៣ឆ្នាំក្នុងអំណាច លោក ប្រាយុទ្ធ ថា លោកបារម្ភពីប្រទេសជាតិ ជាងប្រជាធិបតេយ្យ

អន្តរជាតិ

៣ឆ្នាំក្នុងអំណាច លោក ប្រាយុទ្ធ ថា លោកបារម្ភពីប្រទេសជាតិ ជាងប្រជាធិបតេយ្យ

17, May 2017 , 5:08 pm

រូបភាព

ដោយ: តន ចាន់រិទ្ធារ៉ា

នាយករដ្ឋមន្ត្រីថៃ ប្រាយុទ្ធ ចន្ទអូចា បាននិយាយការពាររាល់ការសម្រេចចិត្តរបស់លោកទាំងអម្បាលម៉ាន អំឡុងពេល៣ឆ្នាំនៃការដឹកនាំប្រទេស។ លោកឧត្តមសេនីយ៍ ប្រាយុទ្ធ ដែលដឹកនាំធ្វើរដ្ឋប្រហារទម្លាក់រដ្ឋាភិបាលស៊ីវិលក្នុងឆ្នាំ២០១៤ លើកឡើងថា អ្វីដែលលោកបានធ្វើទាំងអស់ គឺដើម្បីតែសេចក្ដីសុខប្រជាជនថៃ ហើយលោកធ្វើការសម្រេចចិត្តទៅតាមវេលា និងអំណាចដែលលោកមាន ដើម្បីប្រទេសជាតិទៅមុខ។

នៅសល់ប៉ុន្មានថ្ងៃទៀតប៉ុណ្ណោះ ខួបទី៣ឆ្នាំនៃការធ្វើរដ្ឋប្រហារមិនបង្ហូរឈាមដែលទម្លាក់រដ្ឋាភិបាលស៊ីវិលមកដល់។ ថ្ងៃទី២២ ខែឧសភា ឆ្នាំ២០១៤ ក្រុមយោធាដឹកនាំដោយឧត្តមសេនីយ៍ ប្រាយុទ្ធ ចន្ទអូចា បានដណ្ដើមអំណាចពីរដ្ឋាភិបាលស៊ីវិលដែលដឹកនាំដោយបក្សភឿថៃ និងបានប្រើប្រាស់កណ្ដាប់ដៃដែកបង្ក្រាបរាល់ការប្រឆាំងដើម្បីគ្រប់គ្រងប្រទេស។ គ្មានឡើយការជួបជុំរបស់បក្សនយោបាយ សិទ្ធិសេរីភាពត្រូវបានរឹតត្បិតយ៉ាងខ្លាំង ហើយស្ថានភាពសិទ្ធិមនុស្សក៏កាន់តែអាក្រក់ទៅទៀត។

យ៉ាងណាក្ដី មេដឹកនាំរបបសឹកថៃរូបនេះ បានលើកឡើងថា លោកប្រឹងប្រែងអស់ពីសមត្ថភាពហើយក្នុងការកាច់ចង្កូតប្រទេស និងព្យាយាមដោះស្រាយវិបត្តិសង្គម និងសេដ្ឋកិច្ចជាច្រើនដែរ។ បើទោះជាពេលខ្លះមិនទាន់ពេញចិត្តនឹងសមិទ្ធផលដែលកើតឡើងក្ដី លោក ប្រាយុទ្ធ និយាយថា លោកធ្វើគ្រប់យ៉ាងទៅតាមពេលវេលា និងធនធានដែលលោកមាន។ លោក ក៏ឆ្លៀតពេលរិះគន់អ្នកដែលថាលោកក្រាញអំណាចដែរ។

«មានអ្នកខ្លះមិនចូលចិត្ត ឬមិនយល់ពីអ្វីខ្ញុំកំពុងធ្វើឡើង។ ពួកគេចោទខ្ញុំថាព្យាយាមក្រាញអំណាចមិនចង់ចាកចេញពីតំណែង។ ប៉ុន្តែខ្ញុំនឹងទុកបញ្ហាដែលនៅសេសសល់ឲ្យពួកគេដោះស្រាយវិញម្ដង»។ នេះជាការលើកឡើងរបស់លោក ប្រាយុទ្ធ ដែលផ្សាយដោយកាសែតបាងកកប៉ុស្តិ៍។ លោកបន្តថា រដ្ឋាភិបាលរបស់លោកមានមហិច្ឆតាខ្ពស់ណាស់ ដូចនេះបើលោកធ្វើមិនបានទេ មានតែទុកឲ្យរដ្ឋាភិបាលថ្មីដោះស្រាយម្ដង។

ជាមួយគ្នានោះ មេដឹកនាំក្រុមយោធារូបនេះ ក៏អំពាវនាវឲ្យប្រជាជនថៃទាំងអស់ កុំចាញ់បោកពាក្យសន្យារបស់អ្នកនយោបាយដែរ។ ដោយចង់សំដៅពីសមិទ្ធផលដែលរដ្ឋាភិបាលសម្រេចបាន លោក ប្រាយុទ្ធ សង្កត់ធ្ងន់ថា ក្រុមអ្នករិះគន់ព្យាយាមមួលបង្កាច់រដ្ឋាភិបាល និងនិយាយបំភ្លៃថារដ្ឋាភិបាលមិនបានធ្វើអ្វីសោះ។ លោក ក៏ប្រាប់ឲ្យប្រជាជនថា លោកមិនសន្យាដូចអ្នកនយោបាយឡើយ ហើយអ្វីដែលលោកបារម្ភ គឺប្រទេសជាតិ មិនមែនប្រជាធិបតេយ្យឡើយ។

ការនិយាយការពារខ្លួនពីសំណាក់មេដឹកនាំរបបសឹក ធ្វើឡើងស្របពេលមានការវាយតម្លៃជាច្រើនលើសកម្មភាពរបស់រដ្ឋាភិបាល និងក្រុមប្រឹក្សាដើម្បីសន្តិភាព និងសណ្ដាប់ធ្នាប់ មុនពេលខួបនៃការកាន់អំណាចមកដល់។ រដ្ឋាភិបាលថៃ នឹងបញ្ចេញរបាយការណ៍វាយតម្លៃរបស់ខ្លួននៅខែកញ្ញាខាងមុខ តែលោកក៏ប្រាប់ទុកដែរថា របបដឹកនាំរបស់លោក ផ្ដោតសំខាន់លើការជួយទំនុកបម្រុងប្រជាជនមានចំណូលទាប តែមិនមែនតាមរយៈការផ្ដល់លុយកាក់ឡើយ៕