៀសខ្លួនទាំងក្នុងប្រទេស និងទៅក្រៅប្រទេស។ ការវាយប្រយុទ្ធរវាងកម្លាំងរដ្ឋាភិបាល និងក្រុមឧទ្ទាមប្រឆាំង ក៏ចេះតែបន្តនៅតំបន់ប្រទាញប្រទង់ជាច្រើន។ ដោយឡែកការចរចាស្វែងរកសន្តិភាពវិញ ក៏បន្តជាប់គាំងរកច្រកចេញមិនបានដដែល បើទោះជាមានការជួបគ្នាជាច្រើនលើកក្ដី៕
© រក្សាសិទ្ធិដោយ thmeythmey.com