អាមេរិក ព្រមានដាក់ទណ្ឌកម្មប្រទេសដែលគាំទ្រកូរ៉េខាងជើង

អន្តរជាតិ

អាមេរិក ព្រមានដាក់ទណ្ឌកម្មប្រទេសដែលគាំទ្រកូរ៉េខាងជើង

17, May 2017 , 11:51 am

រូបភាព

ទូតអាមេរិកប្រចាំអង្គការសហប្រជាជាតិ លោកស្រី Nikki Haley

ដោយ: តន ចាន់រិទ្ធារ៉ា

ក្រុមប្រឹក្សាសន្តិសុខអង្គការសហប្រជាជាតិ បានកោះប្រជុំបន្ទាន់នៅថ្ងៃទី១៦ ខែឧសភា ដើម្បីពិភាក្សាលើការបាញ់មីស៊ីលរបស់កូរ៉េខាងជើង។ នៅមុនកិច្ចប្រជុំបន្តិចអគ្គរដ្ឋទូតអាមេរិក Nikki Haley ប្រកាសថា អាមេរិកនឹងរឹតបន្តឹងទណ្ឌកម្មបន្ថែមទៀតលើកូរ៉េខាងជើង ដែលចេះតែបាញ់មីស៊ីលជាញឹកញាប់ ហើយប្រទេសដែលគាំទ្រកូរ៉េខាងជើង ក៏មិនរួចខ្លួនដែរ។ ប៉ុន្តែអាមេរិកនៅតែបើកទ្វារចរចា បើកូរ៉េខាងជើងឈប់សាកល្បងនុយក្លេអ៊ែរ ឬក៏បាញ់មីស៊ីលបន្តទៀត។

បន្ទាប់ពីអាក់ខានយូរគួរសម កូរ៉េខាងជើងបានបាញ់មីស៊ីលជាថ្មីទៀតនៅថ្ងៃទី១៥ ខែឧសភា ដែលកូរ៉េខាងជើងផ្ទាល់អះអាងថា មីស៊ីលដែលបាញ់ដោយជោគជ័យនេះ ជាមីស៊ីលរយៈចម្ងាយមធ្យមប្រភេទថ្មី និងអាចបំពាក់ក្បាលគ្រាប់នុយក្លេអ៊ែរបាន។ អាមេរិក ជប៉ុន និងកូរ៉េខាងត្បូង បានរិះគន់ខ្លាំងលើកូរ៉េខាងជើង ដែលបាញ់មីស៊ីលម្ដងហើយម្ដងទៀត ព្រមទាំងបានកោះប្រជុំបន្ទាន់ក្រុមប្រឹក្សាសន្តិសុខ ដើម្បីរកដំណោះស្រាយផងដែរ។

ការបាញ់មីស៊ីលរបស់កូរ៉េខាងជើង រឹតតែធ្វើឲ្យរដ្ឋបាលលោកប្រធានាធិបតី ដូណាល់ ត្រាំ ក្ដៅស្លឹកត្រចៀកខ្លាំង និងបានគំរាមដាក់ទណ្ឌកម្មធ្ងន់ទៀតផង។ តំណាងអាមេរិកប្រចាំអង្គការសហប្រជាជាតិ Nikki Haley បានព្រមានកូរ៉េខាងជើងជាថ្មីទៀតជុំវិញទង្វើព្រហើនមិនស្ដាប់គេឯងនេះ។ អាមេរិក កំពុងពិនិត្យស្ថានការណ៍បច្ចុប្បន្ន ហើយមានបំណងស្វែងរកលទ្ធភាពដាក់ទណ្ឌកម្មខ្លាំងៗលើរបបដឹកនាំកូរ៉េខាងជើងដែរ។

និយាយទៅកាន់អ្នកកាសែតនៅថ្ងៃទី១៦ ខែឧសភា មុនកិច្ចប្រជុំ លោកស្រី Haley បញ្ជាក់ដែរថា អាមេរិក ក៏នឹងមិនលើកលែងឲ្យប្រទេសទី៣ ណាដែលគាំទ្រកូរ៉េខាងជើងដែរ។ ពោល គឺទាំងកូរ៉េខាងជើង ទាំងប្រទេសដែលនៅពីក្រោយ ទំនងជាត្រូវអាមេរិកដាក់សម្ពាធទាំងអស់ដោយមិនអាចរួចខ្លួនឡើយ។ បើតាមសម្ដីអគ្គរដ្ឋទូតអាមេរិក ប្រទេសណាដែលគាំទ្រកូរ៉េខាងជើង ប្រទេសនោះប្រឆាំងសហគមន៍អន្តរជាតិទាំងមូល។

យ៉ាងណាក្ដី តំណាងអាមេរិករូបនេះ មិនបានបញ្ជាក់ឈ្មោះប្រទេសដែលនៅពីក្រោយ និងចាំជួយកូរ៉េខាងជើងឡើយ។ បើតាមទីភ្នាក់ងារព័ត៌មាន Yonhap លោកស្រី បាននិយាយគំរាមថា អាមេរិកនឹងបកស្បែកមុខប្រទេសដែលគាំទ្រកូរ៉េខាងជើង ដើម្បីបង្ហាញគេឯងឲ្យបានឃើញ ហើយអាមេរិកនឹងដាក់ទណ្ឌកម្មលើប្រទេសទាំងនោះដូចគ្នានឹងកូរ៉េខាងជើងដែរ។

ជាមួយគ្នានេះ អាមេរិកក៏សង្ឃឹមថាអាចដាក់សម្ពាធលើចិនឲ្យជួយដោះស្រាយវិបត្តិនុយក្លេអ៊ែរកូរ៉េខាងជើងបន្ថែមទៀតដែរ។ រដ្ឋបាលលោក ត្រាំ បានពិភាក្សារឿងទណ្ឌកម្មជាមួយចិនអស់ពេលយូរមកហើយ ព្រោះអាមេរិកជឿថាចិននៅតែមានឥទ្ធិពលបង្ខំឲ្យកូរ៉េខាងជើងគោរពច្បាប់អន្តរជាតិ ឬក៏ងាកចូលតុចរចាវិញ។ សម្រាប់អាមេរិក បើកូរ៉េខាងជើងមិនបោះបង់មហិច្ឆតានុយក្លេអ៊ែររបស់ខ្លួនទេ ទ្វារចរចានឹងមិនបើកឡើយ៕