អន្តរជាតិ
ហ្វីលីពីនចោលលុយអឺរ៉ូ ដូរយកលុយយ័នរបស់ចិន លោក Salvador Medialdea រដ្ឋមន្ត្រីប្រចាំវិមានប្រធានាធិបតីហ្វីលីពីន
× ក្នុងគោលដៅពង្រឹងឯករាជ្យ រដ្ឋាភិបាលក្រុងម៉ានីល បានសម្រេចចិត្តឈប់ទទួលជំនួយពីសហភាពអឺរ៉ុបដែលចំនួនដល់ទៅ២៥០លានអឺរ៉ូឯណោះ។ នេះ បើតាមការបញ្ជាក់របស់អគ្គរដ្ឋទូតសហភាពអឺរ៉ុបប្រចាំហ្វីលីពីន ហើយការសម្រេចចិត្តនេះធ្វើឡើងក្រោយពីលោក រ៉ូឌ្រីហ្គោ ឌូទើតេ ត្រឡប់មកពីចិនវិញជាមួយជំនួយរាប់ពាន់លានយ័ននោះ។ ការបដិសេធជំនួយនេះ នឹងប៉ះពាល់ខ្លាំងដល់ប្រជាជនក្រីក្រនៅតំបន់ភាគខាងត្បូងហ្វីលីពីន។
រដ្ឋាភិបាលហ្វីលីពីនបានប្រាប់សហភាពអឺរ៉ុបថា ខ្លួននឹងមិនទទួលជំនួយអភិវឌ្ឍដែលផ្ដល់អឺរ៉ុបទៀតឡើយ។ នេះមានន័យថា ហ្វីលីពីន នឹងបាត់បង់ទឹកប្រាក់ជំនួយចំនួនជាង២៥០លានអឺរ៉ូ ដែលផ្ដល់សម្រាប់អភិវឌ្ឍតំបន់សហគមន៍មូស្លីមនៅភាគខាងត្បូង។ យ៉ាងណាក្ដី ប្រធានាធិបតី រ៉ូឌ្រីហ្គោ ឌូទើតេ ធ្លាប់អះអាងហើយថា ហ្វីលីពីន នឹងនៅតែរស់បានខ្លួនឯងដោយគ្មានបញ្ហា ទោះជាគ្មានជំនួយពីអឺរ៉ុបក៏ដោយ។
អគ្គរដ្ឋទូតអឺរ៉ុបប្រចាំហ្វីលីពីន Franz Jessen បាននិយាយនៅថ្ងៃទី១៧ ខែឧសភា ថា រដ្ឋាភិបាលហ្វីលីពីនបានប្រាប់លោកពីការសម្រេចចិត្តនេះ ប៉ុន្តែលោកមិនបញ្ជាក់មូលហេតុឲ្យច្បាស់លាស់ឡើយ។ លោក Jessen បានត្រឹមបញ្ជាក់ថា វានឹងប៉ះពាល់ដល់ការអភិវឌ្ឍតំបន់ក្រីក្រ និងសម្បូរដោយជម្លោះនៅកោះមិនដាណាវភាគខាងត្បូង។
អគ្គរដ្ឋទូតអឺរ៉ុបប្រចាំហ្វីលីពីន Franz Jessen
ទាក់ទងមូលហេតុនៃការឈប់យកជំនួយនេះ មន្ត្រីជាន់ខ្ពស់នៃរដ្ឋាភិបាលហ្វីលីពីន និយាយថា ហ្វីលីពីនអត់យកលុយពីហ្វីលីពីន ព្រោះហ្វីលីពីនចង់រក្សាឯករាជ្យភាពរបស់ខ្លួន។ លោក Salvador Medialdea រដ្ឋមន្ត្រីប្រចាំវិមានប្រធានាធិបតី សង្កត់ធ្ងន់ថា គោលនយោបាយថ្មីរបស់រដ្ឋាភិបាល នឹងបិទផ្លូវមិនឲ្យសហភាពអឺរ៉ុបលូកលាន់កិច្ចការផ្ទៃក្នុងហ្វីលីពីនដូចមុនទៀត។ នេះបើតាមការផ្សាយរបស់សារព័ត៌មាន Rappler ។
តាមពិតទៅ ប្រធានាធិបតី ឌូទើតេ ក៏ធ្លាប់ប្រាប់ឲ្យសហភាពអឺរ៉ុបកាត់ជំនួយទាំងអម្បាលម៉ានដែលគ្រោងផ្ដល់ឲ្យហ្វីលីពីនទៅ ដោយលោកមិនសប្បាយចិត្តនឹងពាក្យរិះគន់របស់សហភាពអឺរ៉ុបជុំវិញការស្លាប់មនុស្សរាប់ពាន់នាក់ក្នុងសង្គ្រាមគ្រឿងញៀន។ កាលពីចុងឆ្នាំ២០១៦ លោក ឌូទើតេ លើកឡើងចំៗថា លោកមិនអង្វរអឺរ៉ុបឲ្យផ្ដល់ជំនួយឲ្យហ្វីលីពីនឡើយ ហើយបើអឺរ៉ុបចង់ដកជំនួយ ក៏ដកទៅ ព្រោះនៅមានប្រទេសច្រើនទៀតចាំផ្ដល់ជំនួយដល់ហ្វីលីពីនដូចគ្នា។
អ្វីគួរឲ្យកត់សម្គាល់ ការសម្រេចចិត្តរបស់រដ្ឋាភិបាលហ្វីលីពីន ធ្វើឡើងដើម្បីពង្រឹងឯករាជ្យជាតិ ប៉ុន្តែមុននេះ លោក ឌូទើតេ ទើបតែធ្វើជាសាក្សីក្នុងការទទួលជំនួយរាប់លានដុល្លារពីចិន ពេលលោកទស្សនកិច្ចនៅចិន។ មិនតែប៉ុណ្ណោះ ចិន ក៏បានសន្យាជួយហ្វីលីពីនលើការកសាងហេដ្ឋារចនាសម្ព័ន្ធតាមអ្វីដែលហ្វីលីពីនចង់បានទៀតផង។ ច្បាស់ណាស់ថា ហ្វីលីពីនទទួលជំនួយពីចិន ដោយសារចិនមិនខ្វល់ខ្វាយសង្គ្រាមគ្រឿងញៀនឡើយ មានតែប្រកាសគាំទ្រទៅទៀត៕
Tag:
ហ្វីលីពីន
ចិន
អឺរ៉ុប
© រក្សាសិទ្ធិដោយ thmeythmey.com